00:00:00 IGIHE NETWORK KN KINYARWANDA EN ENGLISH FR FRANCAIS

Icyo Afurika yiteze mu nama yiga ku guhangana n’imihangadurikire y’ibihe

Yanditswe na Muhonzire Sylvine
Kuya 3 Ugushyingo 2021 saa 06:59
Yasuwe :
0 0

Ubu Isi iri ku gitutu gikomeye cy’ubwiyongere bw’ubushyuhe bukabije bugenda bugaragara mu bice binyuranye ndetse bushobora kuzateza ingaruka ku miberaho y’abantu mu myaka 80 iri imbere mu gihe ntagikozwe ku kugabanya imyuka ihumanye yoherezwa mu kirere ikangiza akayungiro k’izuba kazwi nka ‘Ozone’.

Mu nama ya 26 y’Umuryango w’Abibumbye ku ihindagurika ry’ibihe, COP 21, yabaye ku itariki 31 Ukwakira kugeza ku ya 2 Ugushyingo mu 2021, yibanze ku kureba uruhare rw’ibihugu cyane cyane ibikize mu kugabanya imyuka ihumanye yoherezwa mu kirere.

Umugabane wa Afurika utegerezanyije amatsiko menshi uruhare rw’ibi bihugu mu kugabanya imyuka ya CO2 yoherezwa mu kirere, cyane ko Afurika yohereza ingana na 3% ku yoherezwa mu kirere, ariko ikagerwaho cyane n’ingaruka z’ubwiyongere bw’ubushyuhe ku Isi.

Amasezerano y’i Paris ku ihindagurika ry’ibihe yo mu 2015, yashyizeho imirongo ngenderwaho y’ibihugu ku kugabanya imyuka ihumanye yoherezwa mu kirere, aho ateganya ko buri mwaka Isi igomba kugabanya imyuka irenga miliyari toni 50, bizatuma mu 2023 Isi izaba imaze kugabanya ingana na 50% by’iyo yohereza naho mu 2050 Isi ikazaba itohereza na muke mu kirere.

Aha niho Afurika ishaka ko ibindi bihugu by’Isi cyane ibikize bishyiraho akabyo mu ishyirwa mu bikorwa ry’aya masezerano, kuko yo yohereza hagati ya 3% na 4% by’imyuka ihumanye ijya mu kirere, bityo kuba mu 2030 izaba yagabanyije 50% ni ibintu bitazayisaba ingufu nyinshi kuko isabwa kuzaba yagabanyije 2%.

Visi Perezida w’Ihuriro ry’ibihugu ryita ku mihindagurikire y’Ikirere rishamikiye kuri Loni, IPCC, Malian Youba Sokona, yavuze ko nubwo Afurika yohereza imyuka mike mu kirere ariko ibihugu biyigize byinshi bigirwaho ingaruka n’ubwiyongere bw’ubushyuhe ku Isi kuko byegereye umurongo muganda, Equateur, bituma bigira ikirere gishyuha.

Ati “Ibihugu byinshi by’Afurika bituriye Equateur, kandi tumaze igihe tubona ubwiyongere bwa dogere Celsius 1.5 burenga igipimo cya dogere Celsius 1.1 giteganyijwe kwiyongera ku Isi. Kuba isanzure ari rimwe kandi ritagabanywa, bituma iyo igihugu kimwe kigabanyije imyuka ikindi ntikibikore ikibazo kidakemuka.”

Mu byo Afurika yiteze nk’umugabane wa mbere uzungukira kuri uku kugabanya imyuka ihumanya ikirere, harimo uruhare rw’ibihugu bikize mu kugira iki kibazo nk’icyabyo, ndetse n’ubufasha bwabyo mu kuyiha inkunga izayafasha kugera ku ntego yo kugabanya imyuka mibi yohereza mu kirere.

Afurika yiteze ko ibihugu bikize bigiye gushyira imbaraga mu kugabanya imyuka mibi byohereza mu kirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .