Kwamamaza

Perezida Kagame yasabye ibihugu bya EAC gukomera ku ntego n’icyerekezo bisangiye

Yanditswe kuya 8-09-2016 saa 21:43' na Ezechiel Mbananabo


Perezida Kagame yitabiriye inama ya 17 idasanzwe y’abakuru b’ibihugu bize Umuryango wa Afurika y’Iburasirazuba,yabereye i Dar es Salaam muri Tanzania kuri uyu wa Kane, aho yasabye ibihugu bigize uyu muryango gukomera ku ntego n’icyerekezo bisangiye no gukomeza gukora byinshi kandi byiza.

Umukuru w’Igihugu yagaragaje ko gukorera hamwe nk’umuryango byatumye ibihugu birushaho kugira ingufu muri gahunda zitandukanye kuruta uko buri kimwe cyari gukora ukwacyo.

Yagize ati “Mbere na mbere dukeneye gukaza umurego mu gushyira mu bikorwa icyerekezo dusangiye nk’Afurika y’Iburasirazuba kandi tukihatira gukora byinshi kandi byiza.Uyu muryango utuma buri wese agira ingufu kurusha uko buri umwe yakora ari nyamwigendaho. Gusa ariko ibi bisaba ko igihe cyose dukomeza gukorera hamwe tukaba twumvikana kandi tukagira ibyo dushyira ku murongo uhamye mu gihe cyose bikenewe.”

Perezida Dr John Pombe Magufuli wa Tanzania, Yoweri Museveni wa Uganda, Paul Kagame w’u Rwanda na Visi Perezida wa Kenya William Ruto nibo bayobozi bakuru bitabiriye iyi nama.

Sudani y’Epfo yari ihagarariwe yakiriwe bidasubirwaho nk’umunyamuryango wa gatandatu w’Umuryango wa Afurika y’Iburasirazuba nubwo Perezida Salva Kiir atari ahari.

Ikibazo cy’u Burundi cyagarutsweho muri iyi nama Perezida Pierre Nkurunziza adahari ahubwo ahagarariwe na Minisitiri we w’Ububanyi n’Amahanga, Alain Aimé Nyamitwe.
Umuhuza mu biganiro by’Abarundi,Benjamin Mkapa yatanze inyadiko zigaragaza aho kugarura amahoro mu Burundi bigeze.

Umuyobozi wa EAC, Dr John Pombe Magufuli, yamushimiye ku kazi keza yakoze ku bijyanye n’inshingano yahawe nk’umuhuza mu biganiro by’Abarundi.

Ku bijyanye no gusinya amasezerano y’ubufatanye bw’akarere mu bucuruzi n’Umuryango w’Ubumwe bw’Uburayi dore ko yari kuri gahunda y’ibyigirwa muri iyi nama, hemejwe ko kuyasinya byigizwa inyuma ho amezi atatu.

U Rwanda na Kenya byo byasinye ayo masezerano mu minsi mike ishize.
Perezida Magufuli yatangaje ko ibijyanye n’aya masezerano, ndetse n’impungenge zigihari mbere yo kuyasinya byafashe umwanya munini mu nama y’uyu munsi.

Yagize ati “Hari ibibazo bitandukanye bigomba kubanza kurebwaho, kuki twe(EAC) twasinya amasezerano mu gihe Umuryango w’Ibihugu by’u Burayi(EU) wafatiye ibihano u Burundi. Kuki twasinya kandi u Bwongereza bwarikuye mu bihugu bigize EU … Kuki nyuma yo kuyasinya tutemerewe gukorana ubucuruzi n’ibihugu biri kuzamuka cyane mu bukungu?”

Abitabiriye iyi nama babwiwe ko ibihugu bya EAC bizatakaza 40% by’amafaranga byinjiza nibisinya aya masezerano.

Abayobozi baturuka muri Tanzania, Uganda, Kenya, u Rwanda, u Burundi, na Sudani y’Epfo bafashe amasaha atandatu bungurana ibitekerezo kuri aya masezerano.

Muri iyi nama Hon. Christophe Bazivamo yarahiriye kuba Umunyamabanga Mukuru wungurije wa EAC,aho agiye kungiriza Umurundi, Ambasaderi Liberat Mfumukeko.

Perezida Kagame yamwifurije imirimo myiza agira ati “Ndifuriza imirimo myiza Umunyamanga Wungirije mushya, mwifurize we na bagenzi be kuzagira manda irangwa no kugera ku nshingano n’imirimo itanga umusaruro. Agiye kuzakora nk’Umunyafurika y’Iburasirazuba kurusha uko ari Umunyarwanda.

Abakuru b'Ibihugu n'abandi bayobozi bakuru muri EAC mu nama ya 17
Perezida wa Tanzania, Dr John Pombe Magufuli
Perezida Kagame yifurije Bazivamo imirimo mishya myiza
Perezida Kagame yasabye ibihugu bya EAC gukora byinshi kandi byiza
Bamwe mu bitabiriye inama ya 17 y'Abakuru b'Ibihugu bya EAC

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved