IGAD irashaka guhuza imbonankubone Perezida Salva Kiir na Riek Machar

Yanditswe na Evariste Nsengimana
Kuya 28 Nyakanga 2019 saa 09:12
Yasuwe :
0 0

Umuryango uhuza za Guverinoma ugamije Iterambere (IGAD) uri gushakisha uburyo wahuza imbonankubone Perezida wa Sudani y’Epfo, Salva Kiir na Dr Riek Machar utavuga rumwe n’ubutegetsi mu gushakira amahoro arambye icyo gihugu.

Uyu muryango watangaje ko kudahura amaso ku yandi kw’abo bayobozi bifatwa nka kimwe mu bidindiza ishyirwa mu bikorwa ry’amasezerano y’amahoro.

Umuyobozi wa Loni muri Sudan y’Epfo, David Shearer, yatangaje ko kudahura imbonankubone kw’abo bayobozi bombi bikomeje kuba imbogamizi nubwo amasezerano y’amahoro yashyizweho umukono yatanze agahenge mu mezi ane ashize.

Perezida Salva Kiir yakomeje gutsimbarara ko Dr Machar aza i Juba muri Sudan y’Epfo kuva amasezerano y’amahoro yashyirwaho umukono, ashimangira ko nta mpamvu n’imwe akwiye kuguma hanze y’igihugu.

Mu ntangiriro za Nyakanga, Guverinoma y’iki gihugu yatumiye Machar i Juba mu biganiro ariko ishyaka rye SPLM-IO risaba ko avanwa mu nzu y’akato arimi i Khartoum kandi akemererwa kwizanira abamurinda.

Amasezerano y’amahoro yavuguruwe muri Nzeri 2018, yateganyaga ishyirwaho rya Guverinoma y’inzibacyuho ku wa 12 Gicurasi ariko biza kwigizwa inyuma ho amezi atandatu nkuko The EastAfrican yabitangaje.

Mu byatumye yimurwa harimo kuba nta ngengo y’imari ihagije igisirikare cyageneye ibikorwa byo guhugura abasirikare mbere yo kubavanga.

Ku wa 21 Nyakanga urwego rwa Leta rushinzwe ingabo rwasabye abasirikare ba Leta n’inyeshyamba guhurira ku bigo bya gisirikare bibegereye, ku buryo icyo gikorwa kirangira ku wa 31 Nyakanga ariko impande zombi zitinya kuba zabishwaniramo.

Kuva amasezerano y’amahoro yasinywa bisa n’aho hajemo umutuzo ariko ku wa 23 Nyakanga imirwano yongeye kubyuka hagati y’ingabo za Leta n’inyeshyamba za NAS ziyobowe na Gen Thomas Cirillo wanze kwinjira muri ayo masezerano.

Machar na Salva Kiir bashyira umukono ku masezerano y'amahoro mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza