Kenya: SportPesa na Betin zicuruza imikino y’amahirwe zahagaritse ibikorwa byazo

Yanditswe na Habimana James
Kuya 28 Nzeri 2019 saa 05:53
Yasuwe :
0 0

Sosiyete zikomeye muri Kenya zacuruzaga imikino y’amahirwe, SportsPesa na Betin, zatangaje ko zihagaritse ibikorwa byazo kubera umusoro uremereye wagiye ushyirwaho n’ubutegetsi.

Ibi bigo uko ari bibiri byatangaje ko byafashe iki cyemezo nyuma y’aho imisoro yashyizweho na leta, yagiye ibibangamira mu bucuruzi bwabyo.

SportsPesa yatangaje ko yatunguwe n’icyemezo cya Kenya cyo kuzamura umusoro ku kigero cya 20% ku mikino yose yakinwe.

Itangazo ry’iki kigo ryatangaje ko “Iki cyemezo kibangamira abaturage ndetse n’ikigo.”

Naho ikigo cya Betin cyo cyatangaje ko cyamaze koherereza ubutumwa abari abakozi bacyo ko gihagaritse imirimo.

Cyavuze ko “Twagiye tugirana inama n’inzego zitandukanye za leta ku byerekeye n’icyangombwa cyo gukora ariko ntacyo byagezeho.”

Nyuma y’aho ibi bigo bitangaje ko bihagaritse imirimo, abakozi 2,500 bakoranaga nabyo bagiye gutakaza akazi.

Ibitangazamakuru byatangaje ko iki ari igihombo gikomeye ku mupira w’amaguru muri Kenya.

SportsPesa cyafatanyaga n’amakipe arimo Gor Mahia na AFC Leopards.

Umuyobozi w’ishyirahamwe ry’umupira w’amaguru muri Kenya, Nick Mwendwa yatangaje iki ari icyemezo kibabaje ku mupira w’amaguru mu gihugu.

Yagize ati “Ni amakuru ababaje kuko mu minsi ishize SportsPesa yari yatubwiye ko igiye kongera gukora, kuba ihagaritse imirimo bivuze ko tugiye gutakaza amashilingi agera kuri miliyoni 600 y’ubufasha baduhaga mu mupira w’amaguru.”

Yavuze ko bagiye kugaruka kuri leta bongere bayisabe gufasha umupira w’amaguru kuko nta kindi gisubizo bafite.

Ibigo bibiri byacuruzaga imikino y'amahirwe byahagaritse gukora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza