Kwamamaza

Gabon:Urukiko rukomeje gutera amatsiko abategereje isubirwamo ry’amatora

Yanditswe kuya 23-09-2016 saa 10:24' na Philbert Hagengimana


Urukiko rushinzwe kurengera Itegeko Nshinga rukomeje gutera amatsiko abategereje kumenya niba amatora y’Umukuru w’Igihugu azasubirwamo cyangwa atazasubirwamo, nyuma y’aho isomwa ry’umwanzuro ku kirego cya Jean Ping ryimuriwe ku munsi utazwi.

Kuri uyu wa Gatanu tariki ya 23 Nzeri, ni bwo byari byitezwe ko hatangazwa umwanzuro ku kirego Jean Ping utavuga rumwe n’ubutegetsi yashyikirije urukiko rushinzwe kurengera Itegeko Nshinga, arumenyesha ko habaye uburiganya mu matora y’Umukuru w’Igihugu, aho yasabaga ko yasubirwamo.

Kuri uyu wa Kane tariki ya 22 Nzeri 2016, urukiko rwasuzumye bwa nyuma ikirego cya Jean Ping, aho abacamanza babaruye bundi bushya ibyavuye mu matora mu biro by’itora bigera ku 2800.

Iri barura ryakozwe hari abagenzuzi batanu baturutse hanze y’Igihugu ndetse n’itsinda ry’indorerezi ziturutse mu Muryango wa Afurika Yunze Ubumwe zahageze mbere y’uko Urukiko rutangaza amajwi ya nyuma y’uwatorewe kuyobora igihugu, hagati ya Jean Ping na Ali Bongo.

Nyuma yo gusuzuma ibimenyetso by’uruhande rw’urega (Jean Ping) n’uruhande rwa Ali Bongo watsinze amatora, Umucamanza yahise avuga ko raporo ari ndende cyane.

Me Jean-Rémy Bantsantsa uburanira Jean Ping yabwiye RFI dukesha iyi nkuru, ko ntawe ukwiye kuvuga ko inyandikomvugo y’ibyavuye mu matora bazanye ari impimbano, ngo kuko abo ku ruhande rwa Leta ari bo bazihimba.

Francis Nkéa, Uburanira Ali Bongo we yabwiye umucamanza ati “Uri umuganga w’iki gihugu. Nta burenganzira bwihariye mu matora intara ya Haut-Ogooué ifite butandukanye n’ubw’izindi. Niba twifashisha inyandikomvugo z’ibyavuye mu matora zakozwe na Komisiyo y’amatora mu ntara umunani kandi impande zombi zarabyumvikanyeho, birasanzwe ko n’Intara ya Haut-Ogooué hakoreshwa izo nyandikomvugo.”

Kuwa 8 Nzeri 2016, Jean Ping utavuga rumwe n’ubutegetsi yaregeye Urukiko rushinzwe kurengera Itegeko Nshinga, arusaba ko rwategeka ibarurwa ry’amajwi bundi bushya mu Ntara ya Haut-Ogooué.

Ali Bongo bari bahanganye, yabonye amajwi 95% mu bantu 99% batoreye muri iyo ntara nk’uko byatangajwe na Komisiyo y’Amatora (Cenap).

Iyo ntsinzi yahakuye yatumye anabasha gutsinda amatora mu gihugu hose, aho yarushije Jean Ping bari bahanganye amajwi 5000, ari na cyo cyabaye imvano y’imvururu muri Gabon kuva ubwo byatangazwaga na Minisitiri w’Umutekano kuwa 31 Kanama.

Kuri uyu wa Gatanu tariki ya 23 Nzeri ni wo munsi wa 15 ari na wo gihe ntarengwa cyari cyatanzwe cyo kuba hatangajwe umwanzuro ku busabe Jean Ping yashyikirije Urukiko rushinzwe kurengera Itegeko Nshinga, ariko Umucamanza Marie-Madeleine Mborantsuo yasabye impande zombi kuba maso.

Ubwanditsi bw’Urukiko bukazabamenyesha umunsi uwo mwanzuro uzatangwaho, ndetse hakanatangazwa amajwi ya burundu y’amatora y’Umukuru w’Igihugu yabaye kuwa 27 Nyakanga 2016.

Igihe amajwi yabaruwe n'urukiko azatangarizwa ntikiramenyekana

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved