00:00:00 IGIHE NETWORK KN KINYARWANDA EN ENGLISH FR FRANCAIS

Museveni yatangaje abihishe inyuma y’igitero cyahitanye umuntu umwe muri bus

Yanditswe na Muhonzire Sylvine
Kuya 26 Ukwakira 2021 saa 03:05
Yasuwe :
0 0

Perezida Yoweri Museveni wa Uganda yatangaje ko abihishe inyuma y’igitero cyabaye kuwa Mbere tariki 25 Ukwakira, ari umutwe w’inyeshyamba wa ADF (Allied Democratic Forces) ukomoka muri Uganda ariko unakorera mu Burasirazuba bwa Repubulika Iharanira Demokarasi ya Congo.

Iki gitero cyabereye ahitwa Lungala mu Karere ka Mpigi, aho igisasu cyaturikiye muri bus yari ivuye i Kampala igiye ahitwa Ishaka mu Burengerazuba bwa Uganda ahagana saa kumi n’imwe z’umugoroba gihitana umuntu umwe undi arakomereka.

Museveni abinyujije ku rukuta rwa Twitter yatangaje ko uwo muntu wahitanywe n’icyo gisasu ari umwe mu bakora ibikorwa by’iterabwoba witwa Muzafala ariko wiyitaga Isaac Matovu.

Uyu Muzafala ngo yari umwe mu bagize agatsiko ko mu gace ka Pader koherejwe na ADF kugira ngo gaturitse abantu bari bagiye mu kiriyo cy’uwari Umuyobozi wa Polisi muri Uganda, Maj. Gen Paul Lokech uherutse gupfa urupfu rutunguranye aguye mu rugo rwe muri Kanama 2021.

Museveni yakomeje ati “Ikitaramenyakana neza ni uko Muzafala yaba yariturikirijeho igisasu abishaka cyangwa se cyaba cyaraturitse ku bw’impanuka ubwo yari agitwaye. Gusa yari akurikiwe na CMI.

Yavuze ko bamwe mu bagize ako gatsiko bafashwe bagafungwa, abandi babiri bakicwa na CMI bashaka kunaniza inzego z’umutekano, aho yasobanuye ko n’abandi bakidegembya muri Uganda bari guhigwa bukware kandi bazafatwa, aboneraho no kwihanganisha abakomerekejwe n’icyo gisasu.

Iki gisasu cyaturitse mu gihe hari hashize umunsi umwe gusa mu Mujyi wa Kampala ahitwa Komamboga naho haturikiye ikindi gisasu cyahitanye umuntu umwe abandi barindwi bagakomereka. Ibintu umutwe wa Islamic State wigambye ko ari wo wabikoze.

Umutwe wa ADF umaze igihe wohereza udutsiko guhungabanya umutekano w’ibihugu byo mu Karere ka Afurika y’Iburasirazuba, aho mu ntangiriro za Ukwakira Polisi y’u Rwanda yafatiye mu cyuho agatsiko k’abantu 13 bateguraga gukora ibikorwa by’iterabwoba i Kigali, agatsiko kari gashamikiye kuri ADF ikorana na ISIS mu icengezamatwara, ubuhezanguni n’uburyo bwo guturitsa ibisasu.

Perezida Museveni yavuze ko agatsiko gashingiye kuri ADF ariko kihishe inyuma y'igitero cyahitanye umuntu umwe muri bus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .