Perezida Nana Akufo-Addo yahuye n’abanya-Ghana baba mu Rwanda

Yanditswe na Evariste Nsengimana
Kuya 7 Nzeri 2018 saa 10:24
Yasuwe :
0 0

Perezida wa Ghana, Nana Akufo-Addo, yahuye n’abaturage b’igihugu cye baba mu Rwanda, babarizwa mu mirimo itandukanye barimo n’abanyeshuri.

Akufo-Addo yageze i Kigali kuri uyu wa Kane, yitabiriye Inama Nyafurika ku Iterambere ry’Ubuhinzi muri Afurika.

Uyu mukuru w’igihugu yaje ku butumire bwa mugenzi we w’u Rwanda akaba n’umuyobozi wa Afurika Yunze Ubumwe, Paul Kagame, aza avuye nama yaberaga mu Bushinwa ihuje icyo gihugu n’ibihugu bya Afurika.

Nk’uko The New Times yabitangaje, Akufo-Addo yabwiye abanya-Ghana, ko kuba igihugu cye n’u Bushinwa bifitanye umubano mu by’ubucuruzi, bufite agaciro ka miliyari 7$ bisobanuye byinshi.

Ati “Byari iby’agaciro kuri njye kujya mu Bushinwa, nko gushimangira akamaro duha ubwo bufatanye n’uruhare rwabwo mu kuzamura ubukungu bwa Ghana.”

Akufo-Addo yababwiye ko Ghana yasinye amasezerano y’inkunga ya miliyari 2$, azafasha imishinga itandukanye, ariko gutera imbere kwayo bizaterwa n’uruhare rw’abaturage.

Yashimangira kandi ko arajwe ishinga no kubaka ubukungu bw’iki gihugu, bukaba budashingiye ku nkunga.

Perezida Akufo-Addo yabwiye abo baturage ko bimwe mu byo ateganya mu gihugu cyabo ari ukongerera imbaraga ibigo by’imari kandi ko kwiga amashuri abanza n’ayisumbuye bizaba itegeko.

Ati “Birashoboka ko mwabyumvise ko ndi gushaka gusaba abadepite mbere y’uko manda yanjye irangira mu 2020, hagashyirwaho itegeko ry’uko muri Ghana, uburezi guhera ku mashuri y’incuke ukarangiza ayisumbuye biba itegeko.”

Akufo-Addo asanga mu gihe igihugu cye kizaba gifite abakozi bafite ubumenyi kandi bahagije bizaba ari ugufungura amarembo y’iterambere ryacyo.

Denis Karera uhagarariye inyungu z’abanya-Gahana basaga 60 baba mu Rwanda, asanga kuba Perezida Akufo-Addo yahisemo guhura nabo, bigaragaza agaciro abaha.

Yanavuze kandi ko imirimo bakora mu Rwanda igira uruhare ku iterambere ry’ibihugu byombi.

Ni ubwa Kabiri Akufo-Addo ageze i Kigali, nyuma yo kwitabira inama yo gushyira umukono ku masezerano y’isoko rusange rihuza ibihugu bya Afurika, ahamya ko nta gushidikanya, riganisha ku iterambere ryabyo.

Perezida wa Ghana aganira n'abanya Ghana bari mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza