Perezida Kabila arashinja abatamushyigikiye ubugizi bwa nabi mu myigaragambyo

Yanditswe na Jean Pierre Tuyisenge
Kuya 22 Nzeri 2016 saa 11:51
Yasuwe : XX
0

Perezida wa Repubulika Iharanira Demokarasi ya Congo (RDC), Joseph Kabila, yashinje abo batavuga rumwe kugira uruhare rutaziguye mu bikorwa by’urugomo birimo n’ubwicanyi, byakorewe mu myigaragambyo yo kwamagana manda ye ya gatatu yabaye ku itariki ya 19 na 20 Nzeri 2016.

Mu itangazo ryaciye kuri televiziyo y’igihugu, Perezida Kabila yavuze ko yababajwe bikomeye n’urugomo rwayikorewemo, gusa avuga ko yihanganisha imiryango yatakarije ababo n’ibyabo muri urwo rugomo.

Perezida Kabila avuga ko ibyo abatavuga rumwe n’Ubutegetsi bakoze ibihabanye n’ibyo bari banditse basaba, kuko ngo basabaga kwigaragambya ku wa Mbere no ku wa Kabiri ariko ngo bakoze icyo we yise "Imyigaragambyo y’Ubuhumyi cyangwa iy’amaraso”, nk’uko RFI dukesha iyi nkuru ibitangaza.

Perezida Kabila yijeje abakorewe urugomo ko agiye gushyiraho umusanzu we, ababigizemo uruhare bakagezwa imbere y’Ubutabera. Yaboneyeho guhamagarira abataritabira ibiganiro by’amahoro kubizamo, mu rwego rwo kugarurira amahoro abaturage.

Iyi nkuru ikomeza ivuga ko Perezida Kabila yaboneyeho kwihanganisha imiryango y’abapolisi baguye mu myigaragambyo, baharanira umutekano w’abantu n’ibintu byabo,maze asaba abaturage gusubira mu bikorwa byabo.

Umushinjacyaha mukuru wa RDC,Flory Kabange Numbi yavuze ko abagize uruhare muri ibyo bikorwa bagiye gukurikiranwa n’ubutabera.

Yavuze ko ashingiye ku ngingo ya 10 yo mu itegeko no 199 ryo ku wa mbere 1999, rigenga ibikorwa byo kwigaragambya n’inama zikorwa n’abantu benshi muri RDC, ibyakorewe muri iyo myigaragambyo bihanwa n’amategeko.

Kabange yagize ati “ Hashyizweho abapolisi bo gufata abantu bagize uruhare mu bikorwa by’urugomo byabereye mu myigaragambyo, birimo gusahura, gufata ku ngufu n’ubwicanyi.”

Yavuze ko bizeye ko abantu bose babigizemo uruhare bazafatwa bakagezwa imbere y’ubutabera.

Imyigaragambyo yabaye ku wa 19 na 20 Nzeri,2016 yaguyemo abantu 17 barimo abapolisi batatu, abagera kuri 14 bakomeretswa n’amasasu ubwo inzego z’umutekano zageragezaga guhangana n’abayoboke b’amashyaka atavuga rumwe n’ubutegetsi.

Amahuriro akomeye y’abatavuga rumwe n’ubutegetsi, ari na yo yahamagaje imyigaragambyo rusange avuga ko agamije kwamagana icyo yita umugambi wa Perezida Kabila wo kugundira ubutegetsi.

Perezida Joseph Kabila amaze manda ebyiri ku butegetsi kandi Itegeko Nshinga ntirimwemerera kongera kwiyamamaza mu matora yakagombye kuba mu kwezi kwa 11 uyu mwaka.

Abamushyigikiye barasaba ko aya matora asubikwa hagati y’imyaka ibiri n’ine ngo kuko igihugu kititeguye kuyakora ariko abatavuga rumwe n’ubutegetsi bo ntibabikozwa.

Joseph Kabila, Perezida wa Repubulika Iharanira Demokarasi ya Congo
Imyigaragambyo ikomeje kugwamo abatari bake

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza