00:00:00 IGIHE NETWORK KN KINYARWANDA EN ENGLISH FR FRANCAIS

Ibyo tuzi ku bitero by’iterabwoba byagabwe mu Mujyi wa Bujumbura

Yanditswe na Bukuru JC
Kuya 26 Gicurasi 2021 saa 05:45
Yasuwe :
0 0

Umugoroba wo ku wa Kabiri tariki 25 Gicurasi 2021, ni umwe mu mibi mu butegetsi bwa Perezida Evariste Ndayishimiye ugiye kumara umwaka atorewe kuyobora u Burundi.

Ibyo bitero bya grenade byagabwe mu bice bitandukanye by’Umujyi wa Bujumbura, byahitanye abantu babiri nkuko Minisiteri y’Umutekano yabitangaje bikimara kuba, nubwo hari ibinyamakuru birimo Iwacu Burundi byatangaje ko hapfuye abagera kuri bane, abandi bagakomereka.

Byabaye mu gihe guhera ku wa Mbere tariki 24 Gicurasi 2021, i Bujumbura hari kubera inama yiga ku mahoro yahuje ibihugu 11 byo muri Afurika yo Hagati. Iyo nama izasozwa ku wa Gatanu tariki 28 Gicurasi 2021.

Ni igitero abasesenguzi bavuga ko cyagabwe ku mpamvu zo kugaragaza u Burundi nk’igihugu kitarimo umutekano, dore ko inama yabaye ariyo iri ku rwego mpuzamahanga ibereye muri icyo gihugu nyuma y’imvururu zakurikiye amatora ya Perezida mu 2015.

Inama yitabiriwe n’ibihugu birimo Angola, u Burundi, Cameroun, Centrafrique, Congo Brazzaville, Repubulika Iharanira Demokarasi ya Congo, Gabon, Guinée-Équatoriale, u Rwanda, Sao Tomé-et-Principe na Tchad.

Perezida Evariste Ndayishimiye abinyujije kuri Twitter yihanganishije imiryango yabuze abayo, avuga ko ibikorwa by’iterabwoba nta mwanya bifite mu Burundi.

Ati “Mbabajwe n’abashaka gusubiza igihugu cyacu mu bihe by’iterabwoba, nyamara barabizi ko nta mwanya bagifite. Ndihanganisha imiryango y’ababuze ababo muri ibi bikorwa by’ubugizi bwa nabi. Ndifuriza abakomeretse gukira vuba. Ndahamagarira Abarundi bose gufatana mu nda, intsinzi yacu ituruka mu bumwe.”

Kuri Konti ya Twitter, Ishyaka riri ku Butegetsi CNDD-FDD ryamaganye icyo gitero, bihanganisha abakomeretse n’imiryango y’abapfuye, basaba ko ababigizemo uruhare bahanwa.

Umwe mu bateye grenade kuri parking y’imodoka mu Ngagara ahazwi nka Cotebu, yahise araswa na Polisi. Ikinyamakuru Iwacu Burundi cyatangaje ko bamusanganye izindi grenade.

Hari amakuru avuga ko kuri uyu wa Gatatu Perezida Ndayishimiye yahise akoranya inama y’umutekano yamuhuje n’abayobozi bakuru, ingabo na Polisi, ngo hafatwe ingamba zikomeye.

Nyuma y’ibitero hakurikiyeho guta muri yombi abantu batandukanye bakekwaho kubigiramo uruhare.

Imwe muri grenade zafashwe zitaraterwa mu Mujyi wa Bujumbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .