Nigeria: Perezida Buhari agiye kugaruka mu gihugu nyuma y’amezi arenga atatu mu Bwongereza

Yanditswe na Evariste Nsengimana
Kuya 19 Kanama 2017 saa 01:36
Yasuwe :
0 0

Perezidansi ya Nigeria yatangaje ko Muhammadu Buhari ategerejwe ko agera mu gihugu uyu munsi nyuma y’iminsi irenga 100 yaragiye kwivuriza i Londres mu Bwongereza.

Buhari yafashe indege imwerekeza kubonana n’inzobere z’abaganga i Londres ku wa 7 Gicurasi 2017.

Kuva icyo gihe, ntiyigeze yongera gukandagiza ikirenge muri iki gihugu ku mpamvu z’uburwayi butaratangazwa.

Amaze kugenda ububasha yabusigiye Visi Perezida Yemi Osbanjo, umukirisitu wo mu majyepfo ya Nigeria, wari uri i Kigali mu muhango w’irahira rya Perezida Paul Kagame ku wa 18 Kanama 2017.

Mu itangazo ryashyizweho umukono n’umuvugizi wa Buhari, Femi Adesina rivuga ko uyu munsi ku wa Gatandatu arara ageze mu gihugu.

Rigira riti “Perezida Buhari aragaruka mu gihugu uyu munsi, nyuma yo kwitabwaho n’abaganga mu mujyi wa Londres.”

The Eastafrican yanditse ko iryo tangazo rivuga ko azasuhuza abaturage kuri televiziyo y’igihugu ku wa Mbere, ahagana saa moya z’umugoroba ndetse ko ashimira abaturage bamusengeye akaba agarutse amahoro.

Si ubwa mbere Buhari w’imyaka 67 agiye kwivuza akamarayo igihe kinini kuko muri Mutarama na ho yagiye kwivuza mu Bwongereza amarayo amezi asaga abiri, agaruka bavuga ko amerewe neza.

Mu ntangiriro z’uko kwezi, muri iki gihugu abaturage bamwe bari mu myigaragambyo basaba ko Buhari agaruka mu kazi cyangwa agatangaza ku mugaragaro ko atakigashoboye.

Perezida wa Nigeria, Muhammadu Buhari biteganyijwe ko agaruka mu gihugu uyu munsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza