00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Amashuri yo muri Uganda yongeye gufungwa n’ingendo zihuza uturere zirahagarikwa

Yanditswe na Ntabareshya Jean de Dieu
Kuya 7 Kamena 2021 saa 10:16
Yasuwe :
0 0

Perezida wa Uganda, Yoweri Kaguta Museveni, kuri iki Cyumweru tariki ya 6 Kamena 2021, yatangaje ingamba nshya zigomba gukurikizwa mu rwego rwo gukumira icyorezo cya Covid-19 zirimo ko amashuri n’ingendo zihuza uturere bihagarara mu rwego rwo kureba ko ubwiyongere bw’abayandura bwagabanuka mu gihugu.

Izi ngamba nshya Perezida Museveni yatangaje ko zigomba kubahirizwa guhera kuri uyu wa Mbere tariki ya 7 Kamena 2021, zirimo ko amashuri yose agomba gufungwa, ingendo zigomba guhagarara ni ukuvuga izihuza uturerei uretse amakamyo y’ibicuruzwa na yo yemerewe kugendamo abantu babiri. Amasoko azajya afungura gake gashoboka, gahunda z’amasengesho n’amateraniro yo mu nsengero byahagaritswe, kandi n’inama ntabwo zemewe uretse Inama z’Abaminisitiri.

Muri izo ngamba zose, Museveni yavuze ko inyinshi zigomba kumara iminsi 42 kandi ko guverinoma ari yo izasuzuma ikizava mu gufata ibi byemezo kugira ngo harebwe niba zakomeza gukurikizwa cyangwa zakoroshywa.

Museveni yavuze ko igihugu gihangayikishijwe cyane n’ubwiyongere bw’abandura iki cyorezo kandi ko bafite impungenge ko abarwayi bashobora kuba benshi mu bitaro mu gihe nta gikozwe.

Ati “Muri iyi nkundura y’ubwiyongere n’abazahazwa na Covid-19 n’impfu turi kugira birenze cyane ibyo twanyuzemo mu maza ya mbere y’iki cyorezo."

Hagendewe ku igereranya ryakozwe na Reuters ngo muri Uganda nibura buri munsi haboneka ubwandu bushya ku bantu 825.

Uganda yari yafashe ibyemezo bya guma mu rugo mu bihugu bya mbere muri Afurika kuva mu mwaka wose ushize ariko zigenda zicishwa make bitewe n’uko umubare w’abanduraga iki cyorezo wari wagabanutse.

Mu kwezi gushize kwa Gicurasi, ni bwo habonetse ubwiyongere bukabije, kandi bwibanda cyane ku bakiri bato, bityo benshi batewe ubwoba n’uko igihugu gishobora kugorwa no guhangana n’iri hindagurika rya kabiri ry’icyorezo.

Kugeza ubu muri Uganda ijanisha ry’abandura ryamaze gutumbagira cyane kuko ryagenze ku kigero cya 18% mu gihe nyamara uhereye muri Gashyantare kugera Mata 2021 byari ku kigero cya 3%.

Imibare ya Minisiteri y’Ubuzima muri Uganda igaragaza ko muri iki gihugu abantu hafi 53000 banduye Covid-19 mu gihe abagera kuri 383 bahitanwe na yo.

Ingendo zihuza uturere ziri mu bibujijwe guhera kuri uyu wa Mbere
Uganda yasubiye mu bihe bidasanzwe kubera icyorezo cya Covid-19 cyugarije Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .