Kwamamaza

Kofi Annan ashobora kuba umuhuza mu bibazo bya Congo

Yanditswe kuya 12-10-2016 saa 07:53' na Ntakirutimana Deus


Kofi Annan wahoze ari Umunyamabanga Mukuru wa Loni, aragarukwaho nk’ushobora kuzaba umuhuza mu biganiro bigamije amahoro muri Repubulika Iharanira Demukarasi ya Congo.

Annan aranugwanugwa mu guhuza Perezida Joseph Kabila n’abadashyigikiye ko yakomeza ‘kugundira ubutegetsi’ barimo Étienne Tshisekedi na Moïse Katumbi.

Izo nshingano zari zisanganywe Edem Kodjo, wari umuhuza mu biganiro byahuje leta n’abayirwanya, kuva tariki ya 1 Nzeri 2016, aho byari biteganyije kumara iminsi 15. Gusa ibi biganiro byatewe utwatsi n’abatavuga rumwe n’ubutegetsi barimo Étienne Tshisekedi na Moïse Katumbi ku buryo banze kubyitabira.

Abatavuga rumwe n’ubutegetsi batangaje ko Kodjo wahoze ari Minisitiri w’Intebe wa Togo, abogamiye ku ruhande rwa Kabila.

Uretse abatavuga rumwe n’ubutegetsi, Kiliziya Gatolika nayo yahagaritse kubyitabira, ivuga ko bidaciye mu mucyo.

Abatavuga rumwe n’ubutegetsi bifuje ko Kodjo yasimburwa kuri uwo mwanya. Ubu hagezweho Kofi Annan wahoze ari Umunyamabanga Mukuru wa Loni unifuzwa na Leta Zunze Ubumwe za Amerika n’abatavuga rumwe na Kabila, nkuko Jeune Afrique ibitangaza.

Senateri Léonard She Okitundu, yavuze ko nta mpamvu n’imwe abona yatuma Kodjo asimburwa kuri uwo mwanya kuko nta kigaragara abatavuga rumwe n’ubutegetsi bavuga cyatuma asimburwa.

Ibyo biganiro byari bigamije kurebera hamwe uko hanozwa ingengabihe y’amatora ya Perezida wa Repubulika ateganyijwe muri icyo gihugu n’uko yazagenda neza.

Uretse iby’ibi biganiro, biteganyijwe ko ku itariki ya 19 Ukwakira 2016, i Luanda muri Angola, ibibazo by’amatora muri iki gihugu bizahagurutsa abakuru b’ibihugu bigize umuryango ICGLR, Umuryango wa Afurika yunze Ubumwe ndetse n’Umuryango w’Abibumbye kugira ngo barebere hamwe icyakorwa kugra ngo bikemuke mu mahoro.

Abatavuga rumwe n’ubutegetsi bashinja Perezida Kabila gushaka kwikubira ubutegetsi, nyuma y’uko Komisiyo y’amatora itangaje ko amatora y’umukuru w’igihugu yari ateganyijwe mu Ugushyingo uyu mwaka atakibaye bitewe n’ubushobozi buke mu mafaranga.

Ibi byatumye haba imyigaragambyo ikomeye yaguyemo amagana abandi barakomereka, mu gihe ibintu byiganjemo inyubako byatwitswe n’abigaragambyaga.

Kabila yagiye ku butegetsi mu 2001, bikaba biteganyijwe ko manda ze ebyiri yemererwa n’Itegeko Nshinga zizarangira tariki ya 20 Ukuboza 2016, ariko bigaragara ko azakomeza kuyobora kugeza amatora abaye, ibintu abatavuga rumwe nawe badakozwa.

Kofi Annan yifuzwa n'abatavuga rumwe na Kabila na Leta Zunze Ubumwe za Amerika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved