Hahishuwe ko igisirikare cya Uganda cyafungiye Bobi Wine mu rugo rwe nyuma y’amatora

Yanditswe na Akayezu Jean de Dieu
Kuya 16 Mutarama 2021 saa 06:18
Yasuwe :
0 0

Igisirikare cya Uganda cyohereje ingabo mu gace gaherereyemo urugo rwa Bobi Wine, kimufungira mu nzu ye mu gihe mu gihugu harimo kuba amatora, aho hirindwaga ko ashobora kujya kubonana n’abarwanashyaka be mu Mujyi wa Kampala.

Icyo gihe ngo igisirikare cyakubise umwe mu barinzi ba Bobi Wine, ndetse agira ibikomere ku maso, nk’uko byatangajwe na John Spark, umunyamakuru wa Sky News wagize amahirwe yo kubonana na Bobi Wine muri ibyo bihe.

Ubwo Bobi Wine yarimo kuzengurutsa abanyamakuru bari bamusuye mu rugo rwe, baje kugwa ku basirikare batanu bambaye impuzankano kandi bafite imbunda.

Nyuma yo kubakubita amaso, umwe muri aba basirikare yahise akuramo imbunda ye ayitunga abagendanaga na Bobi Wine, na bo bahise biruka bakajya gushaka aho bihisha, n’ubwo uwo musirikare atigeze arekura isasu na rimwe.

Mu kiganiro Bobi Wine yagiranye n’abo banyamakuru, yavuze ko ibyo biboneye ari ishusho y’ubuzima amazemo iminsi, ati “Uru ni urugero rw’iterabwoba nahuye naryo mu bihe byo kwiyamamaza ndetse ni ko byitezwe kugenda mu gihe cyo gutangaza ibyavuye mu matora.”

Umuvugizi w’Ingabo za Uganda ntahakana ko mu isambu ya Bobi Wine hari ingabo z’igihugu kandi zifite intwaro , gusa akavuga ko abasirikare bari mu isambu ya Bobi Wine ari abagamije kumurinda, aho kumuhungabanyiriza umutekano.

Ku rundi ruhande, Umuvugizi wa Polisi yo mu Mujyi wa Kampala, yavuze ko igipolisi cya Uganda cyaburijemo umugambi w’abantu batatu bafite intwaro bagerageje kwinjira mu isambu ya Bobi Wine, ariko bagatabwa muri yombi batarabigeraho bagafungwa.

Komisiyo y’Amatora muri Uganda yemeje ko Perezida Yoweri Museveni yegukanye intsinzi y’Umukuru w’Igihugu n’amajwi 58,64% ahigitse Robert Kyagulanyi wagize amajwi 38%.

Bobi Wine w’imyaka 39 ni umwe mu batavuga rumwe na Leta ufatwa nk’usigaye akomeye, aho ahanganye na Museveni umaze imyaka 34 ku butegetsi, aho nawe ubwe agwije imyaka 76 yose.

Ingabo za Uganda ziri gutembera mu isambu ya Bobi Wine
Bobi Wine ari kumwe n'umurinzi bivugwa ko wakubiswe n'igisirikare cya Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .