Kwamamaza

Ibihugu bya Afurika bikomeje kwikura muri ICC umusubizo

Yanditswe kuya 28-10-2016 saa 07:25' na Jean Pierre Tuyisenge


Ibihugu bya Afurika bikomeje umugambi wo gusesa amasezerano ya Roma ashyiraho urukiko Mpuzamahanga Mpanabyaha rwa ICC, nyuma y’icyemezo cy’u Burundi, Afurika y’Epfo na Gambia yamaze gutangaza ko yikuye muri uru rukiko.

Tariki ya 18 Ukwakira 2016, nibwo Perezida Pierre Nkurunziza w’u Burundi yafashe icyemezo cyo gushyira umukono ku itegeko ryo kwikura muri ICC, nyuma y’amatora yari yakozwe n’Inteko Ishinga Amategeko yabaye mu Ukwakira.

Ibiro bya Perezida byatangaje ko icyo cyemezo gihita gitangira gukurikizwa nyamara amasezerano y’urwo rukiko yashyiriweho i Roma avuga ko kwikuramo bihabwa agaciro nyuma y’umwaka igihugu kibigejeje mu bunyamabanga bukuru bw’Umuryango w’ Abibumbye, ONU.

U Burundi bubaye igihugu cya mbere cyikuye muri uru rukiko rwashyizweho mu 1998, rushinzwe gukurikirana ibyaha byakozwe mu ntambara n’ibyibasiye inyokomuntu.

Umushinjacyaha Mukuru wa ICC, Fatou Bensouda, aherutse gutangiza iperereza ku bibera mu Burundi avuga ko ryibanda ku byaha byakozwe kuva muri Mata 2015, ubwo Perezida Nkurunziza yatangazaga ko aziyamamariza kuyobora manda ya gatatu.

Icyegeranyo giheruka gukorwa n’Umuryango w’Abibumbye cyagaragaje ko abantu 430 bishwe, abarenga 300,000 bakaba barahunze igihugu.

U Burundi bwakomeje gutera utwatsi ibyegeranyo byakozwe n’Umuryango w’Abibumbye, buvuga ko byakozwe hirengagijwe ibitangazwa na Leta ahubwo ko bahaye agaciro abatavuga rumwe n’ubutegetsi gusa.

Nyuma y’u Burundi, Afurika y’Epfo nayo yagaragaje icyifuzo cyayo cyo gutangira urugendo rwo kwitandukanya na ICC.

Iki gihugu cyakunze kwijundika uru rukiko, umubano hagati y’impande zombi waje kuzamba muri Kamena 2015 ubwo cyangaga guta muri yombi Perezida wa Sudani Omar el-Béchir, ushinjwa na ICC ibyaha byibasiye inyokomuntu, iby’intambara na Jenoside mu Ntara ya Darfour, ubwo yari yitabiriye inama y’Umuryango wa Afurika Yunze Ubumwe.

Kuri uyu wa Kabiri, tarikli ya 25 Ukwakira 2016, nibwo Guverinoma ya Gambia nayo yatangaje ko yivanye mu bihugu birebwa n’ Urukiko Mpuzamahanga Mpanabyaha(ICC) rushyirwaho n’amasezerano ya Roma.

Impamvu igihugu cyagendeyeho cyivana muri ayo masezerano ni uko uru rukiko rutita ku byaha by’intambara bikorwa n’ibihugu by’i Burayi ahubwo rugakurikirana Abanyafurika gusa.

Perezida wa Gambia, Yahya Jammeh, yahamagariye urwo rukiko gukora iperereza ku mfu z’Abanyafurika b’abimukira bakomeje gupfira mu Nyanja ya Méditerranée.

Nyuma y’u Burundi, Afurika y’Epfo na Gambia, ibindi bihugu bya Afurika nabyo bishobora kwikura muri uru rukiko

Bamwe mu bakuru b’ibihugu bya Afurika banenga ICC gukurikirana Abanyafurika gusa. Mu kwezi kwa Kamena umunye-Congo, Jean Pierre Bemba yahamijwe ibyaha by’intambara n’ibyibasiye inyokomuntu, Ahmad al-Faqi al-Mahdi wo muri Mali na we yakatiwe gufungwa imyaka icyenda muri Nzeri 2016, ashinjwa gusenya ingoro y’Amateka yo muri icyo gihugu.

Sudani

Perezida Omar al- Bashir wa Sudani nawe akurikiranwe na ICC . Uru rukiko rwamushyiriyeho impapuro zo kumuta muri yombi muri 2009, bukaba bwari ubwa mbere rubikoze ku Mukuru w’Igihugu ukiri ku ntebe.

Kimwe n’abandi bakurikiranywe n’uru rukiko, Bashir ashinjwa kugira uruhare mu byaha by’intambara, ibyibasiye inyokomuntu n’ibya Jenoside mu gace ka Darfour. Ni intambara yatangiye muri Gashyantare 2003, ubwo umutwe wavugaga ko uharanira kubohora Sudani (SLM) n’undi wavugaga ko uharanira ubutabera n’uburinganire (JEM) byatangiye kurwanya Leta ya Sudani buyishinja gutoteza abaturage batavuga Icyarabu.

Bashir yateye utwatsi ibyo birego avuga ko ICC ari urukiko rwa Politiki. Ibihugu byo ku mugabane wa Afurika byatesheje agaciro iby’impapuro zo kumuta muri yombi bikomeza kumwakira mu bihugu byabo. Bashir yagiye muri Afurika y’Epfo mu nama y’Umuryango wa Afurika Yunze Ubumwe (AU) avayo nyamara urukiko rwarategekaga atabwa muri yombi.

Kenya

Uru rukiko kandi rwongeye kwibasira Perezida wa Kenya, Uhuru Kenyatta na Visi Perezida William Ruto. Rwatanze itegeko ryo guta muri yombi Abanya-Kenya batandatu mu mwaka wa 2010.

Abacamanza bo muri urwo rukiko bafashe icyemezo cyo gukuraho ibyo birego kuri Kenyatta na William Ruto muri Mata 2014, bavuga ko ababashinjaga batigeze batanga ibimenyetso bihamye. Mu nama ya 26 y’Umuryango wa Afurika y’Iburasirazuba yabaye ku wa 30 na 31 Mutarama 2016, Kenya yasabye ko ibihugu byo muri uwo muryango byatangira gutekereza inzira yo kuva muri ICC.

Uganda

Perezida wa Uganda, Yoweri Kaguta Museveni, ubwo yarahiriraga kuyobora Uganda manda ya gatanu ku wa 12 Gicurasi 2016, yavuze ko ICC ari urukiko rukoreshwa n’abanyapolitiki bo mu bihugu byo mu Burengerazuba bw’Isi ngo bagenzure aba Afurika. Amagambo ya Museveni yatumye abashyitsi bari baturutse mu Muryango w’Ubumwe by’Ibihugu by’i Burayi na Leta Zunze Ubumwe za Amerika bahaguruka bava muri ibyo birori.

Afurika iramutse yikuye mu Rukiko Mpuzamahanga Mpanabyaha rw’i Hague mu Buholandi, byatuma rutakaza ibihugu 34 mu 124 byashyize umukono kuri ayo masezerano.

Visi Perezida wa Kenya, William Ruto
Perezida wa Sudani, Omar al- Bashir
Perezida w'u Burundi, Pierre Nkurunziza yabimburiye abandi kuva muri ICC
Perezida wa Uganda, Yoweri Museveni, yavuze ko ICC ari urukiko rukoreshwa n'Abanyapolitiki bo hanze ya Afurika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved