Indwara y’uburenge yongeye gutera muri Uganda

Yanditswe na Muhonzire Sylvine
Kuya 31 Mutarama 2021 saa 02:06
Yasuwe :
0 0

Indwara y’uburenge ikunze kwibasira inka ndetse n’andi matungo magufi nk’ihene, intama, n’ingurube yongeye gutera muri burengerazuba bwa Uganda, mu Karere kitwa Kiruhura.

Abayobozi bo muri aka karere bahise bahagarika ingendo zose z’amatungo zikorerwa mu karere no hanze yako, ndetse n’ababaga ayo matungo bahagaritswe kugira ngo hirindwe ikwirakwira ry’iyo ndwara cyane ko yandura ku bwinshi.

Daily Monitor ivuga ko iyi ndwara iheruka gutera muri iki gihugu mu Ukwakira umwaka ushize, none ikaba yasakaye mu duce dutanu muri 12 tugize aka Karere ka Kiruhura. ndetse ko byibura mu rwuri rumwe muri buri gace yafashwe n’iyi ndwara.

Mu gace kitwa Kikatsi ho ni inzuri umunani zafashwe n’iyi ndwara.

Umwe mu bashinzwe ubuvuzi bw’amatungo muri ako Karere, Dr. Grace Asiimwe, yavuze ko igitera ikwirakwira ry’iyi ndwara ari ukubera ingendo z’amatungo, yaba iziva ku nzu zimwe zijya ku zindi cyangwa zijya aho zigurishirizwa ku masoko.

Mu ntangiriro z’uku kwezi, abayobozi b’aka Karere bahagaritse amakaragiro y’amata 14 aherereye mu duce twagaragayemo iyi ndwara, ndetse n’abandi bantu bacuruzaga cyangwa baguraga amata nabo barahagarikwa.

Gusa abatunze amatungo muri aka karere bahangayikishijwe n’iki cyemezo kuko aya matungo ari yo bakeshaga kubaho.

Umuyobozi wa Koperative y’aborozi muri aka Karere, Emmanuel Kyeishe, avuga ko nubwo iyi ndwara iri gukwirakwira cyane igisubizo cyo kuyihagarika kibabangamiye.

Ati “Twebwe Aborozi tubaho tubikesheje amatungo yacu n’ibiyakomokaho [...] Nibahagarika ingendo z’inka no gucuruza amata, ndibaza uburyo batekereza ko tuzabaho. Turi mu gihirahiro. Yego dukeneye kurwanya iyi ndwara ariko nanone dukeneye kubaho.”

Dr. Asiimwe yavuze ko hagiye gutangira gahunda yo gukingira amatungo mu Karere hose.

Ibimenyetso by’iyi ndwara y’uburenge ku matungo birimo kugira umuriro, gucika ibisebe ku rurimi, ku munwa, mu kanwa, ku mabere ndetse no hagati y’ibinono. Itungo ryafashwe nayo ntiritanga umusaruro uhagije.

Amatungo yibasiwe n'indwara y'uburenge mu Burengerazuba bwa Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .