Kenya mu gushakira amajwi Amina Mohammed ku buyobozi bwa Komisiyo ya AU

Yanditswe na Philbert Girinema
Kuya 8 Ugushyingo 2016 saa 06:52
Yasuwe : XX
0

Guverinoma ya Kenya, ikomeje gukora ibishoboka byose mu gushakisha amajwi yo gushyigikira Minisitiri w’Ububanyi n’Amahanga wayo, Amina Mohammed, ugomba guhangana n’abandi batanu ku buyobozi bwa Komisiyo y’Umuryango wa Afurika Yunze Ubumwe, AU.

Ni amatora ategerejwe muri Mutarama 2016, mu nama y’Abakuru b’Ibihugu izateranira ku cyicaro cya AU, Addis Ababa muri Ethiopia.

Kuri uyu wa Mbere, Visi Perezida wa Kenya, William Ruto, yagiranye ibiganiro na Perezida wa Tchad, Idris Debby Itno usanzwe ari nawe Perezida wa AU muri uyu mwaka, amugezaho ubutumwa bwa Perezida Kenyatta anamusaba gushyigikira kandidatire ya Ambasaderi Mohammed.

Nyuma y’urwo ruzinduko, Visi Perezida Ruto yanditse kuri twitter ati “Twagiranye ibiganiro na Perezida Idriss Deby wa Tchad mu kumusaba gushyigikira Mohammed ku buyobozi bwa komisiyo ya AU,’’

“Twizera ko Minisitiri Amina Mohammed afite ubushobozi bwose bwo kurangaza imbere gahunda za Afurika mu ruhando mpuzamahanga,’’

Visi Perezida Ruto yerekeje muri Tchad nyuma y’uko mu cyumweru gishize, Perezida Uhuru Kenyatta yatangije ku mugaragaro ibikorwa byo kwamamaza Amb. Amina Mohamed, mu gikorwa cyatumiwemo abahagarariye ibihugu byabo muri Kenya.

Mohammed w’imyaka 55, azaba ahanganye n’abakandida barimo Minisitiri w’Ububanyi n’Amahanga wa Botswana, Pelonomi Venson-Moitoi n’uwa Guinée Equatoriale, Agapito Mba Mokuy bahatanye mu matora yabereye mu Rwanda muri Nyakanga, ariko habura ugira bibiri bya gatatu by’amajwi yose, amatora yimurirwa muri Mutarama umwaka utaha.

Harimo kandi Umunya-Senegal, Abdoulaye Bathily usanzwe ari Intumwa y’Umuryango w’Abibumbye muri Afurika yo hagati, ushyigikiwe cyane n’abakuru b’ibihugu byo muri Afurika y’u Burengerazuba.

Afurika y’u Burasirazuba izaba ihagarariwe na Fowsiyo Yusuf Haji Adan wahoze ari Minisitiri w’Ububanyi n’Amahanga wa Somalia, Amina Mohammed, mu bakandida hakabamo na Minisitiri w’Ububanyi n’Amahanga wa Tchad, Moussa Faki Mahamat.

William Ruto aganira na Itno

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza