00:00:00 IGIHE NETWORK KN KINYARWANDA EN ENGLISH FR FRANCAIS

Impamvu esheshatu zituma Boko Haram ikomeje kwigira Syori muri Nigeria

Yanditswe na Zigiranyirazo Bajecteur
Kuya 20 Gicurasi 2021 saa 09:34
Yasuwe :
0 0

Umutwe witwaje intwaro wa Boko Haram ufite ibirindiro mu Majyaruguru ya Nigeria, umaze kwica abantu babarirwa mu bihumbi ndetse abakabakaba miliyoni ebyiri n’igice bavanwa mu byabo aho bahindutse impunzi mu bihugu byo mu Burengerazuba bwa Afurika nka Cameroun, Tchad na Niger.

Nubwo uyu mutwe bivugwa ko mu buryo bw’amayeri y’imirwanire watangiye gutsindwa, hari impamvu esheshatu zituma ugiye kumara imyaka 20 irimo isaga 10 umaze ugaba ibitero utarakubitwa inshuro.

Mu 2015 ubwo yari amaze amezi arindwi ya manda ye ya mbere, Perezida wa Nigeria, Muhammadu Buhari, yagerageje kuba yavanaho uyu mutwe wa Boko Haram ariko umubera ibamba ubwo abasirikare b’iki gihugu bageragezaga kuvana izi nyeshyamba mu duce zigaruriye zikanga kuva ku izima ahubwo zigakomeza guhohotera abaturage mu buryo ndengakamere.

Muri uyu mwaka wonyine uyu mutwe umaze kugaba ibitero bisaga ijana mu bice bitandukanye aho hamaze kwicwa abantu babarirwa muri magana, hagasahurwa intwaro, imiti, ibiryo n’ibindi. Hari impamvu esheshatu zituma uyu mutwe utaratsindwa:

Boko Haram ni umutwe wayogoje igice cy'Uburengerazuba bwa Afurika

Kudahera ku mpamvu muzi yatumye uyu mutwe ushingwa

Umusesenguzi mu by’umutekano, Kabiru Adamu, yabwiye BBC ko kwishingikiriza cyane ku ngamba za gisirikare zo guhangana na Boko Haram ari yo ntandaro y’uko leta idashobora kuvugutira umuti iki kibazo.

Ati “Ni na yo mpamvu, bibabaje kubona hashize imyaka 11 cyangwa 12 ibikorwa byo kurwanya inyeshyamba bikorwa ariko ntitugire intsinzi ifatika tubona.”

Kabiru akomeza avuga ko ibikorwa bya gisirikare byo kurwanya ibi byihebe bihoraho ariko ntibibuze Boko Haram kongera kwisuganya, ikinjiza izindi ndwanyi nshya, igakusanya ubushobozi bw’amafaranga ndetse ikanongera kubona intwaro.

Ati “Ubundi gukemura ikibazo cy’inyeshyamba cyangwa iterabwoba, uba ukeneye ibindi birenze kwishingikiriza ku gisirikare gusa, ugomba gukemura ikibazo ugihereye mu mizi gusa ibi ntabwo twigeze tubona bishyirwamo imbaraga zihagije.”

Adamu avuga ko kubura ubuyobozi bwiza ari yo ntandaro yo kubona abanya-Nigeria benshi bibasiwe n’ubukene, kwiheba no kutagira amahirwe yo kujya mu ishuri ngo bige.

Ubushobozi bwa Boko Haram bwo kwinjiza abarwanyi bashya

Inzobere zivuga ko ubukene bukabije mu bice bitandukanye bya Nigeria ndetse n’ihohotera rikomeza gukorwa n’izi nyeshyamba bituma hakomeza kwinjizwa indwanyi muri uyu mutwe ikiragano ku kindi.

Impuguke mu by’umutekano, Abdullahi Yalwa, yavuze ko abantu binjira muri uyu mutwe ngo barebe ko bakesha undi munsi.

Ati “Abantu biteguye kwinjira muri uyu mutwe kugira ngo barebe ko babasha kurokoka.”

Kubura ibikoresho kw’ingabo

Adamu yavuze ko nubwo leta ishyira imbere ingufu za gisirikare ariko ingabo za Nigeria zidafite intwaro zihagije. Mu bushakashatsi bwakozwe n’ikigo cye cya Beacon Consulting bwagaragaje ko mu mbunda nto zigera kuri miliyoni esheshatu n’igice zibarurwa muri Nigeria, izigera ku bihumbi 586 zonyine ari zo ziri mu maboko y’igisirikare cya leta.

Nubwo ibi bidasobanuye ko imbunda zose zisigaye ziri muri uyu mutwe ugendera ku matwara y’idini ya Islam, Adamu avuga ko iyi mibare igaragaza neza ko hari umubare munini w’intwaro kandi zitari mu biganza by’igisirikare cya leta.

Ati “Ibi bimenyetso by’imibare tubonye ni igihamya cy’uko ku bw’amahirwe make imitwe yitwaje intwaro ifite nyinshi kurusha igisirikare.”

Hashize imyaka myinshi Ingabo za Nigeria zigaba ibitero byo guhangana na Boko Haram ariko byabaye iby'ubusa

Ruswa

Bivugwa ko ikibazo cya ruswa muri Nigeria kiri mu biza ku isonga mu bituma igisirikare cy’iki gihugu kidashyira imbaraga ku kuba cyakwiyongerera ubushobozi mu buryo bw’ibikoresho ahubwo amafaranga yagakoreshejwe ibi akayoberezwa mu mifuka y’abayobozi b’iki gihugu.

Yalwa avuga ko bikunze kubaho ko gahunda yo kurwanya Boko Haram idakoranwa umurava ahubwo bimeze nk’aho abantu bamwe bayihinduye umuvuno w’ubucuruzi no kwigwizaho indonke.

Amayeri y’imirwanire adashinga

Igisirikare cya Nigeria kinengwa kutagira amayeri y’urugamba afatika, ibi bigatuma mu gihe cy’imirwano, umutwe wa Boko Haram ubogeraho uburimiro ndetse n’abaturage bakabigenderamo.

Mu ntangiriro z’umwaka ushize igisirikare cya Nigeria cyafashe icyemezo cyo kugenda cyimura ingabo zacyo mu birindiro bito zigahurizwa mu bigo binini bizwi nka Super Camps ariko ibi byasize mu makuba akomeye abaturage batuye mu byaro.

Adamu avuga ko bafite ibihamya byinshi byerekana ko kuva aho hafatiwe uwo mwanzuro, ibitero mu baturage byiyongereye cyane kuva ubwo kugeza n’ubu. Ati “Izi Super Camps rwose biragaragara ko zasize abaturage bo mu cyaro mu kangaratete gakabije.”

Impuguke mu by’umutekano zishimangira kandi ko kuba urwego rw’ubutasi rwa Nigeria rudafite ubushobozi bitiza umurindi Boko Haram wo guhora irusha intambwe leta ya Nigeria mu bikorwa by’urugamba.

Gukwira kw’ibikorwa bya Boko Haram

Uyu mutwe ubundi ubusanzwe wari umenyerewe mu majyaruguru y’uburasirazuba bwa Nigeria, ubu amakuru avuga ko indwanyi zawo zatangiye gukwirakwira mu bindi bice bitandukanye by’amajyaruguru ndetse no mu gihugu rwagati.

Umwaka ushize ho uyu mutwe wifashe amashusho uyashyira hanze ugaragaza ko umaze no kugera muri leta ya Niger, ahantu hadafite aho hahuriye n’ahari hasanzwe ibirindiro byawo. Ibi bikomeza gushimangira ko uyu mutwe aho gukendera ahubwo ukomeza kugaba amashami mu bice bitandukanye, ikimenyetso gikomeye cy’uko ntaho wenda kujya.

Mu Ukuboza umwaka ushize uwari Umukuru w’Igisirikare, Lt. Gen. Yusuf Tukur Buratai, yavuze ko imirwano hagati y’igisirikare na Boko Haram ishobora gukomeza indi myaka 20.

Boko Haram ifite intwaro nyinshi cyane aho bivugwa ko ziruta n'izifitwe na leta
Nta munsi wira nta muntu wishwe n'abarwanyi b'uyu mutwe
Imiborogo ihora mu baturage ba Nigeria kubera uyu mutwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .