Gabon: Urukiko rwashimangiye intsinzi ya Perezida Bongo rutangaza n’amajwi mashya

Yanditswe na Philbert Girinema
Kuya 24 Nzeri 2016 saa 08:33
Yasuwe : XX
0

Urukiko Rurinda Itegeko Nshinga muri Gabon rwashimangiye ko Perezida usanzweho, Ali Bongo Ondimba, ariwe watsinze amatora, rutera utwatsi ubusabe bw’abatavuga rumwe n’ubutegetsi basabaga ko hongera kubarurwa amajwi yose.

Gusa urukiko rwanatangaje impinduka mu majwi y’aba bari bahanganye, aho rwemeje ko Bongo yatsinze n’amajwi 50.66% mu gihe Jean Ping yahawe 47.24%.

Mbere ibyavuye mu matora yabaye kuwa 27 Kanama, Komisiyo yari yatangaje ko Ali Bongo w’imyaka 57 yatsinze amatora n’amajwi 49, 80% mu gihe Jean Ping bari bahanganye yamuguye mu ntege n’amajwi 48, 23%.

Umwanzuro w’urukiko umaze iminsi utegerejwe n’amatsiko menshi, n’impungenge z’uko gushimangira intsinzi ya Perezida Bongo bishobora gutiza umurindi ubugizi bwa nabi bwari bwatangiye gututumba bushingiye ku kutishimira ibyavuye mu matora.

Guverinoma ya Gabon yavuze ko nihagira ubugizi bwa nabi buba byose bigomba kuryozwa Jean Ping utavuga rumwe n’ubutegetsi.

Perezida Bongo yatsinze amatora muri Kanama arushije Ping amajwi 6000, ariko undi ntiyemera ko yatsinzwe ahubwo avuga ko yibwe amajwi ndetse asaba ko yongera kubarurwa, ubusabe urukiko rwateye utwatsi.

Nyuma y’umwanzuro w’urukiko, Perezida Bongo yahise asaba “ibiganiro bya politiki” n’abatavuga rumwe n’ubutegetsi.

BBC ivuga ko abaturage bari batangiye kubika ibiribwa bihagije mu ngo zabo mbere y’uko urukiko rutangaza umwanzuro warwo, abantu benshi batonze imirongo ku mabanki ndetse kuri uyu wa Gatanu Ambasade y’u Bufaransa muri Gabon yari yaburiye abaturage bayo kudasohoka mu nzu.

Perezida Ali Bongo Ondimba niwe watsinze
Urukiko rwashimangiye intsinzi ya Perezida Bongo rutangaza n’amajwi mashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza