00:00:00 IGIHE NETWORK KN KINYARWANDA EN ENGLISH FR FRANCAIS

IMF yasobanuye icyatumye Zimbabwe yimwa inguzanyo

Yanditswe na IGIHE
Kuya 17 Ugushyingo 2021 saa 03:19
Yasuwe :
0 0

Ikigega Mpuzamahanga cy’Imari, IMF, cyatangaje ko kidashobora guha Zimbabwe ubufasha bw’amafaranga kubera imyenda myinshi n’ibirarane by’inguzanyo iki gihugu gifite.

IMF yabitangaje ku wa Kabiri, tariki ya 16 Ugushyingo 2021 mu itangazo iki kigega cyasohoye nyuma y’ukwezi gikorera igenzura ry’uburyo iki gihugu gikoresha inguzanyo.

Rigira riti “IMF ibujijwe gutanga ubufasha mu by’imari kuri Zimbabwe kubera ibibazo mu kwishyura imyenda ndetse n’ibirarane by’inguzanyo.’’

Itangazo rikomeza rivuga ko “Kwemererwa kubona inguzanyo bisaba uburyo buboneye buzafasha kuvugurura inguzanyo zo hanze zahawe Zimbabwe zirimo no gukurirwaho ibirarane no guhabwa icyizere n’abatanga inguzanyo.’’

The Nation yanditse ko IMF yafashe iki cyemezo nyuma y’igenzura abakozi bayo bakoreye muri Zimbabwe bifashishije ikoranabuhanga hagati ya 16 Ukwakira na 16 Ugushyingo 2021, basanga abayobozi b’iki gihugu barashyize imbaraga mu gukemura ibibazo birimo guhangana n’igabanuka ry’ubukungu no kugabanya icyuho hagati y’ingengo y’imari n’amafaranga akenewe.

Kuva mu myaka 15 ishize, Zimbabwe ntirahabwa inguzanyo na IMF na Banki y’Isi kubera ibirarane by’inguzanyo yahawe. Iki gihugu gifite umwenda wa miliyari 10$ yiganjemo ari mu birarane.

Nyuma y’imyaka myinshi ubukungu bwa Zimbabwe butameze neza ndetse n’ingaruka zatewe n’icyorezo cya COVID-19, IMF ivuga ko ubukungu bw’iki gihugu bushobora kuzamukaho nibura 6% muri uyu mwaka.

Zimbabwe iracyahanganye n’ingaruka ubukungu bwayo bwagizweho kuva ku butegetsi bwa nyakwigendera Robert Mugabe.

Mugabe yitabye Imana ku wa 6 Nzeri 2019; yatangiye kuyobora Zimbabwe mu 1987 kugeza mu 2017 ubwo yakurwagaho n’igisirikare. Yanabaye Minisitiri w’Intebe w’iki gihugu kuva mu 1980 kugeza mu 1987.

Perezida wa Zimbabwe, Emmerson Dambudzo Mnangagwa, amaze igihe ahanganye no kuzahura ubukungu bw'iki gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .