Moise Katumbi yasabye Congo gukura isomo ku ntsinzi ya Donald Trump

Yanditswe na Philbert Girinema
Kuya 10 Ugushyingo 2016 saa 04:38
Yasuwe :
0 0

Moise Katumbi, umwe mu batavuga rumwe n’ubutegetsi bwa Repubulika Iharanira Demokarasi ya congo uri mu buhungiro, yasabye ubutegetsi bwa Kabila kwigira ku ntsinzi benshi bise ko itunguranye ya Donald Trump watorewe kuba Perezida wa Leta Zunze Ubumwe za Amerika.

Hillary Clinton na Donald trump bamaze igihe mu rugamba rwo kwivuga imyato ndetse n’imigabo n’imigambi, bahatanira umwanya w’Umukuru w’Igihugu.

Gusa Donald Trump yegukanye intsinzi, nyuma y’aho yari amaze gutsinda muri Leta ya Pennsylvania akagira amajwi 274 kuri 215 ya Hillary bari bahanganye, ibyo bikaba bihagije ngo uwo munyemari w’umuherwe ayobore icyo gihugu cy’igihangange.

Uretse abakurikiranye ibikorwa byo kwiyamamaza kandi bakabisesengurana ubuhanga n’ubushishozi, abandi benshi ku Isi, bari bamaze kwemeza ko Hillary Clinton ari we uzaba Perezida wa Leta Zunze Ubumwe za Amerika uzasimbura Barack Obama.

Ibyo byaturukaga ku mbwirwaruhame za Donald Trump bari bahanganye, ariko amatora nyir’izina yashyize aragera, maze yerekana ibishya, benshi baratungurwa, ariko kandi abandi baboneraho gutanga ubutumwa.

Moise Katumbi na we uteganya guhatanira umwanya w’Umukuru w’Igihugu muri RDC niharamuka habaye amatora, yaboneyeho gusaba ubutegetsi buriho muri icyo gihugu, kwigira Demokarasi ku ntsinzi ya Donald Trump.

Abicishije ku rukuta rwe ku rubuga nkoranyambaga rwa Twitter, Moise Katumbi yagize ati “Mwakoze neza Banyamerika na Donald Trump ugomba kwerekeza mu ngoro y’Umukuru w’Igihugu (White House) kugira ngo yitegure impinduka. Ni isomo ryiza rya Demokarasi kuri RDC.”

Moise Katumbi ari mu buhungiro kuva muri Gicurasi uyu mwaka, aho yavuye muri RDC ajyanywe kwa muganga igitaraganya muri Afurika y’Epfo, akaba yaraje gutangaza ko yari agiye kwivuza uburozi yatewe mu rushinge, bikozwe n’umwe mu bashinzwe umutekano, ubwo abarwanashyaka be bigaragambyaga agiye kwitaba ubushinjacyaha i Lubumbashi.

Nubwo muri Gicurasi yitabaga ngo yisobanure ku byaha byo kwinjiza abacancuro mu gihugu, yaje gukatirwa n’urukiko adahari, nyuma yo kumuhamya icyaha cyo kugurisha umutungo (inzu) utari uwe, rukamuhanisha igifungo cy’imyaka itatu.

Icyo gihano n’ubwo yakijuririye abicishije ku bamuburanira, mu gihe urubanza rwa mbere rutarakurwaho, ntirumwemerera kwiyamamariza umwanya w’umukuru w’igihugu, biteganyijwe ko uzahatanirwa mu matora azaba muri Mata 2018.

Katumbi nawe arashaka kuzaba Perezida wa Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244