Niger: Haburijwemo ‘Coup d’Etat’ mbere y’iminsi ibiri ngo Perezida mushya arahire

Yanditswe na Bukuru JC
Kuya 31 Werurwe 2021 saa 01:40
Yasuwe :
0 0

Umwe mu bayobozi mu nzego z’umutekano muri Niger yatangaje ko kuri uyu wa Gatatu haburijwemo ihirikwa ry’ubutegetsi mbere y’iminsi ibiri ngo Perezida mushya arahirire kuyobora icyo gihugu.

Mu gitondo cyo kuri uyu wa Gatatu nibwo amasasu yumvikanye hafi y’ingoro ya Perezida mu murwa mukuru Niamey.

AFP yatangaje ko ayo masasu yarashwe ubwo abarinda ingoro ya Perezida barasanaga n’abandi basirikare bashakaga guhirika ubutegetsi.

Umwe mu bayobozi mu nzego z’umutekano, yavuze ko bamwe mu basirikare barashe batawe muri yombi.

Ati “Hari abafashwe mu basirikare bari bari inyuma y’iyi Coup d’etat. Abarinda Perezida birwanyeho bababuza kwegera ingoro.”

Biteganyijwe ko Perezida uherutse gutorwa Mohamed Bazoum azarahira kuri uyu wa Gatanu. Mu matora yari ahanganye na Mahamane Ousmane wigeze kuyobora Niger, akaba yaranze ibyayavuyemo.

Bazoum azasimbura Mahamadou Issoufou, wemeye kuva ku butegetsi nyuma ya manda ebyiri yemererwa n’amategeko.

Ku ngoro ya Perezida wa Niger humvikanye urusaku rw'amasasu kuri uyu wa Gatatu (Ifoto: Perezidansi ya Niger)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .