Goma: Ingabo 32 za Loni zakomerekeye mu gitero cyahitanye umuntu umwe

Yanditswe na Ishimwe Israel
Kuya 9 Ugushyingo 2016 saa 06:01
Yasuwe : XX
0

Abantu bataramenyekana bateye gerenade, mu gace gaherereye hafi y’Umujyi wa Goma mu Burasirazuba bwa Repubulika Iharanira Demokarasi ya Congo ihitana umwana w’umukobwa w’imyaka umunani, inakomeretsa ingabo 32 zikomoka mu Buhinde ziri mu butumwa bwo kubungabunga amahoro muri iki gihugu, ndetse n’abasivili babiri.

Iki gitero cyagabwe mu gitondo cyo kuwa Kabiri tariki ya 8Ugushyingo 2016, ahagana saa 6:30 ku isaha yo muri iki gihugu.

Santas Acenti Foruguta, ucunga umutekano kuri Kiliziya ituranye n’aho cyagabwe yatangaje ko yumvise urusaku rw’igisasu ahagaze hanze y’urupangu agahita ahunga.

Umuvugizi w’Ingabo za ONU zishinzwe kubungabunga amahoro muri iki gihugu (MONUSCO), Charles-Antoine Bambara, yabwiye Ibiro Ntaramakuru by’Abanyamerika (AP) ko bataramenya uwihishe inyuma y’ubu bugizi bwa nabi.

Umwe mu bakorana bya hafi na MONUSCO utashatse ko amazina ye atangazwa yavuze ko iki gitero cyari kigambiriye kwica ingabo z’Abahinde zibarizwa muri ONU zishinzwe kubungabunga amahoro.

Yagize ati “ Iki gitero urebye cyashakaga ingabo zishinzwe kubungabunga amahoro. Kubera ko nta ntwaro zari zifite kandi cyaje gitunguranye ku buryo byari bigoye kugikumira.”

Umuyobozi w’izi ngabo za ONU ku ruhande rwa DRC, Sylvestre Kilolo, avuga ko bari gushaka amakuru ku wihishe inyuma y’ubu bugizi bwa nabi.

Ati “Abagize itsinda rishinzwe iperereza bahise boherezwa ahagabwe igitero mu rwego rwo gukusanya amakuru ku cyaba cyateye aya marorerwa.”

Birakekwa ko iki gitero cyaba cyagabwe n’imitwe yitwara gisirikare ikorera mu Majyaruguru ashyira Uburasirazuba bwa Congo, n’ubwo mu minsi ishize ibitero biheruka byakunze kugabwa mu gace ka Beni mu Majyaruguru ya Goma.

Inzego zishinzwe umutekano muri iki gihugu zakoresheje imyuka iryana mu maso zirukana abaturage bari aho bavuga ko iki gitero cyaturutse ku burangare bw’izo ngabo.

Abasirikare bakomeretse bahise bajyanwa kwa muganga mu bitaro biherereye mu Mujyi wa Goma.

Birakekwa ko abagabye igitero bashakaga guhitana abasirikare b'u Buhinde bari mu butumwa bw'amahoro bwa Loni muri Congo
Abapolisi ba Congo bihutiye kugera aho igisasu cyaturikiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza