Libya: Uko abimukira b’Abanyafurika bagurishwa mu cyamunara bakajyanwa mu bucakara

Yanditswe na Herve Ugirumukunda
Kuya 22 Ugushyingo 2017 saa 08:51
Yasuwe :
0 0

Abimukira baturutse mu bihugu bya Afurika yo munsi y’Ubutayu bwa Sahara bagurishwa buri munsi muri Libya; aho ubuzima bw’umuntu bugurwa hagati y’amadorali 300 na 800.

Ni ibintu bitari bimenyerewe, ubusanzwe havugwaga ababarirwa mu bihumbi barohama umusubirizo mu Nyanja ya Méditerranée bashaka ubuzima bwiza mu Burayi.

Ariko inkuru ya televiziyo CNN mu cyumweru gishize yatumye Isi ikanguka imenya ko no mu kinyejana cya 21 abirabura bagicuruzwa nk’abacakara.

Bagurishwa mu cyamunara nk’uko indi mitungo yose igurishwa, ukiyoboye aratangira ati “Aba ni abahungu b’ibigango bafite ingufu zo guhinga,” afashe umwe ku rutugu.

Ati “Magana inani, umuguzi umwe ati “900 undi 100… 1100….” Byarangira uyoboye icyamunara ati ‘aragurishijwe.’
CNN ivuga ko ayo mashusho adasa neza yafashwe na telefoni z’abanyamakuru bari bigize abaguzi mu cyamunara hafi y’Umurwa Mukuru, Tripoli mu kwezi gushize, babonye abantu basaga icumi bagurishwa mu gihe kitageze ku minota irindwi.

Ugurisha ati “Hari ukeneye umucukuzi? Uyu ni umucukuzi, umugabo munini w’ingufu, azacukura. Muratanga angahe?”

Abaguzi bazamura ibiganza ubundi ibiciro bigatangira kuzamuka “ 500, 550, 600…650..”

Ubuzima buhita buhinduka ku mwirabura wagurishijwe, agatangira kukabona akoreshwa uburetwa n’uwamuguze. Abamaze kugurwa baba bahungabanye ku buryo batanashobora kuvuga.

Buri mwaka abimukira bisuka ku mipaka ya Libya, igihugu kidacunzwe neza nyuma y’ihirikwa rya Muammar Gaddafi.

Baba bahunze intambara mu bihugu byabo abandi bahunze ubukene bashaka ubuzima bwiza mu Burayi.

Benshi muri bo basiga bagurishije ibyo bafite byose kugira ngo bishyure urugendo ruzabageza muri Libya ku nkombe za Méditerranée aho bahurira n’abakomisiyoneri babashyira mu bwato bushaje nk’imifuka bakabambutsa babageza hakurya ku butaka bumva nka ‘Paradizo’ u Burayi.

Ariko muri iyi minsi ishize, abashinzwe umutekano w’inkombe barakamejeje, nta mato ari gushobora kwambuka, abakomisiyoneri ntibagikora akazi kabo neza. Bahitamo kugurisha abimukira babagana, bagahinduka abacakara.

Ubuyobozi bwa Libya buvuga ko butazi aho ibyamunara bigurishirizwamo abacakara bibera, Naser Hazam uyoboye Ishami rya guverinoma rishinzwe kurwanya ubwimukira butemewe avuga ko abizi ariko akabura ibimenyetso.

Ibyamunara bibera mu mijyi isanzwe muri Libya yuzuyemo abantu, abana bakina mu mihanda abandi bajya ku kazi, ariko imbere hari abagizwe ibicuruzwa.

Ubuhamya bw’umwe warokotse ubucakara

Victory, ni umusore w’imyaka 21 ukomoka mu gace ka Edo muri Nigeria, hashize umwaka n’amezi ane avuye iwabo yitwaje amafaranga yose yari atunze, ashaka kujya mu Burayi.

Yageze muri Libya ari kumwe na mugenzi we bahunganye, amafaranga arabashirana, Victory agurishwa n’umwe muri ba rushimusi akajya yirirwa ahinga abwirwa ko amafaranga akorera azagabanya umwenda ababereyemo.

Hashize ibyumweru yabwiwe ko amafaranga yaguzwe adahagije asubizwa mu cyamunara aho yongeye kugurishwa izindi nshuro nyinshi.

Banatse ingwate umuryango we muri Nigeria ngo bamurekure. Ati “Natanze ama-naira asaga miliyoni (hafi miliyoni eshatu z’amanyarwanda) mama yazengurutse insisiro aguza amafaranga ngo ashobore gukiza ubuzima bwanjye.”

Kimwe n’abandi 8 800 yamaze gusiba mu mutwe ibyo kugera mu Burayi, yemera kugaruka muri Nigeria imbokoboko.

Ati “Sinashoboye kugera yo ariko nshima Imana ku bw’ababashije kugera yo, nzagaruka ntangirire kuri zeru nubwo bibabaje cyane bitavugwa.”

Ubu bucakara bwateje imyigaragambyo mu Bufaransa, aho abigaragambya basaba Leta ya Libya n’ibihugu bikize gufasha abimukira aya marorerwa agahagarara.

Bwanamaganwe kandi n’Umunyamabanga wa AU, Moussa Faki Mahamat n’uwa Loni, António Guterres, bavuga ko bagiye kubuhagurukira.

Umuryango Mpuzamahanga wita ku Bimukira, IOM, uvuga ko ubu muri Libya hari ababarirwa hagati ya 700 000 na miliyoni bashaka kujya mu Burayi mu gihe 2000 bapfuye barohamye mu nyanja muri uyu mwaka.

Aba bari batabawe bavanwe muri Méditerranée bagaruwe muri Libya
Bamwe mu bimukira bafungiye mu kigo Treek Alsika muri Tripoli bategerekje gusubizwa iwabo
Victory, ni umusore w’imyaka 21 ukomoka mu gace ka Edo muri Nigeria, hashize umwaka n’amezi ane avuye iwabo yitwaje amafaranga yose yari atunze, ashaka kujya mu Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza