Tanzania: Perezida Magufuli yazanye inkunga ya Museveni mu gikapu ayihera Minisitiri w’Intebe

Yanditswe na Uwishyaka Jean Louis
Kuya 18 Nzeri 2016 saa 08:28
Yasuwe :
0 0

Perezida wa Uganda, Yoweri Kaguta Museveni yahaye impano y’amashilingi akoreshwa muri Uganda miliyoni 440 ni ukuvuga ibihumbi Magana abiri by’amadolari ya Amerika ($200,000) Tanzania mu rwego rwo gufata mu mugongo iki gihugu giherutse kwibasirwa n’umutingito wahitanye abantu 19 ukanangiza byinshi.

Ayo mafaranga yakiriwe na Perezida John Pombe Magufuli ku wa gatandatu taliki ya 17 Nzeri 2016, ndetse nawe ayashyikiriza mu ntoki Minisitiri w’Intebe w’iki gihugu ahita anagezwaho raporo ivuga ku mutingito n’ibyo wangije.

Itangazo ryavuye muri Perezidansi ya Tanzania rivuga ko Perezida Magufuli yanejejwe n’iyi mpano kubera ko hakenewe ubufasha bwinshi bwo gutabara abahuye n’iki cyiza cy’umutingito wari ku kigero cya 5.7.

Leta ya Tanzania kandi yanakiriye inkunga y’amashilingi yo muri Kenya miliyoni 115 yatanzwe na Perezida Uhuru Kenyatta nayo aje gufasha gusana ibyangijwe n’uwo mutingito wabaye ku wa gatandatu ushize tariki ya 10 Nzeri 2016.

Raporo ya Minisitiri w’Intebe wa Tanzania, Kassim Majaliwa yahaye Perezida Magufuli ivuga ko umutingito wahitanye abantu 19, ukomeretsa abandi 300. Inzu 2063 zarasenyutse burundu, izindi 14,081 zirangirika bikomeye naho 9471 zikeneye gusanwa kugira zongere guturwamo. Iyi raporo kandi ivuga ko muri rusange abantu 126,315 ari bo bakeneye ubufasha butandukanye.

Icyakora Minisitiri Majaliwa yabwiye Perezida Magufuli ko ibikorwa by’ubufasha byatangiye aho ngo ubu hari abamaze guhabwa ibiribwa, ubuvuzi ndetse ngo hari n’ababaye bahawe amahema yo kubamo mu gihe batarabonerwa inzu.

Minisitiri Majaliwa yanavuze ko guverinoma imaze gukusanya inkunga ingana na miliyari 3.6 z’amashilingi yatanzwe n’ibigo n’imishinga itandukanye yose azafasha abahuye n’umutingito.

Mu ijambo yavuze amaze guhabwa iyi raporo ku mutingito, Perezida John Pombe Magufuli yashimiye ibigo n’abandi baterankunga bakomeje gufasha abahuye n’ibi bibazo.

By’umwihariko, Perezida Pombe yashimiye bagenzi be barimo Museveni wa Uganda, Kenyatta wa Kenya na Paul Kagame w’u Rwanda ku bw’uko kumwihanganisha no kumufasha ndetse n’abanya-Tanzania muri rusange.

Icyakora Perezida Magufuli yasabye inzego zose bireba zo mu gihugu kugenzura no guhagarika uwo ari we wese washaka kwitwaza ibiza byabaye ku nyungu ze bwite.

Ibi yabitangaje mu gihe Leta ikomeje gusubiza ibintu ku murongo yubaka amashuri, amavuriro ndetse n’imihanda byose byangijwe n’uyu mutingito. Gusa yibukije ko nubwo Leta yatangiye ibikorwa byo gufasha, abantu ngo bakwiye gutangira gushaka uko nabo bakwirwanaho ubwabo.

Perezida Magufuli ashyikiriza Minisitiri w'Intebe inkunga yatanzwe na Perezida Museveni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244