00:00:00 IGIHE NETWORK KN KINYARWANDA EN ENGLISH FR FRANCAIS

Perezida Museveni aravugwaho kwivanga muri Politiki ya Kenya

Yanditswe na Dufitumukiza Salathiel , Muhonzire Sylvine
Kuya 6 Kanama 2021 saa 08:54
Yasuwe :
0 0

Perezida wa Uganda,Yoweri Kaguta Museveni, aranuganugwa kwivanga muri politiki ya Kenya, kubera umubano wihariye asigaye afitanye na Visi Perezida w’icyo gihugu, William Ruto, umaze iminsi adacana uwaka na Uhuru Kenyatta.

Ku wa 3 Kanama 2021 William Ruto yagombaga kugirira urugendo muri Uganda ku mpamvu ze bwite ariko aza guhagarikwa ku munota wa nyuma n’indege imutwara yamaze kwitegura.

Inzego zishinzwe abinjira n’abasohoka muri Kenya zamuhagaritse zivuga ko nta ruhushya abifitiye, ibintu byatewe utwatsi n’ibiro bya Ruto bisobanura ko adasanzwe asabira uburenganzira ingendo akora ku nyungu ze bwite.

Byari ubwa kabiri agiye kujya muri icyo gihugu mu kwezi kumwe kuko ku wa 7 Nyakanga ni ho yari. Bikekwa ko icyatumye ibintu bidogera ari uko nyuma y’urwa mbere hasohotse amafoto yicaranye na Perezida Museveni.

Ayo mafoto yaherekejwe n’inkuru z’ibitangazamakuru bitandukanye byo muri Uganda bishimagiza Ruto ko ari kugerageza gushyira imbaraga mu bufatanye bw’Ibihugu byombi haba mu bucuruzi na politiki.

Ni intambwe itaragezweho na Perezida Kenyatta kuko umubano we na Perezida Museveni wagiye biguru ntege, mu gihe Ruto yahagenze kenshi haba ku mpamvu ze bwite no mu bikorwa bitandukanye birimo n’ibyo kugarura amahoro cyane cyane hagati y’ abaturiye imipaka y’ibihugu byombi.

Ruto yaba ari gusaba Museveni ubufasha?

Nubwo Ruto na Perezida Kenyatta bombi babarizwa mu Ishyaka rya Jubilee Party riri ku butegetsi kuva mu 2017, bamaze imyaka ibiri barebana ay’ingwe.

Amakimbirane yabo yatutumbye cyane mu 2019 biturutse ku kuba Ruto ari we watoranyijwe nk’uzahagararira iryo Shyaka mu matora y’umukuru w’igihugu ateganyijwe mu 2022.

Mu 2019 Perezida Kenyatta yashyizeho ingamba zikakaye mu kurwanya ruswa bituma bamwe mu bayobozi bakuru muri Kenya by’umwihariko abafite aho bahuriye n’imari ya Leta batabwa muri yombi, nyuma y’abarirwa muri miliyoni 203$ yatikiriye mu mishinga ya baringa yitiriwe iy’ubwubatsi.

Ubwo William Ruto (ibumoso) aheruka muri Uganda hasohotse amafoto ari kumwe na Perezida Museveni (iburyo)

Abafunzwe n’abakozweho iperereza benshi bari aba hafi ya Ruto basanzwe bamushyigikira, harimo n’wari Umunyamabanga wa Leta ushinzwe umutungo, Henry Rotich, waje gufungurwa nyuma y’umunsi umwe ndetse ntiyahamwa n’ibyaha. Ubu uwo mwanya yawukuweho.

William Ruto yavuze ko iryo perereza riri gukorwa kuri abo bayobozi ridakwiye kuko nta mafaranga yarimanganyijwe.

Umwuka wakomeje kuba mubi hagati y’abo bayobozi babiri, Ruto akirinda kugaragaza yeruye ko ahanganye na Kenyatta ahubwo akabinyuza mu bamushyigikiye.

Umwe muri bo uba no mu Nteko Ishinga Amategeko, Ndindi Nyoro, yavuze ko we impamvu bari kumukoraho iryo perereza ari uko ashyigikiye Ruto mu matora ya 2022.

Ihangana ry’aba banyepolitiki bahuriye no mu buyobozi bukuru bw’Ishyaka Jubilee, ryakomeje mu buryo buziguye ndetse Perezida Kenyatta aherutse kumushinja gusohoka mu gihugu ku mpamvu zitumvikana.

Bivugwa ko hashize igihe Perezida Kenyatta ategura inama ntatumiremo Ruto, na we ku rundi ruhande akarushaho gukaza imikoranire na Perezida Museveni.

Kubera ibiganiro bamaze igihe bagirana n’ingendo nyinshi amaze gukorera muri Uganda, Daily Monitor yatangaje ko Perezida Museveni ashyigikiye ko William Ruto ari we wazayobora Kenya nyuma ya manda ya kabiri ya Perezida Kenyatta, aho kuba yayoborwa na Raila Odinga bahora bahanganye.

Uretse kuba Ruto afite ibikorwa by’ubuhinzi n’ubucuruzi bw’ibikomoka kuri peteroli muri Uganda, kuba yayobora Kenya Perezida Museveni abibonamo amahirwe ku gihugu ayoboye kuko ari ho kinyuza ibicuruzwa byinshi cyinjiza dore ko cyo kidakora ku nyanja.

Bamwe mu basesenguzi mu bya Politiki barimo Prof XN Iraki wo muri Kaminuza ya Nairobi bagaragaza ko nk’uwitegura kujya mu matora, ni ngombwa ko Ruto yubaka umubano mpuzamahanga ukomeye bikazamufasha no kubona amafaranga yifashisha mu bikorwa byo kwiyamamaza.

Perezida Museveni ni we umaze igihe kinini ku butegetsi mu Karere ku buryo abashaka kuyobora ibihugu ahanye na byo imbibi hari ibyo bamukeneraho nk’umuntu uzi politiki yaho kurusha abandi. Ubu amaze imyaka 35 ku butegetsi.

Ishyaka rya Raila Odinga ryateye utwatsi ingendo za Ruto muri Uganda

William Ruto amaze guhagarikwa kujya muri Uganda abanyepolitiki benshi bo muri Kenya bacitse ururondogoro bamwe banenga icyo cyemezo abandi babaza icyo ashakayo kiri gutuma ahasura ubutitsa.

Ishyaka ODM riyobowe na Raila Odinga utavuga rumwe na Guverinoma ya Kenya, ryabajije Ruto niba ashaka gutera ikirenge mu miyoborere ya Perezida Museveni ikunze kunengwa.

ODM yibajije niba Ruto Atari gushaka kugenda umujyo umwe “n’ishyaka rizwiho amateka mabi mu bya demokarasi, kuniga imiryango itegamiye kuri leta, ubwigenge bw’itangazamakuru no guhonyora uburenganzira bwa muntu.”

Ryakomeje riti “Nk’uko tutifuza kwivanga muri politiki y’ibindi bihugu, ni ko dushaka no kuvuga ko tudakeneye kuzana [iwacu] imyitwarire ya politiki y’ibindi bihugu, usanga amaherezo yayo ari ukutugeza mu mvururu no gusubiza igihugu cyacu inyuma.”

Uganda yahakanye yivuye inyuma ibyo kwivanga muri politiki ya Kenya

Mu itangazo Guverinoma ya Uganda yasohoye kuri uyu wa Kane ibinyujije kuri Facebook yahakanye ko nta gihugu na kimwe yivanga muri politiki yacyo.

Yagize iti “Ingamba zacu mu bubanyi n’amahanga zigaragaza neza ko tutivanga muri bibera imbere mu gihugu icyo ari cyo cyose. Nta bubasha, nta bushobozi dufite kuri Guverinoma ya Kenya. Bafite impamvu zabo bwite zatumye bazitira Ruto kuza muri Uganda kandi ibyo bishobora kunyuzwa muri Ambasade ya Kenya.”

Minisitiri w’Ububanyi n’Amahanga wa Uganda, Okello Oryem, yatangaje ko atigeze amenyeshwa n’abashinzwe ibyo kwakira abashyitsi ko Ambasade ya Kenya muri icyo gihugu yavuze ko Ruto ahafite uruzinduko ngo habe hakorwa imyiteguro.

Abarebera hafi ibya piolitiki muri Kenya bavuga ko ubu kwibaza niba Perezida Kenyatta na Visi Perezida we William Ruto batavuga rumwe bitakiri ikibazo kuko byigaragaza, ahubwo ikitaramenyekana ni igihe bazitandukanyiriza.

Bikekwa ko Ruto ashobora kuzitandukanya na Kanyatta bagasa n’abahanganye muri ibi bihe amatora yegereje. Ishyaka rya Jubilee bahuriyemo ryashinzwe mu mpera za 2016, rihuriza hamwe imitwe ya politiki itandukanye.

Kubera uko umubano wa Museveni na Ruto ugenda ufata indi ntera, biranuganugwa ko Museveni ashaka kwivanga muri politiki ya Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .