OMS yibasiwe bikomeye nyuma yo kugira Perezida Mugabe ambasaderi wayo

Yanditswe na Herve Ugirumukunda
Kuya 21 Ukwakira 2017 saa 05:55
Yasuwe :
0 0

Ishami ry’Umuryango w’Abibumbye ryita ku Buzima, OMS, ryagize Perezida wa Zimbabwe, Robert Mugabe, ambasaderi ariko impuguke mu by’ubuzima n’impirimbanyi z’uburenganzira bwa muntu zibyamaganira kure.

OMS yavuze ko Mugabe azafasha abandi bayobozi ba Afurika gushyira ingufu mu kurwanya indwara zitandura zirimo umutima, diabète, impyiko, umwijima n’izindi.

Mugabe yakunze kunengwa kwimika ruswa, kuyoboza igitugu no gutsikamira uburenganzira bwa muntu. CNN ivuga ko Hillel Neuer, umuyobozi wa UN Watch, ishami rya Loni rigenzura imikorere ya Loni atashimishijwe no kuba umuntu nka Mugabe yagirwa ambasaderi.

Ati “Guverinoma ya Robert Mugabe yahohoteye abaharanira uburenganzira bwa muntu, abatavuga rumwe nayo baricwa, igihugu cyari isoko y’umugati wa Afurika agihindura ishiraniro.”

Hillel asanga kuba Loni ifata Mugabe nk’umuntu wateje imbere urwego rw’ubuzima, atari ibyo kwihanganira.

Ibi bishimangirwa n’Umuyobozi wungirije wa Human Rights Watch, Iain Levine uvuga ko gushinga Mugabe imirimo iyo ari yo yose bikwiye gutera OMS isoni.

Umunyafurika wa mbere uyoboye OMS, Dr. Tedros Adhanom Ghebreyesus, yavuze ko Mugabe azakoresha umwanya yahawe mu kwereka bagenzi be ko kugeza ubuzima kuri bose, cyane cyane kurwanya indwara zitandura bigomba gushyirwa imbere muri gahunda z’ibihugu byabo, cyane ko Mugabe yashyizeho ikigega cyo kurwanya indwara zitandura, ati “ni agashya ko gukusanya amafaranga mu baturage ibindi bihugu bishobora kwigiraho.”

Imiryango Mpuzamahanga 25 yita ku bijyanye n’ubuzima yari mu nama muri Uruguay ubwo Mugabe Robert yahabwaga uwo mwanya ku wa Gatatu, yanditse inyandiko yerekana ko yatunguwe kandi ikaba ihangayikishijwe n’uwo mwanzuro.

Mugabe, ufite imyaka 93, ari mu bakuru b’ibihugu bya Afurika bamaze igihe ku butegetsi, kuko yatangiye kuyobora Zimbabwe mu 1980.

Kuva mu myaka ya 2000 we n’abambari be ba hafi bafatiwe ibihano na Leta Zunze Ubumwe za Amerika bazira kubangamira uburenganzira bwa muntu.

Ambasaderi wa OMS ni umwanya ushyirwamo abantu bakomeye bakamara imyaka ibiri bakorana n’abayobozi ba Loni mu bukangurambaga ku bibazo by’ubuzima bikomereye Isi.

Mugabe agiye kuri uwo mwana asimbuye Meya w’Umujyi wa New York, Michael Bloomberg.

OMS yibasiwe bikomeye nyuma yo kugira Perezida Mugabe ambasaderi wayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza