Orient Bank yo muri Uganda yaguzwe na I&M Bank

Yanditswe na Muhonzire Sylvine
Kuya 4 Gicurasi 2021 saa 01:29
Yasuwe :
0 0

Sosiyete y’ubucuruzi ya I&M Holdings PLC ari nayo ifite I&M Bank ikorera no mu Rwanda yatangaje ku mugaragaro ko yaguze Orient Bank Limited (OBL) yo muri Uganda.

Orient Bank Limited yari imwe mu ma banki y’ubucuruzi akomeye muri Uganda, cyane ko Imibare ya Banki Nkuru y’iki gihugu igaragaza ko iri ku mwanya wa 12.

I&M Holdings PLC na Orient Bank Limited basinyanye amasezerano muri Nyakanga 2020, yo kugura imigabane ingana na 90% y’iyi banki.

Icyemezo cyo kwegukana iyi banki ya OBL cyafashwe ku itariki 30 Mata 2021, nyuma yo guhabwa uburenganzira na Banki y’igihugu ya Kenya, iya Uganda, Isoko ry’imari n’imigabanye rya Kenya ndetse na komisiyo y’Inama y’Umuryango w’ubucuruzi mu bihugu bya Afurika y’iburasirazuba n’iy’Amajyepfo, COMESA.

Kugura iyi banki byatumye intego za I&M Holdings PLC zo kwagura ibikorwa byayo mu bihugu byose bya Afurika y’Iburasirazuba zigerwaho kuko igihugu itari ifitemo banki muri aka karere ari Uganda.

Iyi gahunda yo gushora imari mu bihugu bitandukanye bifasha iyi banki guha abakiliya bayo ibyo bakeneye byose ari nako iteza imbere ubucuruzi mu Karere.

Avuga ku kwegukana iyi banki, Umuyobozi Mukuru wa I&M Holdings PLC, Sarit Raja Shah yagize ati “I&M Group ifite intego yo kuba Banki iyoboye muri Afurika y’Iburasirazuba. Kugura OBL bizashyira I&M Bank mu mwanya mwiza wo kugira uruhare mu iterambere ry’ubukungu bwa Afurika y’Iburasirazuba, no kongera agaciro k’abanyamigabane.”

“Kugura OBL byitezwe ko bizaha I&M Group ubushobozi bwo gukomeza gukura binyuze mu kwegereza amashami yayo abakiliya. Ndetse bizerekana uruhare runini rwacu mu by’amabanki muri Afurika y’Iburasirazuba yose.”

Umwe mu bashinze OBL uzakomeza no kuba umunyamigabane w’iyi banki, Dr. Ketan Morjaria, yagize ati “Kuba I&M Group yaguze OBL ni amateka akomeye kuri Orient Bank. Twishimiye kujya mu muryango mugari wa I&M Holdings PLC, ndetse uku gukorana kuzaha amahirwe abakiliya bacu, aho bazungukira ku serivisi zigezweho za banki zitangwa na I&M Group ari nako dukomeza kubaka icyizere mu bakiliya nk’ibisanzwe.”

Umuyobozi Mukuru wa OBL, Kumaran Pather yavuze ko bishimiye kujya mu muryango mugari wa I&M Group.

Ati “Ubuyobozi bwa OBL bwishimiye kuba imwe muri banki zigize I&M Group kandi twiteguye kubona imikorere igezweho iyi banki izaha abakiliya basanzwe n’abandi bashya."

Kuba I&M Group yaguze OBL bivuze ko yegukanye ibikorwa byayo bitandukanye muri Uganda birimo abakiliyar yari ihafite, abakozi bagera kuri 340, ATMs 22, amafaranga yari ayibikijwemo amarirwa muri miliyari 169Frw, ndetse n’inguzanyo zibarirwa muri Miliyari zirenga 71 Frw.

OBL yiyongereye ku mubare w’amabanki iyi Banki ya I&M yaguze aho twavuga nka Giro Commercial Bank Limited yo muri Kenya, I&M Burbidge Capital Limited yo muri Kenya na Uganda, First City Bank yo mu birwa bya Maurice, CF Union Bank yo muri Tanzania ndetse na BCR yo mu Rwanda.

Mu 2012 nibwo I&M Holdings PLC yaguze imigabane ingana na 80% bya Banki yahoze ari iy’ubucuruzi mu Rwanda, BCR.

Orient Bank yo muri Uganda yaguzwe na I&M Bank

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .