Kwamamaza

Imyaka 19 irashize Mobutu wafatwaga nk’umunyagitugu muri RDC aguye mu buhungiro

Yanditswe kuya 7-09-2016 saa 14:16' na Mukaneza M.Ange


Hashize imyaka 19, uwafatwaga nk’umunyagitugu Mobutu Sese Seko Kuku Ngbendu wa Zabanga wayoboye Repubulika Iharanira Demokarasi ya Congo (yitwaga Zaïre) kuva mu 1965-1997 aguye mu buhungiro muri Maroc.

Mobutu wari warihaye ipeti rya Marchal yavutse ku itariki 14 Ukwakira 1930, apfa ku wa 7 Nzeri 1997 mu mujyi wa Rabat azize kanseri ya prostate yari amaranye igihe.

Yagiye ku butegetsi mu 1965 abuvaho mu 1997 ahiritswe ku butegetsi na Laurent-Désiré Kabila ku itariki ya 17 Gicurasi 1997, umuhango wo kumushyingura ukaba wari utangaje ugereranyije n’imyaka irenga 30 yari amaze ari Perezida wa RDC, icyo gihe yitwaga Zaïre.

Jeune Afrique ivuga ko Mobutu yashyinguwe ku wa 13 Nzeri 1997, nyuma y’icyumweru apfuye, aho yashyinguwe mu gace kari ak’Abafaransa gaherereye i Rabat muri Maroc, mu muhango witabiriwe n’abo mu muryango we n’abandi bake mu bari bamushyigikiye bari barajyanye na we mu buhungiro.

Hari hashize imyaka itari mike Mobutu wari wariyise indwanyi idasanzwe itahukana intsinzi buri gihe ndetse igaca igikuba aho inyuze hose, arwaye Kanseri ya Prostate.

Imyaka ya nyuma y’ubutegetsi bwe yaranzwe n’inkundura yo kwimakaza demokarasi yatangijwe n’ishyaka(AFDL, Alliance des Forces Démocratiques pour la Libération du Congo) ryari riyobowe na Laurent-Désiré Kabila se wa Perezida Joseph Kabila bivugwa ko ingabo zaryo ari zo zamukuye ku butegetsi.

Nyuma yo kotswa igitutu n’ingabo za Kabila, Mobutu yavuye Kinshasa ku itariki ya 16 Gicurasi 1997 yerekeza mu gace ka Gbadolite yari yarigaruriye, aza kuhava ku munsi ukurikiyeho yerekeza muri Togo yakirwa na Perezida Gnassingbé Eyadéma.

Aha na ho ariko ntiyahatinze kuko ku itariki 23 Gicurasi 1997 yahavuye yerekeza muri Maroc ku butumire bw’umwami Hassan II.

Ni nyuma y’uko uyu mugabo wizerwaga bikomeye n’ibihugu byo mu burengerazuba bw’Isi yangiwe n’u Bufaransa kujya kuba mu nzu ye yari yubatse i Roquebrune-Cap-Martin mu Bufaransa.

Kwimwa ubuhungiro n’u Bufaransa byatumye Mobutu wari urembejwe n’iyi Kanseri yari yaramenye ko arwaye mu 1989 ariko agatangira kuyivuza mu 1996, atabona ubufasha yari akeneye ari na byo byamuviriyemo urupfu.

Imva ye iherereye mu irimbi rishyinguyemo abimukira batazwi n’abandi bagiye bapfa barohamye mu nyanjya ya Méditerranée.

Nubwo mu 2007 umuhungu we François-Joseph Nzanga Mobutu, yasabye Perezida Joseph Kabila ko yazana umurambo wa se ugashyingurwa mu gihugu cy’amavuko, kugeza ubu ntibirakorwa, ndetse nta n’icyizere gihari ko bizabaho kuko aba bombi nta mubano bagifitanye.

Mobutu yashakanye n’abagore babiri byemewe, barimo Marie-Antoinette babyaranye abana 10 na Bobi Ladawa babyaranye abana bane. Gusa bivugwa ko yari afite n’abandi bana umunani yabyaye ku bagore batandukanye, bose hamwe bakaba bagera kuri 21.

Mobutu yafatwaga nk'umunyagitugu ukomeye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved