Kwamamaza

Loni yemeje gushyiraho komisiyo yo gukora iperereza ku bibera mu Burundi

Yanditswe kuya 1-10-2016 saa 09:21' na IGIHE


Ishami ry’Umuryango w’Abibumbye rirengera Uburenganzira bw’Ikiremwamuntu ryashyizeho Komisiyo izakora iperereza ryimbitse ku bagize uruhare mu bwicanyi ndetse n’iyicarubozo bikorerwa abaturage mu Burundi.

Umwanzuro ushyiraho iyi Komisiyo watowe kuri uyu wa Gatanu, tariki ya 30 Nzeri, yahawe umwaka wo gukurikirana abagize uruhare mu mvururu zimaze guhitana abasaga 500 kuva muri Mata 2015.

Iki cyemezo gifashwe nyuma y’icyumweru kimwe, akanama kigenga gashinzwe iperereza muri Loni gasohoye raporo ishinja Leta y’u Burundi kugira uruhare mu bikorwa bihonyora uburenganzira bwa muntu mu gihugu.

Muri iyi raporo, izi nzobere zagaragaraje ko Leta ikora ibyaha byibasira inyokomuntu bishobora no kubyara intambara ikorerwa abasivili.

Ishami rya Loni ryafashe icyemezo cyo gushyira mu bikorwa uyu mwanzuro wafashwe n’Umuryango w’Ubumwe bw’i Burayi, watowe n’ibihugu 19, birindwi birimo u Burusiya n’u Bushinwa biwutera utwatsi, mu gihe 21 byiganjemo ibibarizwa ku mugabane wa Afurika byifashe. Iyi Komisiyo igizwe n’ibihugu 47 by’ibinyamuryango birimo n’u Burundi.

Umuyobozi uhararariye Umuryango w’Ubumwe bw’Uburayi, ndetse n’indi miryango Mpuzamahanga muri Loni, Peter Sorensen abinyujije kuri Twitter yatangaje yishimiye ko icyemezo cya EU mu kugarura umutekano mu Burundi cyahawe agaciro.

Yagize ati “ Turasaba u Burundi gukorana na Komisiyo y’Uburenganzira bwa muntu ndetse no gushyigikira ingamba zashyizweho mu kugarura amahoro mu gihugu.”

Nyuma y’amatora, u Burundi bwahise butera utwatsi iki cyemezo, buvuga ko igihugu cyashyizeho Komisiyo iri gukora iperereza no gukurikirana abagize uruhare mu mvururu kugira ngo bagezwe mu butabera.

Umuvugizi wa Leta y’u Burundi, Willy Nyamitwe yatangarije RFI dukesha iyi nkuru ko bahatiwe kwemera uyu mwanzuro ndetse bashobora kuwanga.

Yagize ati “ U Burundi bufite uburenganzira bwo kwanga uyu mwanzuro wo kohereza abakora iperereza ku butaka bwacu kandi tubona badafite ubushobozi bwo kugarura amahoro mu gihugu, ahubwo bakorera ku zindi nyungu, bashobora guhungabanya ubusugire bw’igihugu.

Leta y’u Burundi itangaza ko abapolisi basaga 150 bagejejwe imbere y’ubutabera, 59 barafungwa, 37 birukanwa ku mirimo yabo kuva muri Mata 2015, mu gihe cy’imyigaragambyo yamaganaga manda ya gatatu ya Perezida Pierre Nkurunziza yaje no gutorerwa mu matora yabaye muri Nyakanga 2015.

Ishami ry’Umuryango w’Abibumbye ryita ku mpunzi, UNHCR ritangaza ko umubare w’Abarundi bakomeje guhungira mu bihugu by’ibituranyi kubera ubugizi bwa nabi, ubwicanyi bunyuranyije n’amategeko, iyicaruboza, n’ishimutwa umaze kugera ku bihumbi 300, mu gihe abasaga 500 bamaze kuhasiga ubuzima.

Imvururu zatangiye muri Mata 2015 mu Burundi zimaze kugwamo abantu barenga 500, mu gihe ibihumbi 300 bahunze igihugu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved