Mu 2018, Ibiro bya Joseph Kabila byakoresheje ingengo y’imari ikubye gatanu iyo byari byemerewe

Yanditswe na Ferdinand Maniraguha
Kuya 25 Ugushyingo 2019 saa 09:01
Yasuwe :
0 0

Umugenzuzi Mukuru w’Imari ya Leta muri Repubulika Iharanira Demokarasi ya Congo yagaragaje ko umwaka ushize wa 2018 ubwo igihugu cyari kiyobowe na Joseph Kabila, ibiro bye byakoresheje amafaranga yikubye inshuro eshanu ayo byari bigenewe, bituma hari Minisiteri n’imishinga by’ingenzi bibura amafaranga yo gukoresha.

Mu igenzura ryakozwe n’Umugenzuzi w’Imari riherutse kugezwa ku Nteko Ishinga Amategeko mu Ugushyingo 2019, ryagaragaje ko ku buyobozi bwa Kabila habayeho imikoreshereze mibi y’amafaranga ya Leta.

Iyo raporo y’Umugenzuzi Mukuru igaragaza ko inzego zirimo Perezidansi ya Joseph Kabila n’Ibiro bya Minisitiri w’Intebe byari biyobowe na Bruno Tshibala aribyo bya mbere byakoresheje nabi amafaranga ya Leta mu bigo byose byagenzuwe.

Jeune Afrique dukesha iyi nkuru ivuga ko ubusanzwe Perezidansi yari yagenewe miliyoni 63 z’amadolari yo gukoresha, nyamara yakoresheje miliyoni 302 z’amadolari, ni ukuvuga inshuro eshanu z’ayo yari yemerewe.

Mu byatumye ayo mafaranga yiyongera, harimo amafaranga yo gukoresha mu bikorwa bitandukanye yagombaga kuba miliyoni 28 z’amadolari ariko hakoreshejwe miliyoni 256 z’amadolari.

Ibiro bya Minisitiri w’Intebe byagombaga gukoresha miliyoni 23 z’amadolari ariko Umugenzuzi w’Imari ya Leta yagaragaje ko hakoreshejwe miliyoni 40 z’amadolari. Naho amafaranga yo kwifashisha mu bikorwa bitandukanye niyo yabaye menshi kuko bari bemerewe miliyoni 10 z’amadolari ariko yarazamutse agera kuri miliyoni 18 z’amadolari.

No mu Nteko Ishinga Amategeko umugenzuzi w’imari ya Leta agaragaza ko hakoreshejwe amafaranga menshi. Nko mu badepite bakoresheje amafaranga ari ku kigero cya 133% by’ayo bari bemerewe naho sena ikoresha ari ku kigero cya 116 % by’ayo yari yemerewe.

Mu gusoza raporo, Umugenzuzi Mukuru w’Imari ya Leta agaragaza ko uko gukoresha amafaranga uko bishakiye byahombeje igihugu kuko hari ibindi bikorwa by’iterambere byakabaye byarakozwe. Byatumye kandi hari Minisiteri n’imishinga ifitiye akamaro abaturage idakorwa kuko amafaranga byari bigenewe yagiye ahandi.

Umugenzuzi Mukuru agaragaza ko hari imishinga 1173 itarashyizwe mu bikorwa uko bikwiriye yasabaga miliyoni 635 z’amadolari. Yavuze ko 66 % by’imishinga yari yateguwe uwo mwaka ari yo yashyizwe mu bikorwa neza.

Raporo isoza isaba abagize Inteko Ishinga Amategeko gusesengura bagafatira ibihano abo bizagaragaraho ko bagize uruhare mu ikoreshwa nabi ry’ayo mafaranga.

Mu igenzura ryakozwe n’Umugenzuzi w’Imari riherutse kugezwa ku Nteko Ishinga Amategeko mu Ugushyingo 2019, ryagaragaje ko ku buyobozi bwa Kabila habayeho imikoreshereze mibi y’amafaranga ya Leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza