00:00:00 IGIHE NETWORK KN KINYARWANDA EN ENGLISH FR FRANCAIS

Impunzi za mbere ziturutse muri Afghanistan zageze i Kampala

Yanditswe na Akayezu Jean de Dieu
Kuya 25 Kanama 2021 saa 10:49
Yasuwe :
0 0

Leta ya Uganda yakiriye abantu 51 bahungishijwe muri Afghanistan nyuma y’uko umutwe w’Abarwanyi b’Aba-Taliban ufashe iki gihugu ukacyambura guverinoma ya Perezida Ashraf Ghani.

Aba baturage bageze muri Uganda kuri uyu wa 25 Kanama 2021, bikaba biteganyijwe ko bacumbikirwa n’iki gihugu mu buryo bw’agateganyo kugeza igihe bazajyanwa muri Leta Zunze Ubumwe za Amerika n’ibindi bihugu.

Itangazo rya Minisiteri y’Ububanyi n’Amahanga ya Uganda rivuga ko abagejejwe i Kampala barimo abagabo, abagore n’abana. Bahise bapimwa Covid-19, nyuma bajyanwa mu kato nk’uko biteganywa n’amabwiriza yo kwirinda ikwirakwira ry’iki cyorezo.

Byari biteganyijwe kandi ko Abagande bari basanzwe baba muri Afghanistan nabo bagera i Kampala bazanye n’izi mpunzi ariko ntabwo byakunze ku bw’imbogamizi zo kubona uko bahaguruka ku Kibuga Mpuzamahanga cy’Indege cya Kabul.

Reuters dukesha iyi nkuru yatangaje ko Amerika n’ibihugu bifatanyije kuva ku wa 14 Kanama 2021, bimaze kuvana abaturage ibihumbi 70 muri Afghanistan barimo n’ababyo bari bari mu byago.

Itariki ntarengwa ibyo bihugu byihaye ni iya 31 Kanama, kuko ari bwo ingabo z’amahanga ziri muri Afghanistan zizaba zahavuye.

Mu cyumweru gishize, Uganda yari yatangaje ko yemeye kwakira by’agateganyo impunzi zo muri Afghanistan 2000. Iki gihugu gisanzwe gicumbikiye izindi mpunzi zirenga miliyoni 1,4 ziganjemo izo muri Sudani y’Epfo.

Impunzi zavuye muri Afghanistan zateguriwe ahantu ho kuruhukira muri Uganda
Mu bagaragaye mu modoka bavuye muri Afghanistan berekeza muri Uganda harimo n'abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .