Perezida Magufuli yavuze ko Abanya-Tanzania atari imbeba zigeragerezwaho urukingo rwa COVID-19

Yanditswe na Iradukunda Serge
Kuya 27 Mutarama 2021 saa 06:14
Yasuwe :
0 0

Perezida wa Tanzania Dr John Pombe Magufuli yasabye inzego z’ubuzima kwigengesera ku bijyanye n’urukingo rw’icyorezo cya COVID-19 ngo kuko Abanya-Tanzania atari sumbirigi zo kugeragerezaho urukingo.

Muri Gicurasi umwaka ushize, Perezida John Pombe Magufuli yavuze ko amasengesho yafashije icyo gihugu gutsinda Coronavirus, maze agaya abacyambara agapfukamunwa. Kuva icyo gihe imibare y’abandura n’abahitanwa na Coronavirus ntirongera gutangazwa.

Nyuma y’iki gikorwa, BBC yatangaje ko Perezida Magufuli yasabye abakora mu nzego z’ubuzima kwitondera inkingo za COVID-19.

Ati "Minisiteri y’Ubuzima igomba kwigengesera, ntibagomba kwihutira kugerageza izi nkingo nta gukora ubushakashatsi, ntabwo ari buri rukingo rudufitiye akamaro, tugomba kwitonda. Ntitugomba gukoreshwa nka sumbirigi."

Yakomeje avuga ko abazungu iyo baza kuba abahanga baba baravumvuye urukingo rwa Sida. Ati "Inkingo ziteye inkeke, iyo umuzungu aza kuba afite ubushobozi bwo kuvumbura urukingo yari akwiye gushaka urukingo rwa Sida, kanseri n’igituntu."

Perezida Magufuli yasabye abaturage gukomeza kwirinda no gusenga. Ati “Ibihugu byinshi byashyizeho Guma mu rugo, ariko muri Tanzania nta gahunda ya Guma mu rugo ihari kandi ntituzigera tunayishyiraho kubera ko Imana yacu iriho kandi izakomeza kuturinda.”

Magufuli atangaje ibi mu gihe Kiliziya Gatolika yo muri Tanzania yasabye abayoboke bayo gushyiraho ingamba zo kwirinda icyorezo cya Coronavirus, aho yemeje ko hamaze iminsi hapfa umubare munini w’abantu kandi hakaba hadatangazwa ikibahitana.

Perezida Magufuli yavuze ko Abanya-Tanzania atari sumbirigi zo kugeragerezaho urukingo rwa COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .