Isoko rusange rya Afurika rigiye gutangirizwa mu nama ya AU i Niamey

Yanditswe na HABIMANA James
Kuya 4 Nyakanga 2019 saa 07:17
Yasuwe :
0 0

Tariki ya 7 Nyakanga uyu mwaka uzaba umunsi w’amateka ku mugabane wa Afurika, kuko aribwo abakuru b’ibihugu na za guverinoma ku mugabane wa Afurika, bazatangiza ku mugaragaro isoko rusange ry’ibi bihugu, AfCFTA.

I Niamey muri Niger niho hazakorerwa aya mateka, mu nama ya 35 izahuza abakuru b’ibihugu na za guverinoma kuri uyu mugabane, iyi nama yatangiye tariki 4 Nyakanga izarangira tariki 8 uku kwezi.

Perezida wa Komisiyo ya Afurika Yunze Ubumwe, Moussa Faki Mahamat ubwo yatangizaga inama ihuje abagize inama y’ubutegetsi muri uyu muryango, yashimiye iyi gahunda igiye gukorwa avuga ko iki ari igikorwa cy’amateka kuri uyu mugabane.

Muri Werurwe 2018 nibwo ibihugu 44 bihuriye mu Muryango wa Afurika Yunze Ubumwe, AU, byashyize umukono ku masezerano ashyiraho isoko rusange ry’ibi bihugu, AfCFTA, ariko byose ntibyabasha kumvikana ku ngingo zishyiraho urujya n’uruza rw’abantu.

Ibihugu 22 nibyo byasabwaga ngo byemeze burundu aya masezerano.

Iri soko rusange nirimara gutangizwa, abacuruzi hirya no hino ku mugabane wa Afurika bazaba bashobora gucuruzanya, ni uburyo kandi buzafasha guteza imbere ubucuruzi hagati y’ibihugu bya Afurika horoshywa urujya n’uruza rw’ibicuruzwa, abantu ndetse na serivisi hagati y’ibihugu bigize uyu mugabane.

Ibi byitezweho kuzatuma igipimo cy’ubucuruzi hagati y’ibihugu bya Afurika cyikuba inshuro zirenga ebyiri mu mwaka wa 2020 ugereranyije n’urugero cyariho mu 2010.

Isoko ryo rirahari kuko abaturage bo kuri uyu mugabane ubabariye hamwe bagera muri miliyari imwe na miliyoni 200 ndetse n’umusaruro mbumbe w’ibihugu bya Afurika uwushyize hamwe usaga miliyari 2000 z’amadorali.

Biteganyijwe kandi ko nyuma kwemeza iri soko rusange, iyi nama izashaka icyicaro aho iri soko rusange rizakorera, mu nshingano z’abagize ubuyobozi bw’isoko rusange hazaba harimo gushyira mu bikorwa aya masezerano.

Ibihugu birindwi nibyo byamaze gutanga ubusabe bwo kuzakira iki cyicaro, ibyo ni Misiri, eSwatini, Ethiopia, Kenya, Ghana, Madagascar na Senegal.

Muri iyi nama kandi abayirimo baraganira bimwe mu bibazo n’impinduka zikenewe ngo hagerwe ku ntego z’iterambere z’uyu muryango 2063, hazatorerwamo kandi ingengo y’imari y’uyu muryango ya 2020.

Bazanaganira ku bwitange bw’ibihugu bigize uyu muryango mu kigega gishinzwe amahoro kuri uyu mugabane, Mahamat aherutse kuvuga ko kuri miliyoni 400 zikenewe muri iki kigega, miliyoni 120 z’amadorali ari zo zimaze gutangwa.

Komisiyo y’Umuryango w’Abibumbye ishinzwe Ubukungu bwa Afurika iherutse gutangaza ko mu 2020 ubucuruzi hagati y’ibihugu bya Afurika buzagera ku gipimo ya 53% cy’ubucuruzi bwose bw’uyu mugabane aya masezerano nashyirwa mu bikorwa. Kuri ubu ubucuruzi buhagaze kuri 16%.

Byitezwe ko azatuma ibiciro by’indege hagati y’ibihugu byo muri Afurika bigabanukaho 25%, mu gihe ubu byabarwaga ko hari aho uva mu gihugu kimwe ujya mu kindi cyo muri Afurika, ugasanga itike y’indege ihenze kurusha kuva muri icyo gihugu ujya ku wundi mugabane.

Inyigo iheruka y’Ishyirahamwe Mpuzamahanga ry’Ubwikorezi bw’Indege (IATA) yerekanye ko guhuza isoko byatuma ibyo bihugu byongera miliyari 1.3 z’amadolari ku musaruro mbumbe, bigahanga imirimo 155 000, hakazigamwa miliyoni 500 z’amadolari mu matike, kongera serivisi ku kigero cya 75%, kongera urwego rw’ubucuruzi no kugabanya igihe abagenzi bakoreshaga mu ngendo.

Muri Werurwe 2018 nibwo amateka yo gushyira umukono ku masezerano ashyiraho isoko rusange yandikiwe i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza