Igiterane cya ’Refresh Women Rwanda’ kigiye kubera i kigali ku nshuro ya 15

Yanditswe na Sengurebe Joel
Kuya 13 Nzeri 2018 saa 10:12
Yasuwe :
0 0

Itorero rya New Life Bible Church ryateguye igiterane cy’ububyutse gihuza abari n’abategarugori kizwi nka “Refresh Women Rwanda” kigiye kubera mu Mujyi wa Kigali ku nshuro ya 15.

Refresh Women Rwanda izatangira ku wa 21 Nzeri isozwe ku wa 23 Nzeri 2018. Ni igiterane kizabera kuri New Life Bible ku Kicukiro. Kizajya gitangira saa Cyenda z’umugoroba kugeza saa Mbiri z’ijoro.

Cyatumiwemo abavugabutumwa barimo Rev. May Salami wo mu Bwongereza, Allyson Reneau wo muri Amerika na Apôtre Love Nwigwe wo muri Canada.

Iki giterane kandi kizagaragaramo abahanzi bahimbaza Imana barimo Kavutse Olivier ubarizwa mu Itsinda Beauty for Ashes rizwi mu ndirimbo “Ni Uwa Mbere”, “ Yesu Ni Sawa”; Kamugisha Diana n’itsinda ryo kuramya no guhimbaza Imana ryo muri New Life Bible Church.

Gitangirwamo ubutumwa bwiza bwo kugira neza kwa Kirisitu no gushishikariza abantu kumwegera. Indi ntego yacyo ni ugutanga ubuhamya, inama n’impanuro byubaka ingo bigatuma umuryango uba irerero ryiza ry’urubyiruko rw’ahazaza.

Pasiteri Mugisha Florence akaba n’umugore wa Pasiteri Mugisha Charles bafatanya kuyobora Itorero rya New Life Bible Church, yatangarije IGIHE ko ibi biterane bimaze kwera imbuto nyinshi.

Yagize ati “Imyaka 15 irashize dutegura iki giterane. Ndibuka ko mu itangira bitari byoroshye na gato ariko uko imyaka yagiye ishira byagiye bigenda neza."

"Twuzuye amashimwe ko dufite ubuhamya bw’abantu batandukanye bahembukiye mu biterane bya Refresh Women Rwanda harimo nk’abari bagiye gusenya ubu bubatse ingo zikomeye. Hari abari abakirisitu ku izina ariko bavuyemo abakozi b’Imana bakomeye.”

Pasiteri Mugisha yavuze ko hari n’ibitangaza byabaye, abantu bakira indwara zikomeye.

Mu minsi ibiri ya mbere, iki giterane kizitabirwa n’abari n’abategarugori. Kizasozwa hakorwa icya rusange kizahuza abagabo n’abagore.

New Life Bible Church imaze imyaka 14 ikorera mu Rwanda ni Minisiteri y’Umuryango wa Africa New Life Ministries. Ifite Icyicaro Gikuru mu Karere ka Kicukiro mu Mujyi wa Kigali.

Iri torero ritegura ibiterane ngarukamwaka nka “Refresh Africa”, “Refresh Women Rwanda” byitabirwa n’abantu bavuye mu bihugu byo muri Afurika y’Uburasirazuba n’ahandi.

Pasiteri Mugisha Florence na Pasiteri Mugisha Charles bayobora Itorero rya New Life Bible Church

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza