Kenya: Urukiko rw’Ikirenga rugiye kumva ibirego bitesha agaciro intsinzi ya Uhuru Kenyatta

Yanditswe na Herve Ugirumukunda
Kuya 14 Ugushyingo 2017 saa 10:02
Yasuwe :
0 0

Abacamanza b’Urukiko rw’Ikirenga rwa Kenya kuri uyu wa Kabiri baratangira kumva ibirego bitatu bisaba kongera kuburizamo amatora y’Umukuru w’Igihugu yo ku wa 26 Uhuru Kenyatta yatsinze.

Gufata umwanzuro kuri ibyo birego bizakorwa mu minsi itandatu. Ni ubwa kabiri mu mezi atatu abacamanza bayobowe na Maraga David basabwe kuburizamo amatora y’Umukuru w’Igihugu.

Ku ya 1 Nzeri, abacamanza bane kuri babiri batoye ko amatora asubirwamo kubera atabaye mu mucyo nyuma y’ikirego cya Raila Odinga.

Odinga yivanye mu matora ku nshuro ya kabiri avuga ko amavugurura yasabaga muri Komisiyo y’Amatora atakozwe.

Kuri ubu ntiyigeze yongera kuregera Urukiko rw’Ikirenga ahubwo abareze ni Harun Mwau wahoze ari umudepite, impirimbanyi ebyiri, Njonjo Mue na Khelef Khalifa n’Ikigo cy’Imiyoborere ishingiye kuri Demokarasi, IDG.

Daily Nation ivuga ko Komisiyo y’Amatora ya Kenya, izaba ihagarariwe mu rukiko, ishaka ko hazaganirwa ku bintu bine birimo kwemeza ko amatora yasubiwemo mu buryo bwemewe n’Itegeko Nshinga, Perezida Uhuru agatorwa mu mucyo.

Iyi Komisiyo kandi ishaka ko urukiko rushimangira ko hatari hakenewe gushyirwaho abandi bakandida batari mu bitabiriye amatora ya mbere.

Perezida Uhuru na we ashaka ko ibyo birego biteshwa agaciro, Urukiko rw’Ikirenga rugatangaza ko amatora yabaye mu mucyo mu gihe, Nasa ihuriro ry’amashyaka riyobowe na Raila Odinga ryo rivuga ko amatora yabaye bwa kabiri atemewe kuko hari intara nyinshi atabayemo.

Ikirego cya IDG cyo gisaba urukiko ko Odinga n’abamushyigikiye bakorwaho isuzuma urukiko rukareba niba batarakoze ibyaha bijyanye n’amatora.

IDG ishaka ko urukiko rwemeza niba abaturage barahombejwe n’imyitwarire mibi y’abashyigikiye Odinga mu gihe cy’amatora, bakabyishyuzwa.

Iki kigo kivuga ko abayobozi ba Nasa, Raila Odinga, Kalonzo Musyoka bafatanyaga kwiyamamaza, Musalia Mudavadi, senateri James Orengo na Moses Wetang’ula bashatse kuburizamo amatora ku ngufu.

Bashinjwa ubugizi bwa nabi, gutera ubwoba, imvugo y’amacakubiri no kugumura abarwanashyaka babo bakabashora mu rugomo rwo gusagarira abaturage n’abakozi ba komisiyo y’amatora.

Perezida Uhuru, umufasha we n'Umukuru w'Urukiko rw'Ikirenga, David Maraga mu rusengero ku ya 5 Ugushyingo 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza