Hari abadepite batangiye kwifuza ko abahagarariye u Burundi bahagarikwa muri EALA

Yanditswe na Rabbi Malo Umucunguzi
Kuya 20 Werurwe 2017 saa 01:31
Yasuwe :
0 0

Nyuma y’uko hari Abadepite b’u Burundi batutabiriye imirimo y’Inteko Ishinga Amategeko y’Umuryango wa Afurika y’Iburasirazuba (EAC) i Kigali, hari bamwe muri bagenzi babo baturuka mu bindi bihugu bifuje ko bahagarikwa.

Uretse kuba Abadepite b’u Burundi bane bataritabiriye imirimo ya EALA, hiyongereyeho ko u Burundi nk’igihugu buri gushyira imbaraga nke mu bikorwa by’umuryango wa EAC , bigatuma hibazwa ahazaza hawo.

Muri uyu mwaka w’ingengo y’imari usigaje amezi atatu ngo urangire, u Burundi nta faranga na rimwe bwatanze muri $8 378 108 buri gihugu cyari cyiyemeje. Ayo kandi yiyongera ku birarane bya $771 037 yo muri 2015/2016.

Kudatanga imisanzu kw’ibihugu byatumye ibikorwa bya EAC biya mu bibazo, gahunda zari zitangijwe zirahagarara, abadepite mu Nteko Ishinga Amategeko y’uyu muryango batangira guhembwa nabi, kugeza ubwo hari uheruka gusaba ko buri gihugu cyajya cyihembera abagikomokamo.

U Burundi buri kwerekeza amaso ahandi

Itangazo rya SADC rigaragaza ko mu nama yabaye kuwa Gatandatu, tariki ya 18 Werurwe 2017, ihuje abakuru b’ibihugu na za Guverinoma bagize uwo muryango, bemeranyije kuzaganira ku busabe bw’u Burundi na Comoros bifuza kwinjira muri uwo muryango, muri Kanama uyu mwaka.

U Burundi bwakomeje kubona EAC nk’ikibazo kuri yo kuko harimo ibihugu nk’u Rwanda bushinja kuyihungabanyiriza umutekano nubwo nta bimenyetso bifatika bwigeze bugaragaza.

Gusa bwakomeje kugenda biguru ntege muri gahunda zireba EAC, ndetse ugukomera kw’izo mpungenge kwanareberwa mu kuba Abarundi bari mu Nteko Ishinga Amategeko y’Umuryango wa Afurika y’Iburasirazuba, EALA, bamwe baranze kuyitabira bavuga ko ari impamvu z’umutekano wabo.

Kuba nta musanzu u Burundi bwatanze muri EAC, abadepite babwo ntibitabire neza ibikorwa by’inteko uko bikwiye kandi bakagenerwa imishahara iva mu misanzu ibindi bihugu bitanga, ni kimwe mu byagiye byitswaho cyane.

Hari abashatse gusaba ko Abarundi bahagarikwa muri EALA

Ubwo hasozwaga imirimo y’Inteko Ishinga Amategeko ya EAC (EALA) mu Rwanda kuwa 16 Werurwe, Depite Aboubakar Ogle Abdi wo muri Kenya, yavuze ko yaje kuganirizwa n’abadepite ku gitekerezo yari afite ku ibura ry’abadepite b’u Burundi, ibintu byinnshi ngo bitandukanye n’ukuri.

Akivuga ibyo, Depite Nakawuki Susan wo muri Uganda yahise yungamo avuga ko byabayeho kandi babiganiriye hagati yabo.

Yagize ati “Depite Ogle yazanye igitekerezo cyo kuba yasembura ibiganiro ku guhagarika abadepite baturuka mu Burundi mu Nteko, mu gihe turi hano. Twagiranye ikiganiro njye na we. Ariko ndatekereza ko hari uburyo nyabwo bwo kubigeza kuri bagenzi bacu.”

Ni ikintu kitahawe umwanya ngo kiganirweho, ariko Perezida wa EALA, Daniel Fred Kidega, yavuze ko niba hari ikintu bashaka ko kivugwaho kigira inzira binyuzwamo.

Ikibazo gikomeye kuruta uko bamwe bagifata

Depite Dr James Ndahiro, mu bitekerezo yatanze muri EALA mu cyumweru gishize, yagize ati “Uyu ntabwo ari wo muryango nari nzi mu myaka icyenda ishize, uyu ntabwo ariwo muryango nari nzi mu myaka itanu ishize. Harimo ugucika intege mu birebana no kwishyira hamwe nk’ibihugu.”

Kuba ibihugu bitari gutanga imisanzu kandi ndetse u Burundi bukaba bwaratereye agati mu ryinyo, Depite Mukasa Mbidde yavuze ko bidakwiye ko hafatwa igihe kinini haganirwa ku bintu byagarutsweho kenshi.

Yagize ati “Ntabwo byumvikana uko Inteko Ishinga Amategeko yo ku rwego rw’iyi, ifite abantu nkatwe, ikomeza kuganira ikintu kimwe kidakemuka, tugaha imyanzuro ba bantu bamwe (inama y’abaminisitiri ba EAC ishinjwa kudakora) kandi tugategereza ibisubizo.”

Depite Nsabimana Yves ukomoka mu Burundi we wabashije kuza mu Rwanda kandi akanyurwa n’uko yakiriwe, yashimangiye ko ikibazo cyo kudatanga imisanzu giteye inkeke.

Yakomeje agira ati “Iyo usuzumye imibare yatanzwe n’uburyo ingengo y’imari ikusanywa, ubu iri munsi ya 45%. Kandi iyo wemeza ingengo y’imari, wongeraho n’icyo izakora. Ibi rero birerekana ko hari ibikorwa byinshi bitagezweho.”

Depite Nsabimana yavuze ko iki kibazo cyageze imbere muryango kuko ubunyamabanga butacyishyura abafatanyabikorwa babwo, ku buryo abafite ibyo babugemuriraga batangiye kubihagarika.

Nyamara u Burundi ni na bwo buyoboye Ubunyamabanga bwa EAC, nubwo buri mu bihe bikomeye by’umutekano muke, ubukungu butifashe neza n’inkunga z’abanyamahanga zahagaritswe.

Depite Dora Byamukama wo muri Uganda yavuze ko ibikorwa bya EAC bitakitabwaho n’ibihugu nka mbere, atanga urugero rw’uko mbere hariho ba Minisitiri bihariye barebana n’ibikorwa bya EAC, ariko ubu hagiye hashyirwaho ababihuza n’izindi nshingano, ku buryo bagabanyije umwanya bahaga EAC.

Depite Ogle yasabye ko hashyirwaho akanama kazacukumbura uburyo ikibazo cy’imisanzu muri EAC cyashakirwa umuti kakazatanga raporo muri Gicurasi, umwanzuro wanatowe.

Abadepite ba EALA mu bikorwa by'Inteko yabo yabereye mu Rwanda muri uku kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza