00:00:00 IGIHE NETWORK KN KINYARWANDA EN ENGLISH FR FRANCAIS

Ibyitezwe ku ihuzwa rya SSA na Kenya Airways biri mu rugamba rwo guhangana n’ibigo birimo RwandAir

Yanditswe na Ndahayo Emmanuel
Kuya 30 Nzeri 2021 saa 06:57
Yasuwe :
0 0

Ku rwego mpuzamahanga, icyorezo cya Covid-19 cyagize ingaruka zikomeye ku bigo bitwara abantu n’ibintu mu kirere muri Afurika, aho byahombye miliyari 10.2$ ndetse bigatakaza 63% by’abagenzi byari byatwaye mu 2019, ugereranyije na 2020.

Ibi byatumye ibigo bito, byiganjemo ibyari bisanzwe bikorera mu bihombo, bifata ingamba zikarishye mu rwego rwo gushaka uko byivana muri ibi bihe by’icyorezo bigaragara ko ingaruka zacyo zizakomeza kuri ibi bigo kugera nibura mu 2024.

Kimwe mu bisubizo bishobora kubifasha kurushaho guhangana n’ibi bibazo, harimo kwihuza cyangwa kugirana amasezerano y’imikoranire, kugira ngo ibigo birusheho guterana ingabo mu bitugu.

Ku rwego rw’Isi, kwihuza cyangwa ubufatanye bw’ibigo bitwara abantu n’ibintu mu kirere ni ibintu bisanzwe, aho ibigo binini bikunze gukorana n’ibito, biba bisanzwe bikorera mu bihugu bike cyangwa mu gice gito cy’Isi, kugira ngo bibifashe kugeza abagenzi muri ibyo bice, aho kugira ngo bikoreshe indege nini zabyo ku hantu hadaturuka inyungu nini. Ubu buryo bunakoreshwa mu gufasha abagenzi baturutse muri ibyo bice, koroherwa no kugera mu byerekezo bya kure, bakoroherwa no kubona indege z’ibigo binini zibatwara muri izo ngendo.

Icyakora ubu buryo bw’ihuzwa bukunze gushoboka gusa ku bigo bisanzwe byunguka, ariko byagera ku bigo bikorera mu gihombo, nk’uko bimeze kuri Kenya Airways na South African Airways (SSA), bikagorana.

Ibi bigo byombi ntabwo byorohewe, kuko nka Kenya Airways ifite umwenda wa miliyoni 500$, aho iri gusaba Leta kuyifasha kwishyura, mu gihe SSA yari imaze hafi umwaka yarasheshwe, mbere yo gusubukura ibikorwa byayo muri uku kwezi, ariko ibyerekezo iganamo byaragabanutse.

Kuri ubu, ibi bigo byombi byigeze kugira izina rikomeye mu bwikorezi bwo mu kirere muri Afurika, byamaze gutangaza ko byasinye amasezerano y’imikoranire ashobora no kuzatuma byihuza mu buryo bwuzuye, bikaba ikigo kimwe.

Byitezwe ko ubu bufatanye bw’ibi bigo buzaba buri mu nzego nk’ubukungu n’imari, ibijyanye na tekinike, gusana indege n’ibindi.

Umuyobozi Mukuru wa Kenya Airways, Allan Kiravuka, yavuze ko nta yandi mahitamo asigaye uretse kwifatanya mu rwego rwo kugira ngo ibigo byombi bihangane n’icyorezo cya Covid-19, ndetse binarusheho guhangana n’ibindi bigo bikomeje kugaragaza inyota yo kwaguka, birimo cyane cyane RwandAir ndetse na Ethiopian Airlines imaze kuba ubukombe ku isoko ry’ubwikorezi bwo mu kirere muri Afurika.

Yagize ati "Ahazaza h’ubwikorezi bwo mu kirere hagizwe n’ubufatanye hagati y’ibigo by’indege. Ubufatanye bwa Kenya Airways na SSA buzatuma abakiliya bagerwaho na serivisi nziza, aho tuzahuza indege n’ibyerekezo, tugasangira ubunararibonye, udushya ndetse tukanagira ubushobozi bwagutse bwo gukemura ibibazo dushobora guhura nabyo.”

Ubufatanye hagati y’impande zombi buje busanga ubwa Sosiyete ya RwandAir na Qatar Airways, byitezwe ko buzashyira ihangana rikomeye kuri ibi bigo byombi, ku buryo mu gihe bitakwifatanya, byashobokaga ko RwandAir na Ethiopian Airlines bizikubira isoko ry’ibyo bigo burundu, na cyane ko nka Ethiopian Airlines ari kimwe mu bigo bike byabashije kubona inyungu mu mwaka ushize, naho RwandAir ikaza mu bigo biri gukura ku muvuduko uri hejuru, uzanarushaho kwiyongera nyuma y’ubufatanye bwayo na Qatar Airways.

Mu gihe SSA na Kenya Airways zaramuka zihuje, byitezwe ko bizashyira imbaraga mu isoko rya Afurika, ari naryo risanzwe rigize igice kinini cy’ingendo za RwandAir, mu gihe Qatar Airways nayo imaze imyaka igaragaza inyota yo kuryinjiraho, kugira ngo ihangane n’ibigo nka Turkish Airlines imaze kurishingamo imizi.

Abahanga bavuga ko mu gihe iri hangana ryakomeza hagati y’ibigo by’indege muri Afurika, byagira ingaruka nziza ku bagenzi kuko ibi bigo byarushaho guhanga udushya, bikagabanya ibiciro, bikongera ibyerekezo byabyo, bikarushaho kuzamura urwego rw’imikorere, bikagira indege nshya ku buryo ibi byose byazamura urwego rw’ubwikorezi bwo mu kirere muri Afurika, mu gihe narwo rufatwa nk’inkingi ya mwamba izatuma intego z’isoko rusange ry’uyu mugabane zigerwaho.

Hagati aho, mu gihe RwandAir iherutse gutangiza ingendo zihuza Kigali na Lubumbashi muri Repubulika Iharanira Demokarasi ya Congo, Kenya Airways nayo iherutse gutangiza izihuza Johannesburg muri Afurika y’Epfo, na Lubumbashi.

Si ubwa mbere, SSA na Kenya Airways zigize igitekerezo cyo kwihuza, kuko cyumvikanye bwa mbere mu 2018, icyo gihe ndetse byavuzwe ko RwandAir na Air Mauritius byari muri ibyo biganiro. Ibi byaje mbere y’uko RwandAir itangira ibiganiro na Qatar Airways, bizatuma iki kigo gifata imigabane ingana na 49% ya RwandAir.

Ku rundi ruhande, ibihugu byinshi muri Afurika birimo Repubulika Iharanira Demokarasi ya Congo, yitezweho kuzaba isoko rikomeye ry’ubwikorezi bwo mu kirere mu myaka iri imbere, Uganda, Tanzania, Zambia n’ibindi byinshi, biri mu mishinga yo kubyutsa, cyangwa kwagura ibigo byabyo bikora ubwikorezi bwo mu kirere, ku buryo nta gushidikanya ko ihangana rizarushaho kubaho mu myaka iri imbere, ari nayo mpamvu ubufatanye bugaragazwa nk’ubuzagira uruhare mu iterambere ry’ubwikorezi bwo mu kirere muri Afurika, na cyane ko ibyo bihugu bizatangiza ibigo bito, bidashobora guhita bigira ijambo rikomeye ku isoko.

Ikigo cya Kenya Airways kiri mu mugambi wo kwihuza na SSA mu rwego rwo guhangana n'ingaruka z'icyorezo cya Covid-19 ndetse no guhangana n'ibindi bigo birimo RwandAir na Ethiopian Airlines

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .