Ghana: Abanyamakuru basabwe amafaranga kugira ngo bazakurikirane amatora

Yanditswe na Uwishyaka Jean Louis
Kuya 13 Ugushyingo 2016 saa 12:24
Yasuwe : XX
0

Umuryango Mpuzamahanga w’Abanyamakuru (ISJA) wagejeje ikirego mu Rukiko rw’Uburenganzira bwa muntu, basaba kubuza Komisiyo y’Igihugu y’Amatora muri Ghana gusaba amafaranga abanyamakuru bashaka kuzitabira amatora ateganyijwe muri icyo gihugu mu Ukuboza uyu mwaka.

Ayo matora ni ay’Umukuru w’Igihugu, ay’abagize Inteko Ishinga Amategeko n’ay’inzego z’ibanze, ateganyijwe kuba ku wa 7 Ukuboza 2016.

Umuyobozi w’uwo muryango Nana Oppong, yavuze ko icyemezo cy’iyo Komisiyo kirenga ku bikubiye mu Itegeko Nshinga n’amahame agenga umwuga w’itangazamakuru.

Komisiyo y’Igihugu y’amatora iri guteganya guca amadolari 2.50 buri munyamakuru wese ushaka kuzitabira ayo matora.

Radiyo Ijwi rya Amerika ivuga ko Umuyobozi wa Komisiyo y’Igihugu y’amatora muri Ghana, Charlotte Osei, yavuze ko iyi komisiyo idafite amafaranga yo gukora ibyangombwa byemerera abanyamakuru bose kwitabira ayo matora.

Yagize ati “ Muvuga ko guverinoma yaduhaye amafaranga angana na Miliyoni 693 akoreshwa muri iki gihugu[ …] ariko nimuza kwibuka murasanga ingengo y’imari yemejwe na Komisiyo y’Amatora, Komite yihariye ishinzwe ingengo y’imari na Minisiteri y’igenamigambi yari Miliyari imwe na Miliyoni 200 z’amafaranga y’aha, murumva neza ko ari yo mpamvu tubasaba kwishyura ibyo byangombwa? Nk’abafatanyabikorwa bacu rero, tubasaba kwishyura amafaranga akoreshwa muri iki gihugu 10 kugira ngo mubashe kuzenguruka ku biro by’itora byose mushaka kandi mukore akazi kanyu mwisanzuye."

Gusa mu kiganiro n’Ijwi rya Amerika, umuyobozi w’Umuryango w’Abanyamakuru (ISJA), yavuze ko bitabaje urukiko nyuma y’uko bagerageje gusaba abayobozi ba Komisiyo y’Amatora ngo bahure baganire kuri icyo kibazo ariko ntibabyemere.

Ati “ Twandikiye Komisiyo y’Amatora ibaruwa mu cyumweru gishize tubasaba ko baza tukaganira ku mafaranga yo kwishyura ibyangombwa bashyizeho kugira ngo bahindure icyo cyemezo. Kuko hari abanyamakuru batabasha kuyiyishyurira. Mwibuke ko hari abanyamakuru bahembwa amadolari 38 gusa ku kwezi, ntabwo rero ayo mafaranga bayabona.”

Sosiyete sivile yavuze ko Komisiyo y’Amatora ifite ubushobozi bwo kubikora kuko ngo niyo yonyine ifite ubushobozi bwo gutegura amatora. Bavuga kandi ko kuva iyi komisiyo nta mafaranga ahagije ifite yo kubakorera ibyangombwa, bakwiye kubwira abayobozi b’ibitangazamakuru bakorera bikabibishyurira.

Gusa Oppong we ntabikozwa kuko ngo iyi komisiyo iri kwica amategeko. Itegeko Nshinga ryo muri iki gihugu riteganya ko ibintu byose bikenerwa mu matora bigomba kuva mu mafaranga iba yagenewe.

Abanyamakuru basabwe kwishyura amadolari 2.50 kugira ngo babone icyangombwa cyo kubasha gutara inkuru z'amatora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza