Misiri: Abimukira basaga 200 barohamye, 42 barapfa

Yanditswe na Ishimwe Israel
Kuya 23 Nzeri 2016 saa 07:28
Yasuwe :
0 0

Abimukira 42 baguye mu mpanuka y’ubwato bwarohamye mu Nyanja nini ya Méditerranée hafi y’inkombe za Misiri ubwo berekezaga ku mugabane w’ i Burayi, abagera ku 163 bamaze kurohorwa ari bazima, mu gihe ibikorwa byo gushaka abandi bikomeje.

Ubu bwato bwarohamye mu rukerera rwo kuwa Gatatu, tariki 21 Nzeri bugeze hafi y’ahitwa Rosette, mu gace gashyira Amajyaruguru ya Misiri nkuko byatangajwe n’Umuvugizi wa Minisiteri y’Ubuzima mu Misiri, Khaled Megahed.

Yavuze ko abapfuye bageze kuri 42, mbere bari babonye 10 bakomeza ubutabazi babona 30, ingabo zikaba zemeje ko zatabaye abagera ku 163 bavuyemo ari bazima.

Jeune Afrique dukesha iyi nkuru yatangaje ko Ahmed Mohamed w’imyaka 27, umwe mu barohowe yavuze ko bari ku nkombe ari abantu nka 450, bahagurutse ahagana saa munani z’igicuku, nyuma ubwato burarohama, abazi koga baroga, abagabo bata abagore n’abana babo bakiza amagara.

Abapfuye barimo abanya-Misiri, Sudani ndetse n’abaturutse mu bihugu bitandukanye bya Afurika batabashije kumenyekana inkomoko. Imodoka z’imbangukiragutabara 15 zahise zoherezwa ahabereye impanuka ngo zihutire gutabara.

Minisitiri w’Intebe, Chérif Ismaïl yahamagariye abaganga bo mu gihugu cye gufasha abarohowe kubona ubuvuzi bushoboka bwose, ndetse no gukurikirana abari batwaye ubwo bwato.

Kuva mu mezi yashize umubare munini w’amato y’abarobyi yagiye arohama muri iyo Nyanja cyane.

Muri uyu mwaka abantu basaga igihumbi bafashwe batwawe n’ubwato bushaka kubajyana mu Butaliyani baciye ku nkengero za Misiri.

Abimukira bayobotse iyo nzira nyuma y’ifungwa ry’inzira yabavanaga muri Afurika bakajya kwambukira ku gice cya Libye bagana mu Butaliyani.

Abimukira n’impunzi basaga ibihumbi 300 bambutse inyanja ya Méditerranée bagana i Burayi, cyane mu Butaliyani.

Mu mezi icyenda ya 2015 abo bantu bageze ku bihumbi 520, mu gihe muri 2014 ari ibihumbi bisaga 216.

Ibikorwa by'ubutabazi byari birimbanyije ku cyambu cya Rashid
Bamwe mu barokotse iyi mpanuka mbere yo kujyanwa mu bitaro
Abimukira barokotse impanuka bashakaga kujya ku mugabane w'i Burayi
Abarohowe bajyanywe mu bitaro bya Rashid
Ibikorwa by'ubutabazi birakomeje, mu gihe hari abategereje kumenya irengero ry'ababo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244