Kenya: Komisiyo y’Amatora yavuze ko abajura bashatse kwinjira mu ikoranabuhanga ryayo bikabananira

Yanditswe na Jean Pierre Tuyisenge
Kuya 10 Kanama 2017 saa 09:46
Yasuwe :
0 0

Komisiyo y’amatora muri Kenya, IEBC, yatangaje ko hari abajura mu by’ikoranabuhanga bagerageje kuyigabaho igitero ngo bice amatora ariko bagasanga ifite ubwirinzi buhagije.

Uwari uyoboye komite yari ishinzwe ikoranabuhanga mu matora, Prof. Yakub Guliye, yabwiye The EastAfrican dukesha iyi nkuru ko hari abagerageje kwinjira mu ikoranabuhanga bakoresha ariko ntihagira ubishobora.

Yagize ati “ Twabonye amagerageza menshi ya ba rushimusi bashakaga kwinjira mu ikoranabuhanga ryacu ariko biba iby’ubusa kuko twashoye imari itubutse muri ubwo bugenzuzi.”

Yongeyeho ati “ Habayeho kubigerageza ariko nta gihamya ko baba barabishoboye. Ikoranabuhanga rivugwaho kwinjirwamo ntabwo ari iryacu. Amakuru ko twaba twarinjiriwe ntabwo ari yo.”

Ibyo Prof Guliye yavuze byaje byuzuza ibyari byatangajwe na Perezida wa Komisiyo y’Igihugu y’Amatora, Ezra Chiloba yari yavuze mu kiganiro yagiranye n’itangazamakuru ku mugoroba wo ku wa Gatatu.

Icyo gihe yari yavuze ko ikoranabuhanga ryabo rimeze neza, ko nta n’uwagerageje kuryinjiramo. Umukandida utavuga rumwe n’ubutegetsi bwa Uhuru Kenyatta banahanganye mu matora, Raila Odinga, yari yavuze ko ikoranabuhanga muri icyo gihugu ryinjiwemo n’abajura n’amajwi yahawe ishyaka rya Jubilee rya Kenyatta atari yo na gato.

IEBC ubwayo ivuga ko amajwi yatangajwe ku karubanda ku cyicaro cyayo mu Mujyi wa Nairobi yari ay’agateganyo.

Mu matora yabaye ku wa Kabiri, amajwi y’agateganyo agaragaza ko Uhuru Kenya w’ishyaka Jubilee Party afite amajwi 54%, mu gihe Odinga w’impuzamashyaka NASA afite amajwi 44%.

Ku gicamunsi cy’ejo ku wa Gatatu Odinga yatangarije abanyamakuru ko atemera ibiri kuva mu matora ndetse yerekana impapuro ziriho kode (codes) nyinshi yemeza ko ari izigaragaza ko hari abandi bantu binjiye mu ikoranabuhanga rya Komisiyo y’amatora bagahindura amajwi.

Perezida wa Komisiyo y’Igihugu y’Amatora, Ezra Chiloba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza