Perezida Buhari yatowe guhagararira ishyaka rye mu matora ya perezida mu 2019

Yanditswe na Ishimwe Israel
Kuya 7 Ukwakira 2018 saa 12:21
Yasuwe :
0 0

Perezida wa Nigeria, Muhammadu Buhari, yatanzwe n’ishyaka rye All Progressives Congress (APC) kuzarihagararira mu matora y’Umukuru w’Igihugu ategerejwe muri Gashyantare 2019.

Perezida Buhari yemejwe ku wa 6 Ukwakira 2018, mu matora y’ibanze aho yari umukandida rukumbi. Ytiabiriwe n’abagera ku 7000 mu Mujyi wa Abuja.

Guverineri wa Leta ya Ekiti mu Burengerazuba bwa Nigeria, Kayode Fayemi, yavuze ko Buhari utari ufite uwo bahanganye yagize amajwi agera kuri miliyoni 15 mu gihugu hose.

Muhammadu Buhari w’imyaka 75 ni Perezida wa Nigeria kuva mu 2015. Yatangaje ko azongera kwiyamamaza muri Mata 2018. Itegeko Nshinga rimwemerera kwiyamamariza manda ebyiri z’imyaka ine.

Umuvugizi we, Garba Shehu, yatangarije AFP ko nta gitangaza kirimo kuba perezida yakwiyamamariza manda nshya.

Ati ‘‘Muri demokarasi nyayo buri gihe ishyaka ryacu rishyiraho uburyo bwo guhatana. Abashatse kwiyamamariza kuba perezida bari babyemerewe.’’

Perezida Buhari yabaye Jenerali mu Ngabo za Nigeria mu 1980. Bamwe bamunenga kubera politiki ye y’ubukungu n’uburyo yananiwe guhangana n’ikibazo cy’imvururu n’intambara ziterwa n’imitwe y’inyeshyamba nka Boko Haram mu gihugu cye gituwe n’abaturage barenga miliyoni 180.
Mu 2017 yokejwe igitutu asabwa kwegura kubera igihe yamaze arembeye mu Bwongereza ku mpamvu z’uburwayi butatangajwe.

Mu matora azaba ahanganye n’umukandida uzatangwa n’Ishyaka riharanira Demokarasi y’Abaturage (PDP). Iri shyaka ritavuga rumwe n’ubutegetsi ryatangiye urugendo rwo gushaka uzarihagararira mu matora.

Abakandida barenga 12 ni bo bahataniye uyu mwanya. Abahabwa amahirwe barimo Atiku Abubakar wigeze kuba Visi Perezida umaze guhatana inshuro enye; Perezida wa Sena, Abubakar Bukola Saraki na Guverineri wa Leta ya Sokoto, Aminu Waziri Tambuwal.

Biteganyijwe ko abaturage ba Nigeria bazatora umukuru w’igihugu, abaguverineri n’abadepite hagati ya Gashyantare na Werurwe 2019.

Perezida wa Nigeria, Muhammadu Buhari, agiye kongera kwiyamamariza kuyobora Nigeria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza