00:00:00 IGIHE NETWORK KN KINYARWANDA EN ENGLISH FR FRANCAIS

Icyoba ni cyose ku bwiyongere bwa Covid-19 muri Afurika kubera inkingo zikomeje kuba iyanga

Yanditswe na IGIHE
Kuya 8 Kamena 2021 saa 09:10
Yasuwe :
0 0

Ubwoba ni bwose ku bashinzwe ubuzima muri Afurika ko abandura icyorezo cya Covid-19 bashobora kwiyongera, bitewe n’ubuke bw’inkingo zigera kuri uwo mugabane mu gihe mu bihugu bikize bo bakomeje gukingira.

Ishami ry’Umuryango w’abibumbye rishinzwe Ubuzima (OMS) ryatangaje ko hari ibihugu bishobora kwinjira mu cyiciro cya gatatu cy’ubwiyongere bukabije bw’ubwandu kubera kubura inkingo, habaye nta gikozwe.

Umuyobozi wa OMS muri Afurika, Dr Matshidiso Moeti yavuze ko mu gihe Abanyafurika baba batabonye inkingo byihuse, abandura Covid-19 bashobora kuba benshi n’abo ihitana bakiyongera.

OMS itangaza ko ubu mu bihugu bya Afurika 14 hari ubwiyongere bwa Covid-19, ibihugu umunani muri ibyo ho abandura biyongereye ku kigero kiri hejuru ya 30 % mu cyumweru gishize.

Moeti yagize ati “Mu gihe mu bindi bihugu byo hanze ya Afurika bakingiye ibyiciro bibarizwamo abantu bafite ibyago byinshi byo kwandura ubu bakaba bari no gutekereza gukingira abana babo, ibihugu bya Afurika byo nta n’ubwo birabasha gutanga doze ya kabiri ku bafite ibyago byinshi byo kwandura.”

Miliyoni 50 z’inkingo nizo zimaze kwakirwa muri Afurika, miliyoni 31 akaba ari zo zimaze gutangwa mu baturage. Umugabane wa Afurika utuwe n’abasaga miliyari y’abaturage.

Kugeza ubu abantu bagera kuri miliyoni eshanu nibo bamaze kwandura Covid-19 muri Afurika, mu gihe ibihumbi 130 bahitanywe nayo, ni ukuvuga 2.9 % by’abanduye bose ku isi na 3.7 % by’abamaze gupfa bose ku isi.

Ibihugu byinshi bya Afurika byari byiteze guhabwa inkingo muri gahunda ya Covax yashyigikiwe na Loni igamije kugeza inkingo kuri bose. Icyakora icyo cyizere gisa n’ikiri kuraza amasinde kubera uburyo ibihugu bikize byikubiye inkingo ziri ku isoko, bigatuma Covax itabona izo yari ikeneye.

Burkina Faso ituwe na miliyoni 20, muri iki Cyumweru yahawe ibihumbi 115 by’inkingo mu gihe u Rwanda na Togo byo biherutse kwakira inkingo za Pfizer ibihumbi 100 buri kimwe. Muri Zimbabwe ho kubera ubwinshi bw’abashaka kwikingiza n’ubuke bw’inkingo za Sinovac zikorerwa mu Bushinwa, bamwe bagera ahatangirwa inkingo bagasubizwayo.

The Guardian yatangaje ko ubwandu bwa Covid-19 buri kwiyongera mu bihugu nka Angola na Namibia ndetse na Repubulika Iharanira Demokarasi ya Congo.

Uganda imaze kwakira kimwe cya gatatu cy’inkingo miliyoni eshatu yari itegereje muri Covax, mu cyumweru gishize ubwandu muri icyo gihugu bwageze ku 131 % ku cyumweru. Ubwandu bwinshi bwabonetese mu mashuri, mu bakozi bo mu bitaro, mu bigo bishyirwamo abari mu kato n’ahandi. Byatumye hafatwa ingamba zirimo gufunga amashuri n’ibikorwa bihuza abantu benshi.

Ibihugu nka Tanzania, u Burundi, Tchad na Eritrea ntibiratangira gukingira abaturage babyo. Muri Seychelles yakingiye hafi abaturage bayo bose naho hari kugaragara ubwiyongere bw’abandura. Ni ubwandu ahanini bushingirwa ku bwoko bushya bwa Covid-19 bugenda buboneka hirya ni hino no kuba barakoresheje urukingo rwa Sinopharm rukorerwa mu Bushinwa, rukekwaho kudahangana n’ubwo bwandu bushya bugenda buboneka.

Ikigo cy’Abanyamerika cy’ubushakashatsi Pew Research Center cyagaragaje ko mu 2020 miliyoni 494 muri Afurika yo munsi y’Ubutayu bwa Sahara nibo bari bari mu bukene, ariko uwo mubare wiyongereyeho miliyoni 40 mu 2021 kubera ingaruka za Covid-19.

U Rwanda ruri mu bihugu bike bimaze gukingira bake mu baturage babyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .