Ishoramari mu bintu bikomeye byaganiriweho hagati ya Perezida Kagame na Xi Jinping w’u Bushinwa

Yanditswe na Rabbi Malo Umucunguzi
Kuya 17 Werurwe 2017 saa 08:08
Yasuwe :
1 0

Ifoto ya Perezida Kagame yereka mugenzi we Xi Jinping w’u Bushinwa abayobozi bamuherekeje mu ruzinduko arimo muri icyo gihugu, ubwayo isobanura byinshi ku ngingo zikomeye rwubakiyeho.

Louise Mushikiwabo, Minisitiri w’Ububanyi n’Amahanga; Minisitiri w’Ibikorwaremezo, James Musoni n’Umunyamabanga wa Leta ushinzwe igenamigambi muri Minisiteri y’Imari, Dr Uzziel Ndagijimana ni bo bari ku murongo w’imbere.

Kuri uyu wa Gatanu tariki 17 Werurwe, nibwo Perezida Kagame na Madamu batangiye uruzinduko rw’akazi rw’iminsi ibiri, aho bagezeyo mu gitondo bakabanza kwakirwa mu cyubahiro gikwiye Umukuru w’Igihugu.

Nk’uko Ibiro Ntaramakuru by’u Bushinwa, Xhinhua, byabitangaje, Perezida Xi yashimye uburyo umubano w’ibi bihugu wagiye utera intambwe mu myaka 46 ishize, haba mu bijyanye n’ubwizerane muri politiki, ubufatanye mu bucuruzi no gusangira ibirebana n’umuco.

Yavuze ko hari ubushake bwo gufasha u Rwanda kubaka igice cyagenewe inganda, bikajyana n’ubufatanye bw’impande zombi mu guteza imbere urwo rwego, iterambere ry’ubuhinzi, kubaka ibikorwaremezo, ubukerarugendo n’umutekano.

Muri ibyo biganiro kandi Perezida Xi yijeje Kagame ko bazakomeza gushishikariza abashoramari benshi b’Abashinwa gushora imari mu mishinga minini y’ibikorwaremezo mu Rwanda.

Mu ruzinduko yagiriye muri Afurika mu 2013, Xi yavuze ko hakwiye kubaho umubano uhamye na Afurika, kandi ugashingira ku nyungu zifatika ku mpande zombi.

Perezida Xi yabwiye Perezida Kagame ati "Impamvu y’ibyo ni uguhuza iterambere ry’u Bushinwa no gushyigikira iterambere rya Afurika, hagamijwe ubufatanye bubyara inyungu ku mpande zombi n’iterambere rusange.”

U Bushinwa bumaze kuza ku isonga mu gutera inkunga ibihugu bya Afurika

U Bushinwa si cyo gihugu cyonyine kiri gushyigikira iterambere rya Afurika, ariko ubu kiri kuza ku isonga mu gutera inkunga ibikorwa byinshi.

Perezida Jinping yakomeje agira ati "Uko ibintu byahinduka ku rwego mpuzamahanga kose, gahunda y’u Bushinwa kuri Afurika ntabwo izigera ihinduka, kandi u Bushinwa ntibuteze kugabanya imbaraga bushyira mu bufatanye na Afurika hagamijwe inyungu ku mpande zombi.”

Perezida Kagame na we yashimye umubano mwiza ugaragara hagati y’u Rwanda n’u Bushinwa, anashima uruhare u Bushinwa buri kugira mu kongera kwiyubaka k’u Rwanda no kwiteza imbere.

Umukuru w’igihugu yanahaye ikaze abashoramari benshi b’Abashinwa cyane cyane mu nzego z’ubuhinzi, ubucukuzi bw’amabuye y’agaciro, ubukerarugendo n’ibikorwaremezo.

Uko imyaka ihita indi igataha, ishoramari ry’Abashinwa muri Afurika rikomeza kwikuba inshuro nyinshi, imishinga yabo ikanyurana kuva ku bucuruzi bwo hasi, ubwubatsi bw’imihanda, kugeza mu mishinga rutura yo kubaka ibiraro n’imihanda ya gari ya moshi iri gushyirwamo miliyari y’amadolari.

Perezida Kagame na mugenzi we Xi Jinping w’u Bushinwa

Nibura hagati ya 2000 na 2011, u Bushinwa bwemeye gushyigikira imishinga isaga 1700 y’ubwubatsi butandukanye mu bihugu 50 byo muri Afurika, yose ifite agaciro kagera kuri miliyari $75.

Ibyo byiyongeraho ko bwemeye gutanga inguzanyo yo kubaka umuhanda wa gari ya moshi uzahuza ibihugu bya Afurika y’Iburasirazuba, Tanzania muri Nyakanga 2016 ikaba yarahawe miliyari $7.6 na China’s Export-Import Bank (Exim).

U Bushinwa bugaragaza ubushake bwo gukomeza gukorana na Afurika mu gushyira mu bikorwa imyanzuro yemerejwe mu nama yahurije impande zombi i Johannesburg muri Afurika y’Epfo, mu Ukuboza 2015.

Ni inama Perezida Xi Jinping yatangarijemo inkunga ya miliyari $60 zizahabwa Afurika binyuze mu mishinga itandukanye.

Irimo inganda, ibikorwaremezo, iterambere ritabangamira ibidukikije, ubuhinzi, koroshya ubucuruzi n’ishoramari, kugabanya ubukene no guteza imbere imibereho y’abaturage, ubuzima, imikoranire y’abaturage, umuco, amahoro n’umutekano.

Kuva icyo gihe kugeza muri Kanama umwaka ushize, Afurika n’u Bushinwa bari bamaze gusinya amasezerano 243 afite agaciro ka Miliyari 50.725 z’amadolari ya Amerika, harimo miliyari 46 z’amadolari yatanze n’u Bushinwa mu ishoramari n’inguzanyo muri Afurika. Ni ukuvuga 91% by’ayagenwe mu masezerano.

U Rwanda ruri kungukira muri ayo masezerano, aho ku ikubitiro u Bushinwa bwemereye u Rwanda kwagura ibitaro bya Masaka bigashyirwa ku buso bwa metero kare 36000, hagasigaye kubaka no kuvugurura imihanda ireshya n’ibilometero 54.56 mu Mujyi wa Kigali, ubu biri gukorwa.

Perezida Kagame asuye u Bushinwa nyuma y’uko mu mwaka ushize, Perezida w’Inteko Ishinga Amategeko y’u Bushinwa, Zhang Dejiang, yaje mu Rwanda akanashyira ibuye ry’ifatizo aho Abashinwa bazubaka inyubako igezweho izakoreramo minisiteri enye harimo n’ibiro bya Minisitiri w’Intebe.

Mu biganiro impande zombi zagiranye, Perezida Xi yashimye uburyo umubano w’ibi bihugu wagiye utera intambwe mu myaka 46 ishize, haba mu bijyanye n’ubwizerane muri politiki, ubufatanye mu bucuruzi no gusangira ibirebana n’umuco
Perezida Kagame yatwawe mu modoka yo mu bwoko bwa Hongqi L5, imeze nk’iyo Perezida Xi Jinping agendamo
Perezida Kagame ahabwa ikaze na mugenzi we w'u Bushinwa Jinping n'umugore we Peng Liyuan
Uru ruzinduko rwitezweho gushimangira umubano hagati y'ibihugu byombi
Perezida Jinping asuhuza abagiye baherekeje Perezida Kagame barimo Minisitiri w'Ububanyi n'Amahanga, Louise Mushikiwabo
Perezida Kagame asuhuza abayobozi batandukanye mu nzego z'u Bushinwa
Madamu Jeannette Kagame aganira na Mugenzi we Peng Liyuan
Perezida Kagame na Perezida Jinping baganira nyuma yo kumuha ikaze mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244