Kwamamaza

Perezida Jacob Zuma wa Afurika y’Epfo ari mu mazi abira

Yanditswe kuya 2-11-2016 saa 07:48' na Rabbi Malo Umucunguzi


Iminsi ibiri yagenewe kumva urubanza rugomba kwemeza niba raporo yakozwe kuri Perezida Zuma ishyirwa ku karubanda cyangwa ikagumishwa mu bubiko, irarangira kuri uyu wa Gatatu kuko Urukiko Rukuru rwa Pretoria rwatangiye kumva impande zombi kuri uyu wa Kabiri tariki ya 01 Ugushyingo.

Ni raporo yakozwe n’uwahoze ari Umuvunyi ushinzwe kurwanya ruswa, Thuli Mandosela, ku mikoranire irangwa hagati ya Perezida Zuma n’umuryango w’abaherwe wa Gupta wo muri Afurika y’Epfo, kugeza ubwo baba bagira uruhare rukomeye mu miyoborere y’igihugu.

RFI yatangaje ko kuva kuri uyu wa Kabiri, abavoka ba Zuma bakoze ibishoboka byose mu kumvisha Urukiko Rukuru rwa Pretoria ko iyo raporo itagomba guhita ishyirwa muri rubanda, kuko batabashije kubona ibiyikubiyemo no kubonana n’abatangabuhamya bavuzwemo, ngo bitegure uko bazasubiza ku biyirimo.

Mu cyumba cy’urukiko harimo amashyaka ane atavuga rumwe n’ubutegetsi n’ihuriro ry’imiryango itari iya leta, bo bagashimangira ko raporo itangazwa.

Zwelinzima Vavi uhagarariye iyo miryango yavuze ko ari ‘‘amayeri yihariye ya Jacob Zuma kubera ko azi ko iyo raporo itari nziza kuri we,’’ ndetse ngo ahawe amahirwe yakomeza kuyitinza kugeza no mu mwaka utaha.

Mmusi Maimane uyobora ishyaka ritavuga rumwe n’ubutegetsi, we yavuze ko iyo raporo igomba gushyirwa hanze kandi bigakorwa mu nyungu z’abaturage.

Ati "Twizera ko abaturage ba Afurika y’Epfo bafite uburenganzira bwo kumenya ukuri ku kwigarurirwa kw’igihugu. Aya ni amahirwe babonye yo kuboana iyi nyandiko kandi bakamenya ko niba bishoboka, uwabigizemo uruhare wese ahanwa ibyo yakoze.’’

Urukiko Rukuru rwa Pretoria rugomba kumva impande zitandukanye kuri uyu wa Kabiri hamwe n’uyu munsi kuwa Gatatu, rukabona gufata umwanzuro niba raporo ijya hanze cyangwa hagategerezwa ikindi gihe.

Iyo raporo imaze ibyumweru bibiri isohotse ibitse mu mutamenwa mu biro by’Umuvunyi mushya umaze ukwezi kumwe ashyizweho n’Umukuru w’Igihugu. Nta muntu uramenya ibiyirimo, ariko Perezida Zuma n’abaminisitiri bavugwa ko bashyizweho kubera Umuryango wa Gupta bararwana inkundura ngo itajya hanze.

Perezida Zuma yemera ko ari umuntu wa hafi w’umuryango wa Gupta, ariko akavuga ko nta na rimwe ujya ugira uruhare ku byemezo afata nk’Umukuru w’Igihugu n’ubwo igice kinini cy’umuryango we cyahawe imirimo n’uyu muryango w’abaherwe.

Abayobozi batandukanye barimo Minisitiri w’Imari bahakana ko umuryango wa Gupta waba ariwo wabatanze ngo bashyirwe muri guverinoma, ibintu byanugwanuzwe kugeza hafunguwe iri perereza.

Perezida Jacob Zuma wa Afurika y’Epfo ari mu mazi abira kubera raporo ishobora gushyirwa hanze ikagaragaza imikorere idahwitse ye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved