Kwamamaza

Misiri: Hagiye kubakwa umujyi w’akataraboneka uzasimbura Cairo (Amafoto)

Yanditswe kuya 28-11-2016 saa 11:39' na Nsengimana Evariste


Misiri igiye gutangira kubaka Umujyi mushya uzasimbura Cairo nyuma y’uko sosiyete ebyiri zikora ibijyanye n’ubwubatsi z’Abashinwa zemeye gutera inkunga uyu mushinga.

Uyu mujyi utaratangazwa izina, uzimurirwamo ubutegetsi, uzaba uri ku butaka bungana na kilometero kare 700 uzubakwa mu butayu buherereye mu Burasirazuba wa Cairo.

Ikompanyi ya China Fortune Land Development (CFLD) yemeye gutanga miliyari 20 z’amadorali ya Amerika, zo kubaka uyu mujyi, nyuma y’inama yahuje abayobozi bakuru bayo na Perezida wa Misiri, Abdel Fattah El Sisi.

Ibi kandi byaje bikurikira indi nkunga yatanzwe n’indi Kompanyi ya Leta mu Bushinwa byatumye ingengo y’imari izakoreshwa mu kubaka igice cya mbere muri uyu mushinga ingana na miliyari 45 z’amadorali ya Amerika.

Igishushanyo mbonera cy’uyu mujyi cyamurikiwe abashoramari mu gikorwa cyo gusoza inama y’ihuriro ryiga ku iterambere rya Misiri, Egypt Economic Development Conference (EEDC) yabereye Sharm el-Sheikh, mu gace ka Sinai mu Majyepfo y’igihugu, kuya 28 Werurwe 2015.

Ubwo uyu mushinga watangizwaga ku mugaragaro, Minisitiri ushinzwe imiturire n’Iterambere ry’icyaro mu Misiri, Mostafa Madbouly, yatangaje ko ari igikorwa cyiza kandi cyo kwishimira ku bakiri bato.

Abayobozi mu nzego za Leta bemeza ko umujyi mushya uzafasha mu gukemura ikibazo cy’ubucucike bw’abantu, kwangirika kw’ikirere ndetse n’ibiciro bihanitse by’inzu mu Murwa Mukuru Cairo.

Uyu mujyi mushya ngo uzafasha mu kubona ahantu ho kuba, gukorera no gutemberera mu buryo bwisumbuyeho.

Uyu mushinga uzatwara imyaka irindwi ngo uba warangiye, watangijwe hagamijwe gukemura ikibazo cy’ubushyuhe ndetse n’ubwinshi bw’abantu babarizwa muri Cairo, imaze imyaka 1000 ari Umurwa Mukuru wa Misiri.

Mu gice cya mbere cyawo hazibandwa mu kwagura inkengero z’Umurwa Mukuru uhereye mu Burasirazuba, bwa Cairo ahazubakwa ibirometero 105.

Uyu mujyi uzaba ugizwe n’agace kazubakwamo inyubako za guverinoma, iz’abahagarariye ibihugu byabo mu Misiri, izishobora kwakira inama zirimo abantu barenga miliyoni eshanu, imisigiti irenga 1000, imidugudu y’icyitegererezo, kaminuza, uduce tw’inganda, ndetse na ’parking’ izaba iri mu za mbere nini ku Isi.

Ibikorwa byo kubaka byamaze gutangira nk’uko bitangazwa n’ikinyamakuru cyo mu Misiri Al-Ahram. Abenjeniyeri batangiye kubaka ibikorwa remezo birimo ibiraro ndetse n’umuhanda ufite uburebure bwa kirometero 210.

Cairo yubatswe muri 969 nyuma y’urupfu rwa Yesu Kirisitu, mu gihe umujyi ugiye kubakwa watekerejwe mu 2015.

Mu kinyejana gishize, ibihugu bitandukanye byahinduye imijyi nka Brasilia muri Brazil, yubatswe mu 1960, Canberra muri Australia, yo muri 1913 na Astana, yabaye umujyi w’ubuyobozi wa Kazakhstan mu 1997.

Igishushanyombonera cy'umujyi mushya uzasimbura umurwa mukuru wa Misiri
Uyu mujyi watekerejwe hagamijwe kugabanya ubucucike muri Cairo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved