Mazutu mbi itemewe gucururizwa i Burayi yoherezwa muri Afurika

Yanditswe na Uwishyaka Jean Louis
Kuya 16 Nzeri 2016 saa 08:15
Yasuwe :
0 0

Icyegeranyo gishya cy’Umuryango utegamiye kuri leta wo mu Busuwisi, Public Eye, kiravuga ko hari ibigo by’ubucuruzi mu Busuwisi bicuruza muri Afurika mazutu ihumanye cyane ku buryo idashobora gucuruzwa mu Burayi.

Icyo cyegeranyo gifite umutwe ugira uti "Mazutu y’umwanda", kivuga ko abacuruzi bagendera ku mategeko ajenjetse bakunguka mu bucuruzi bwa mazutu itujuje ubuziranenge icuruzwa ku baguzi b’Abanyafurika.

Muri icyo cyegeranyo, Umuryango Public Eye uvuga ko wakoze ubushakashatsi kuri mazutu yagurishijwe muri Angola, Benin, Congo Brazzaville, Ghana, Cote d’Ivoire, Mali na Zambia.

Ibipimo byafashwe mu bihugu umunani bitandukanye bya Afurika kuri amwe mu mavuta ya mazutu, byerekanye ko urugero rwa sulphur (gaz) iri muri aya mavuta rukubye inshuro zirenga 300 urwemerwa mu bihugu by’u Burayi.

Ngo umwuka uturuka muri iyo mazutu ihumanye ushobora gutuma habaho ubwiyongere bw’indwara z’ubuhumekero nka Asima n’izindi.

Iki cyegeranyo gishinja ibigo bine byo mu Busuwisi bya Vitol,Trafigura, Addax and Oryx na Lynx Energy kungukira muri ubu bucuruzi nk’ibinyamigabane mu bigo bikwirakwiza ibi bicuruzwa.

BBC dukesha iyi nkuru itangaza ko ibigo bya Trafigura na Vitol byavuze ko iki cyegeranyo gikoze nabi kuko byo ngo bikorana n’ibigo by’ubucuruzi byitwararika ku mategeko yo mu bihugu byabyo.

Umuryango Public Eye uhamagarira ibihugu byo ku mugabane wa Afurika gushyiraho amabwiriza agenga imimerere ya mazutu ahuye n’ayo ku mugabane w’u Burayi, kikavuga ko ari bwo buryo bwiza bwo kurwanya mazutu ifite ingaruka ku kiremwamuntu.

Akenshi ngo impamvu itera ibihugu bya Afurika gukoresha mazutu yanduye, ngo ni uko biba bifite ubwoba bw’uko mazutu nzima ihenze cyane bityo ngo bikumva ko bitapfa kuyigondera.

Umuryango Public Eye washinzwe mu mwaka wa 1968 ukaba ufite intego yo kugenzura ibyo u Busuwisi n’amakompanyi yabwo bikorera ibihugu biri mu nzira y’amajyambere.

Ibyotsi bisohorwa n'ibinyabiziga byanyoye mazutu mbi ngo bitera indwara zikomeye

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza