Museveni na RNC bakomeje kwisanga mu gisebo

Yanditswe na Albert Rudatsimburwa
Kuya 22 Kamena 2019 saa 07:16
Yasuwe :
0 0

Hari ibimenyetso bifatika byerekana ko umugambi wa Uganda na RNC, wo guhungabanya u Rwanda, urimo gupfuba mu buryo buteye ikimwaro. Mu mwaka umwe ushize, ni bake bashoboraga kwibwira ko byarangira uri ku isonga ry’uyu mugambi, Kayumba Nyamwasa, atsinzwe biteye ipfunwe, agasaba ibiganiro.

Ni uguhindura umuvuno kwigaragaje mu mutwe w’inkuru y’ikinyamakuru cyo muri Uganda, Daily Monitor cyo kuwa 20 Kamena 2019, ugira uti “Utavuga rumwe n’ubutegetsi bw’u Rwanda uri mu buhungiro arashaka ibiganiro na Perezida Kagame”.

Inzobere muri politiki n’imibanire mpuzamahanga zigomba kubaza ikibazo, ni iki mu by’ukuri gitumye habaho izi mpinduka, ni iki ahazaza hasobanuye ku kwihuza kubisha kwa RNC na Museveni? Museveni yaba yaravumbuye ko ubufatanye n’umutwe w’iterabwoba ari politiki mbi? Igisubizo kirasobanutse ni Oya.

Impinduka zigaragara muri uyu mugambi zisobanurwa cyane n’ibyago biri muri ubu bufatanye. Museveni yagerageje buri kintu cyose yashoboraga akoresheje amayeri atandukanye mu guhungabanya u Rwanda ariko icyavuyemo gikomeje kumutungura; biraboneka ko ubu agomba kwibaza niba ubufasha aha imitwe igamije guhungabanya u Rwanda atari igihombo agomba kwitandukanya nacyo.

Ubufasha bwa Museveni bwakomeje kwaguka, yahaye RNC urubuga rwo gushakiramo abayoboke, ababashaka bahawe rugari baridegembya bazenguruka muri Uganda bashaka ubufasha. Bahawe uburenganzira bwo gutera ubwoba abanyarwanda ngo bajye muri uyu mutwe w’iterabwoba, bahawe kandi uburenganzira bwo gufunga no gutoteza abanyarwanda banze kujya muri uyu mutwe cyangwa kuwutera inkunga.

Urwego rw’Ubutasi rwa Uganda (CMI), n’Urushinzwe Umutekano w’Imbere mu gihugu, ISO, barimo kandi gukora uko bashoboye ngo bashyire mu bikorwa amabwiriza ya Museveni atanga.

Aba kandi bafashije abayobozi bakuru ba RNC gusura Uganda bajya gusuzuma ibimaze gukorwa n’abakozi babo. Muri Nzeri 2018 Benjamin Rutabana ushinzwe kubaka ubushobozi muri RNC, yagiye muri iki gihugu atembera ahantu hose hatorezwa abajya muri uyu mutwe harimo nka Wakiso, Mubende, Kiboga, na Nyakivara. ISO yamuhaye uburinzi bwose na bamwe mu bayobozi ba Uganda batigeze bahabwa.

Tribert Rujugiro, umuterankunga ukomeye wa RNC yatangiye gufatanya na murumuna wa Museveni, Salim Saleh gushinga ubucuruzi muri Uganda, ibivuyemo bikajya gufasha ibikorwa bya RNC. Mu gihe icyo aricyo cyose Rujugiro agereye ku kibuga cy’indege cya Entebbe kandi ahasanga abashinzwe kurinda Perezida Museveni bo mu mutwe uzwi nka, Museveni’s Special Force Command (SFC), biteguye kumutwara ngo ahure na Museveni, nk’uko ubwe (Museveni) yabyiyemereye mu rwandiko yandikiye Perezida Paul Kagame mu Werurwe uyu mwaka.

Hari kandi Frank Ntwali, uba muri Afurika y’Epfo akaba akunze kuza Kampala ku butumwa bwa Kayumba, nawe ahabwa uburinzi bw’icyubahiro.

Bamwe mu bayobozi bo hejuru muri FDLR nka LaForge Bazeye na Lt Col Theophile Abega bafashwe n’inzego za Repubulika Iharanira Demokarasi ya Congo ku mupaka wa Bunagana bavuye mu nama i Kampala mu mwaka ushize yabaye tariki 13-14 Nzeri, bemeje ko urugendo rwabo muri Uganda rwari ku bw’ubutumire bwa Minisitiri ushinzwe imibanire y’Akarere, Philomen Mateke na Frank Ntwali wari uhagarariye RNC, muri iyo nama.

Eugene Gasana na Charlotte Mukankusi ni bamwe muri aba bayobozi bafashwa muri ubu buryo, ubwo bajyaga muri Uganda mu nama yabahuje na Museveni muri Werurwe uyu mwaka (uyu muhuro Museveni yawemereye Perezida Kagame mu ibaruwa), ubwo bajyaga muri bagendeye kuri pasiporo za Uganda, basaba ubufasha bw’umutwe w’iterabwoba, amakuru aturuka ahizewe akaba avuga ko ‘Museveni yababwiye ngo ‘Turi kumwe’.

Nubwo bimeze gutya, ibyago kuri bo bizakomeza kubaho, mu mezi abiri gusa ashize muri Gicurasi 2019, uwari umuvugizi wa FLN, umutwe witwaje intwaro w’ihuriro MRCD uyoborwa na Paul Rusesabagina, yatawe muri yombi kandi aza kwemeza ko yagiye ahura n’abayobozi bakomeye mu butegetsi bwa Uganda, kandi ko ubwo yatabwaga muri yombi inama yagombaga kumuhuza na Abel Kandiho umuyobozi mukuru wa CMI wari waremeye guha ubufasha ingabo ze, inama ikaba yarahise isubikwa.

MRCD ni umwe mu mutwe wa P5, ihuriro ry’abarwanyi ba RNC baherereye muri Congo, umuyobozi wabo ni Kayumba Nyamwasa. Raporo yasohotse tariki 31 Ukuboza 208 y’impuguke za Loni kuri Congo, yemeje ko iyi mitwe yavuzwe haruguru ikomeje gushaka abarwanyi, ikaba kandi ibona ubufasha bw’u Burundi.

Amakuru yizewe avuga ko “Turi kumwe’ ya Museveni idahagije. Amakuru yizewe avuga ko mu buryo bwa gisirikare, umubare abakomerekera ku rugamba ku ruhande rwa RNC muri Congo ukomeje kuzamuka. Benshi barishwe abandi bafatwa bunyago, aya makuru yongeraho ko abashidikanya bazahabwa ibimenyetso simusiga.

Mu yandi magambo, ubufatanye bwa Kaguta na RNC burimo gutsindwa mu buryo budasanzwe, nubwo hari ubufasha bwagiye butangwa kuri RNC.

Ku bw’ibyo hari hakenewe ubufasha bwakura Museveni mu kimwaro yiteje, ari nabwo yifashishije Daily Monitor mu gukwirakwiza igitekerezo kivuga ko umutwe w’iterabwoba bafatanyije ugomba kugirana ibiganiro na guverinoma y’u Rwanda.

Gusa ibingibi bitera kwibaza: Ntibyaba byiza Museveni ndetse n’abayobozi b’imitwe irwanya Guverinoma y’u Rwanda, bagiranye ibiganiro ku buryo bakwikura mu bibazo bari kwisangamo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza