Ibitangaje ku mibereho ya Kabila nyuma yo kuva ku butegetsi

Yanditswe na Evariste Nsengimana
Kuya 16 Nyakanga 2019 saa 08:25
Yasuwe :
0 0

Ku wa 24 Mutarama 2019 ni umunsi wanditse amateka mashya kuri Repubulika Iharanira Demokarasi ya Congo ubwo Perezida wa gatanu, Félix Tshisekedi yarahiriraga kuyobora, agahererekanye ubutegetsi mu mahoro na Joseph Kabila.

Ni intangiriro y’urugendo Kabila yatangiye ariko yamaze igihe kirekire aharura, ashaka icyo azakora nyuma yo kurekura ubutegetsi yamazeho imyaka 18.

Mu gukusanya bimwe mu byihariye ku mibereho y’ababaye abayobozi b’ibihugu, Jeune Afrique yahereye kuri Joseph Kabila wayoboye RDC asimbuye se, Laurent-Désiré Kabila nyuma y’iminsi 10 yishwe mu 2001.

Iki kinyamakuru cyagarutse ku mabanga y’ubutunzi ajyanye n’urwuri Kabila afite i Kingakati, muri iyi minsi bivugwa ko ariho ibikorwa bye bya buri munsi abikorera.

Nyuma yo kuva ku butegetsi, uyu mugabo w’imyaka 47 ufatwa nk’ukisirisimba mu myanya ya politiki, yibera i Kingakati aho afite icumbi n’urwuri rugari, yakiriramo akanayobora ba mukerarugendo.

Kabila atuye mu buzima butangaje aho asigaye akora ibikorwa by'ubworozi

Imodoka zinyuranwamo zihajyanye inyamaswa

Iki kinyamakuru cyatangaje ko mu muhanda witiriwe Lumumba ukunze gusangwamo imodoka zijyanye inyamaswa z’amoko atandukanye muri urwo rwuri. Bivugwa ko akiri ku butegetsi yahubakishije inzu zigera ku munani, ahatera ibiti ndetse ahashyira amatara manini.

Haberaga inama n’inkoramutima ze

Mbere y’uko arekura ubutegetsi, mu icumbi riri muri urwo rwuri Kabila yajyaga ahahuriza abajyanama n’abafatanyabikorwa be ngo bige ku miyoborere y’igihugu. Ni naho yakiriye uwamusimbuye, Félix Tshisekedi muri Werurwe uyu mwaka.

Kuri iri cumbi kandi Kabila ufite ishyaka (Front Commun pour le Congo) rifite imyanya myinshi mu Nteko Ishinga Amategeko, niho abayoboke baryo bari mu Nteko bahurira ariko ngo ntawe urabasha kugera mu byumba by’ibanga bihari.

Rufatwa nk’ubwato bwa Noa

Mu bugenzuzi iki kinyamakuru cyakoze cyagaragaje ko aho atuye [Kabila] ari igice gito cyane ariko gifite ibintu bikirimo. Urwo rwuri rurimo Pariki y’ikibaya cya N’Sele ingana na hegitari ibihumbi 10, ikikijwe n’urugo rureshya ka kilometero 32 irimo ubwoko butandukanye bw’inyamaswa nk’imisumbashyamba, ingona, impala, isha, inkura, inzoka n’izindi.

Amezi atandatu mbere y’uko ava ku butegetsi iyi pariki yabaye ahantu nyaburanga h’icyitegererezo. Aha hantu hagererenywa n’ubwato bwa Nowa, habura ibintu bibiri gusa biranga RDC birimo ingwe [Léopard] kuko bigoye kuyigumisha ahantu hamwe n’iyitwa Okapi irinzwe n’umuryango w’Abanyamerika.

Aka gace nibura gasurwa n’abakerarugendo basaga 1700 buri cyumweru bishyuye nibura amayero 27. Gaherereye mu butaka Kabila yahishuye mu myaka 20 ishize.

Atuye ahantu hari pariki irimo ubwoko butandukanye bw'inyamaswa

Yabwubatseho ibikorwa remezo ndetse uko yabwegukanye ntibizwi

Kuri ubwo butaka, Kabila yahise ahashyira inyubako ikomeye, inkoramutima ye, Barnabé Kikaya Bin Karubi, yavuze ko ‘yibuka ko ariyo yasinyiwemo amasezerano ya Sun City mu 2002’. Inzu zari zihari zishaje zasimbuwe na restaurant ifite n’aho bogera Kabila akunda kwifotoreza ari kumwe na ba mukerarugendo.

Mu kuhagira iwe yabanje kugirana ibiganiro n’abo mu bwoko bwa Batéké bari bahatuye ariko ntibyigeze bimenyekana uko yahegukanye mu buryo bwemewe n’amategeko.

Barnabé Kikaya Bin Karubi yavuze ko ‘yahise ahubaka amashuri, amavuriro n’imihanda’.

Kabila yakomeje kuvugurura ubwo butaka, buhangwamo imihanda ya kaburimbo n’ibiyaga karemano, buterwamo ibiti bisaga ibihumbi 100. Ibyo bikorwa byose bikorwamo n’abagera kuri 400 ku munsi.

Nyuma yinjiye mu bworozi, ahorororera ingurube 1300 n’ibimasa 400 bigira uruhare mu gutanga ingufu z’amashanyarazi. Bivugwa ko muri urwo rwuri hubatswemo ingomero z’amazi zishobora gutanga nibura Mega Watt ebyiri zacanira pariki n’ibyumba byakira ba mukerarugendo bizahubakwa.

Ububiko bw’indege

Muri ubwo butaka, Kabila ahafite ububiko bw’indege eshatu zirimo Lockheed Tristar yahuzaga Kinshasa na Bruxelles, Boeing 727 na Boeing 707.

Ibyo byatumye bamwe bakeka ko yaba ategura ibikorwa bya gisirikare mu ibanga. Gusa izo ndege aho ziri ntizikoreshwa, nta kibuga cyo guhagurukiramo gihari, nta na moteri yazo. Bivugwa ko arindiriye kuzisiga irange mu ibara akunda ry’ubururu.

Aho atuye hari indege eshatu ariko ntabwo zikora

Inyamaswa zakuwe muri Namibia

Iyo Pariki irimo inyamaswa zatangiye kujyanwayo mu 2017 zirimo izari zisanzwe muri RDC ariko izahashyizwe nyinshi zakuwe hanze y’igihugu, zimwe zizanwa mu buryo buhenze mu ndege no mu bwato zivanywe muri Namibia no mu bindi bihugu. Ibyo byazigizeho ingaruka zimwe zicwa no kubura ibizitunga izindi zipfira mu nzira.

Bivugwa ko hari amafaranga asaga miliyoni 40 z’amadolari yaba yarakoreshejwe muri ibyo bikorwa akuwe kuri Banki Nkuru ya RDC mu buryo butemewe.

Umuganga w’inyamaswa wo muri Namibia, Ulf Dubessing, ushinzwe kuzohereza yemeje ko iriya pariki “yari mu mishinga ya Kabila yo kuva muri politiki yateganyije mbere y’igihe.”

Abayobozi biriya pariki bemeza ko Kabila amara umwanya munini mu rwuri rwe kurusha uwo amara muri politiki kuko ashobora kuba asigaye akunda ibijyanye no kurinda no kubungabunga ubuzima bw’inyamaswa.

Si uru rwuri cyangwa isambu Kabila afite gusa kuko hari indi afite ku kirwa cya Mateba, kiri hafi y’umugezi wa Congo nayo ajyanaho inyamaswa akuye muri Namibia n’urundi rwuri afite i Kundelungu mu Ntara ya Katanga, aho yifuza kujyana inyamaswa z’ishyamba kuko ubu ahororera amatungo asanzwe.

Inyamaswa zimwe zavanywe muri Namibia
Aho asigaye aba yahateye ibiti ibihumbi 100
Yahubatse kandi ibikorwa remezo bigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza