ICC irashinja Bosco Ntaganda kugambana n’abatangabuhamya muri gereza

Yanditswe na Ishimwe Israel
Kuya 11 Ugushyingo 2016 saa 07:39
Yasuwe : XX
0

Abashinjacyaha bo mu Rukiko Mpuzamahanga Mpanabyaha rw’i Hague mu Buholandi, ICC, barashinja uwahoze ari Umukuru w’Inyeshyamba muri Repubulika Iharanira Demokarasi ya Congo, Bosco Ntaganda, kuba yarategetse abatangabuhamya ibyo bavuga.

Bosco Ntaganda ari mu rukiko aho akurikiranyweho ibyaha byo gukoresha abana mu ntambara, no gufata abagore ku ngufu, ndetse n’ubwicanyi yagizemo uruhare muri Congo hagati y’umwaka wa 2002 na 2003.

Reuters dukesha iyi nkuru itangaza ko iperereza ryakozwe kuri telefoni Ntaganda akoresha muri gereza ryagaragaje ko yavuganye n’abatangabuhamya bakomeye, bituma abangamira iperereza ku byaha aregwa.

Muri Nzeri uyu mwaka, Ntaganda yiyicishije inzara ahagarika kurya iminsi 12 nyuma yo kutishimira ikumirwa ku kuvugira kuri telefoni no kwamburwa uburenganzira bwo gusurwa, ibintu byatangiye mu mwaka wa 2014 ubwo byavugwaga ko ashobora kuba yagirana imikoranire n’abatangabuhamya bikaba byahutaza imigendekere myiza y’urubanza.

Mu kwezi gushize, mugenzi we Jean Pierre Bemba urukiko rwavuze ko nawe yagerageje kuvugisha abatangabuhamya akoresheje telefoni yo muri gereza mu gihe cy’urubanza rwe.

Urubanza rwa Ntaganda rwatangiye kuburanishwa mu mizi nyuma y’uko yishyikirije Ambasade ya Leta Zunze Ubumwe mu Rwanda mu 2013.

Ntaganda ahakana ibyaha 13 aregwa, birimo iby’intambara n’ibyibasiye inyokomuntu ashinjwa ko yakoze hagati y’umwaka 2002 na 2003 mu Karere ka Ituri, mu Burasirazuba bwa Repubulika Iharanira Demokarasi ya Congo, ubwo yari ayoboye inyeshyamba za UPC (Union des Patriotes Congolais).

Inyandiko urukiko rwashyize ahagaragara kuri uyu wa Kane zagaragaje kandi ko mu kwezi gushize, Jean Pierre Bemba wahoze ari Visi Perezida wa Congo, ndetse n’abamuburanira bahamijwe icyaha cyo guha ruswa abatangabuhamya bagera kuri 14 bari baje gutanga ibimenyetso mu rubanza.

Urukiko rwa ICC rushinja Bosco Ntaganda kugerageza kuvugana n'abatangabuhamya agamije gusibanganya ibimenyetso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza