Kwamamaza

Abagore benshi mu buyobozi bw’ibigo batuma byunguka kuruta ibitabafite-Ubushakashatsi

Yanditswe kuya 8-10-2016 saa 12:19' na Hagengimana Philbert


Imibare itari mike igaragaza ko abagore badahabwa imyanya ikwiye mu nzego zifata ibyemezo mu bigo bitandukanye, ariko kandi hari ibimenyetso bigaragaza ko kubagira ari benshi mu buyobozi bukuru bituma inyungu yiyongera.

Ubushakashatsi bwakozwe n’Ikigo gikora Ubushakashatsi n’Ubusesenguzi, McKinsey & Company, ku mugabane wa Afurika bwagaragaje ko urwunguko mbere yo gukuramo imisoro (EBIT) mu bigo bifite abagore nibura ¼ mu buyobozi bukuru, ruba ruri hejuru ho 20% ugereranyije n’ibigo bifitemo bake. Bwakorewe mu bigo bigera kuri 200, ahabajijwe abayobozi babyo barimo n’abagore 30.

The Eastafrican itangaza ko raporo y’icyo kigo yamurikiwe i Nairobi kuwa 28 Nzeri uyu mwaka, hari aho abashakashatsi bagira bati “...Ibyo binemezwa n’uburyo abagore bahagararirwa mu nzego zifata ibyemezo. Muri Afurika ibigo bifite abagore benshi mu buyobozi bukuru bigira urwunguko rwo hejuru ugereranyije n’ibifitemo abaringaniye.”

Ibyavuye muri ubwo bushakashatsi bwakorewe muri Afurika, byashimangiye ibyo McKinsey yabonye mu zindi nyigo icyenda yakoze ku Isi yose mu myaka irenga icumi ishize, aho byagaragaye ko iyo abagore bagize uruhare rukomeye mu miyoborere y’ibigo, bifasha gutuma bigira imirongo ngenderwaho n’imikorere ibyara inyungu mu buryo buboneye kandi zikagera kuri buri munyamigabane.

Nubwo nta wakwemeza bidasubirwaho ko umusaruro mwiza w’ibigo ujyana buri gihe n’umubare munini w’abagore mu buyobozi bwabyo, abashakashatsi bagaragaje ko ubwinshi bwabo bufasha mu gucungana n’ingaruka z’ibibazo bivuka mu kazi, gufata ibyemezo, bikanatera umurava mu kazi, ibyo bikagira ingaruka nziza z’iterambere mu by’umutungo n’imari.

Indangagaciro z’abagore zifasha cyane mu koroshya ifatwa ry’ibyemezo muri sosiyete bakoramo.

Abashakashatsi babigaragaje muri iyo raporo,bati “Ibigo bifite abagore benshi mu buyobozi bukuru byoroherwa no gucungana n’ibibazo, nko kudahemba imishahara y’umurengera. Abayobozi b’abagore boroherwa no kwakira abakiriya; ikigo cyubahirije neza uburinganire n’ubwuzuzanye bw’ibitsina byombi, cyoroherwa no kumenya byoroshye ibyifuzo by’abakiriya babo.”

Umubare munini ugira akamaro mu iterambere ry’ikigo cyangwa urwego bayoboramo, kuko ahanini akazi kabo bagakorana ubwitange hashingiwe ku myitwarire karemano y’umugore.

Ibindi byagaragaye muri ubwo bushakashatsi ni uko, nubwo Umugabane wa Afurika uza ku isonga mu kugira abagore benshi mu nzego zifata ibyemezo nk’abayobozi bakuru n’inama z’ubutegetsi z’ibigo ugereranyije n’ahandi ku Isi, baracyahagarariwe ku rugero ruciriritse, mu nzego z’ubuyobozi bw’ibyo bigo.

Iyo raporo ivuga kandi ko iyo hazamuwe mu ntera abagore 100 usanga hanazamuwe abagabo 130, kandi mu buryo inzego zikurikirana mu buyobozi bw’ibyo bigo, usanga bagenda bagabanuka ku buryo bigera ku buyobozi bukuru bagera kuri 5%.

Ubwo bushakashatsi ni na bwo bwagaragaje ko Afurika yateye imbere mu bwiyongere bw’abagore mu myanya y’ubuyobozi bukuru bw’ibigo byigenga ugereranyije n’urwego bariho mu myaka 10 ishize, aho ubu bageze kuri 5% mu gihe ku Isi hose ubu ari 4%.

U Rwanda ku isonga mu bihugu bifite abagore benshi mu nzego zifata ibyemezo

Muri Politiki y’u Rwanda, Itegeko riteganya nibura abagore 30% mu nzego zifata ibyemezo, ndetse kugeza mu mpera z’umwaka ushize wa 2015 bari 46% mu nzego zose, ariko kugeza ubu ni 64% mu Nteko Ishinga Amategeko, Umutwe wa Sena n’uw’Abadepite.

Raporo iheruka gushyirwa ahagaragara n’Ihuriro ry’Abagize Inteko Zishinga Amategeko ku Isi muri Kanama uyu mwaka, yashyize u Rwanda ku mwanya wa mbere ku Isi mu bihugu bifite abagore benshi muri Guverinoma.

Mu Nteko Ishinga Amategeko, Umutwe w’Abadepite mu myanya 80 itorerwa harimo abagore 51, naho mu Basenateri 26, harimo abagore 10.

Raporo yanagaragaje akamaro k’abagore benshi mu butegetsi

Kugira abagore benshi mu nzego zifata ibyemezo bifite akamaro katagira ingano nk’uko raporo ya McKinsey ibivuga, ikagaragaza ko byoroha gucengeza amatwara y’amahame shingiro y’umurimo, umuhate mu kunoza umurimo, imikoranire hagati y’abakozi n’abayobozi n’ibindi.

Ikindi kandi cyagaragaye muri ubwo bushakashatsi ni uko abakiriya hagati ya 70% na 80% bagana ibigo by’ubucuruzi baba bakuruwe n’abagore cyangwa abakobwa babikoramo.

Icyakora ngo abagabo muri izo nzego nkuru zifata ibyemezo bagira akamaro kanini gusumbya abagore, kuko bo usanga baharanira kubahiriza ibiteganywa n’amategeko, aho bakunda gufata ibyemezo biyashingiyeho, bakaba kandi barusha abagore kumva ibitekerezo bishya.

Uko abagore bahagarariwe mu nzego zifata ibyemezo ku mugabane wa Afurika
Abadepite barahira mu Ukuboza kwa 2013. Icyo gihe u Rwanda rwabaye igihugu cya mbere ku Isi kigize abagore barenga 50% mu Nteko Ishinga Amategeko

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved